၇. ဝနရောပသုတ္တဝဏ္ဏနာ

၄၇. ကေသန္တိ သာမိဝသေန ဝုတ္တကသဒ္ဒေါ ‘‘ဓမ္မဋ္ဌာ သီလသမ္ပန္နာ’’တိ ဧတ္ထ ပစ္စတ္တဗဟုဝစနဝသေန ပရိဏာမေတဗ္ဗော. အတ္ထဝသေန ဟိ ဝိဘတ္တိဝိပရိဏာမော. ကေ ဇနာတိ ဧတ္ထ ဝါ ဝုတ္တကေသဒ္ဒေါ သီဟဝိလောကနနယေန အာနေတွာ ယောဇေတဗ္ဗောတိ အာဟ ‘‘ကေ ဓမ္မဋ္ဌာ၊ ကေ သီလသမ္ပန္နာ’’တိ? ပုစ္ဆတီတိ ဣမိနာ တတ္ထ ကာရဏမာဟ. ဖလာဒိသမ္ပတ္တိယာ အာရမန္တိ ဧတ္ထ သတ္တာတိ အာရာမော. အာရာမေ ရောပေန္တိ နိပ္ဖါဒေန္တီတိ အာရာမရောပါ. ဝနီယတိ ဆာယာသမ္ပတ္တိယာ ဘဇီယတီတိ ဝနံ. တတ္ထ ယံ ဥပဝနလက္ခဏံ ဝနံ၊ တံ အာရာမဂ္ဂဟဏေနေဝ ဂဟိတန္တိ တပေါဝနလက္ခဏံ၊ တံ ဒဿေန္တော ‘‘သီမံ ပရိက္ခိပိတွာ’’တိအာဒိမာဟ. ဝိသမေတိ ဥဒကစိက္ခလ္လေန ဝိသမေ ပဒေသေ. ပါနီယံ ပိဝန္တိ ဧတ္ထာတိ ပပါ၊ တံ ပပံ. ဥဒကံ ပီယတိ ဧတ္ထာတိ ဝါ ပပါ. တဠာကာဒီတိ အာဒိ-သဒ္ဒေန မာတိကံ သင်္ဂဏှာတိ.

ဣမမတ္ထံ သန္ဓာယာတိ ဣမိနာ ကမ္မပ္ပထပ္ပတ္တံ ပဋိက္ခိပတိ. အတ္တနာ ကတဉှိ ပုညံ အနုဿရတော တံ အာရဗ္ဘ ဗဟုံ ပုညံ ပသဝတိ၊ န ပန ယထာ ကတံ ပုညံ သယမေဝ ပဝဍ္ဎတိ. တသ္မိံ ဓမ္မေ ဌိတတ္တာတိ တသ္မိံ အာရာမရောပနာဒိဓမ္မေ ပတိဋ္ဌိတတ္တာ. တေနပိ သီလေန သမ္ပန္နတ္တာတိ တေန ယထာဝုတ္တဓမ္မေ ကတသီလေ ဌတွာ စိဏ္ဏေန တဒညေနပိ ကာယဝါစသိကသံဝရလက္ခဏေန သီလေန သမန္နာဂတတ္တာ. ဒသ ကုသလာ ဓမ္မာ ပူရေန္တိ ဒုစ္စရိတပရိဝဇ္ဇနတော. သေသံ ဝုတ္တနယမေဝ.

ဝနရောပသုတ္တဝဏ္ဏနာ နိဋ္ဌိတာ.