၈. ကာမသုတ္တဝဏ္ဏနာ

၇၈. ‘‘အတ္တကာမော’’တိ ပါဠိယံ ဝုတ္တတ္တာ အာဟ ‘‘ဌပေတွာ သဗ္ဗဗောဓိသတ္တေ’’တိ. တေ ဟိ သဗ္ဗသော ပရတ္ထာယ ဧဝ ပဋိပဇ္ဇမာနာ မဟာကာရုဏိကာ ပရတ္ထကာမာ၊ အတ္ထကာမာ နာမ န ဟောန္တိ၊ ယာ စ တေသံ အတ္တတ္ထာဝဟာ ပဋိပတ္တိ၊ သာပိ ယာဝဒေဝ ပရတ္ထာ ဧဝါတိ. ဝုတ္တံ ပေါရာဏဋ္ဌကထာယံ. ယသ္မာ ဗောဓိသတ္တာ ပရဟိတပဋိပတ္တိယာ ပါရမိယော ပူရေန္တာ တထာရူပံ ကာရဏံ ပတွာ အတ္တာနံ ပရေသံ ပရိစ္စဇန္တိ ပညာပါရမိယာ ပရိပူရဏတော၊ တသ္မာ ဣဓာပိ ‘‘သဗ္ဗဗောဓိသတ္တေ ဌပေတွာယေဝါတိ ဝုတ္တ’’န္တိ အာဟ. ကလျာဏန္တိ ဘဒ္ဒကံ. ဝါစာယ အဓိပ္ပေတတ္တာ အာဟ ‘‘သဏှံ မုဒုက’’န္တိ. ပါပိကန္တိ လာမကံ နိဟီနံ. တံ ပန ဖရုသံ ဝါစန္တိ သရူပတော ဒဿေတိ.

ကာမသုတ္တဝဏ္ဏနာ နိဋ္ဌိတာ.