၇. ဣဿရိယသုတ္တဝဏ္ဏနာ

၇၇. သတ္ထဿ မလန္တိ သတ္ထမလံ၊ ယေန သတ္ထံ မလီနံ ဟောတိ၊ သတ္ထမလဂ္ဂဟဏေန စေတ္ထ မလီနံ သတ္ထမေဝ ဂဟိတန္တိ အာဟ ‘‘မလဂ္ဂဟိတသတ္ထ’’န္တိ. အာဏာပဝတ္တနန္တိ အပ္ပကေ ဝါ မဟန္တေ ဝါ ယတ္ထ ကတ္ထစိ အတ္တနော အာဏာယ ပဝတ္တနဝသေန ဝသနံ ဣဿရိယတ္တမိစ္ဆန္တိ. မဏိရတနမ္ပိ ဝိဿဇ္ဇနီယပက္ခိကတ္တာ ဥတ္တမံ ဘဏ္ဍံ နာမ န ဟောတိ၊ ဣတ္ထီ ပန ပရိစ္စတ္တကုလာစာရိတ္ထိကာယပိ အနိဿဇ္ဇနီယတာယ ဥတ္တမဘဏ္ဍံ နာမ. တေနာဟ ‘‘ဣတ္ထီ ဘဏ္ဍာနမုတ္တမ’’န္တိ. တေသံ တေသဉှိ ပုရိသာဇာနီယာနံ ဥပ္ပတ္တိဋ္ဌာနတာယ ဥတ္တမရတနာကရတ္တာ ဣတ္ထီ ဘဏ္ဍာနမုတ္တမံ. မလဂ္ဂဟိတသတ္ထသဒိသော အဝဗောဓကိစ္စဝိဗန္ဓနတော. သတ္ထမလံ ဝိယ သတ္ထဿ ပညာသတ္ထဿ ဂုဏာဘာဝကရဏတော ပညာသတ္ထမလံ. အဗ္ဗု ဝုစ္စတိ ဥပဒ္ဒဝံ၊ တံ ဒေတီတိ အဗ္ဗုဒံ၊ ဝိနာသကာရဏံ. နနု ဟရဏံ သမဏဿ အယုတ္တန္တိ? ယုတ္တံ. တဿ အနွယတော ဗျတိရေကတော စ ယုတ္တတံ ဒဿေန္တော ‘‘သလာကဘတ္တာဒီနီ’’တိအာဒိမာဟ.

ဣဿရိယသုတ္တဝဏ္ဏနာ နိဋ္ဌိတာ.