၂. သက္ကနာမသုတ္တဝဏ္ဏနာ

၂၅၈. မနုဿဘူတောတိ မနုဿေသု ဘူတော၊ မနုဿတ္တံ ဝါ ပတ္တော. အာဝသထန္တိ နိဝါသဋ္ဌာနံ ကာရေတွာ အဒါသိ၊ တသ္မာ ဝါသံ အဒါသီတိ ဝါသဝေါ. အတ္ထ-သဒ္ဒေါ ဣဓ ကာရဏပရိယာယောတိ အာဟ ‘‘သဟဿမ္ပိ ကာရဏာန’’န္တိ. သွာယမတ္ထော ဟေဋ္ဌာ ဝိဘာဝိတောဝ. ဝိနိစ္ဆိနတိ၊ တသ္မာ သဟဿံ ပညာအက္ခီနိ ဧတဿာတိ သဟဿက္ခော. မဃံ ဝုစ္စတိ ဓနံ၊ တံ ပန သဒ္ဓါသင်္ခါတံ မဃံ အဿ အတ္ထီတိ မဃဝါ. ပုရေ ဒါနံ ဒဒါတီတိ ပုရိန္ဒဒေါ အနုနာသိကလောပံ အကတွာ. ပုညာနိ ကာတုံ သက္ကောတီတိ သက္ကော.

သက္ကနာမသုတ္တဝဏ္ဏနာ နိဋ္ဌိတာ.