၂. နိမောက္ခသုတ္တဝဏ္ဏနာ

၂. ပဌမမာဂတန္တိ သံဝဏ္ဏနာဝသေန ပဌမသုတ္တာဒီသု ပဌမံ အာဂတပဒံ. ဥတ္တာနတ္ထန္တိ ပါကဋတ္ထံ. အပုဗ္ဗံယေဝ ဟိ ဒုဝိညေယျတ္ထဉ္စ ပဒံ သံဝဏ္ဏေတဗ္ဗံ. နောတိ ပုစ္ဆာယံ နု-သဒ္ဒေန သမာနတ္ထော နိပါတောတိ အာဟ ‘‘ဇာနာသိ နောတိ ဇာနာသိ နူ’’တိ. ဝဋ္ဋတော နိမုစ္စန္တိ တေန သတ္တာတိ နိမောက္ခော၊ မဂ္ဂေါ. သော စ ပမုစ္စန္တိ တေနာတိ ပမောက္ခော၊ ပမုစ္စနန္တေ ပန အဓိဂန္တဗ္ဗတ္တာဖလံ ‘‘ပမောက္ခော’’တိ ဝုတ္တံ၊ ယထာ အရဟတ္တံ ‘‘ရာဂက္ခယော ဒေါသက္ခယော မောဟက္ခယော’’တိ ဝုတ္တံ. တေတိ သတ္တာ. ဝိဝိစ္စတီတိ ဝိသုံ အသမ္မိဿော ဟောတိ၊ ဝိဂစ္ဆတီတိ အတ္ထော. ဝိဝိစ္စတိ ဒုက္ခံ ဧတသ္မာတိ ဝိဝေကော. ဒုတိယဝိကပ္ပေ ပန သကလဝဋ္ဋဒုက္ခတော သတ္တာ နိမုစ္စန္တိ ဧတ္ထ ပမုစ္စန္တိ ဝိဝိစ္စန္တိ စာတိ နိမောက္ခော ပမောက္ခော ဝိဝေကော၊ နိဗ္ဗာနန္တိ အတ္ထော ဝေဒိတဗ္ဗော. ဧတ္ထာတိ စ နိမိတ္တတ္ထေ ဘုမ္မဝစနံ ဒဋ္ဌဗ္ဗံ. အဝဓာရဏတ္ထော ခေါ-ကာရော ‘‘အဿောသိ ခေါ’’တိအာဒီသု ဝိယ.

နန္ဒီမူလကော ဘဝေါ နန္ဒီဘဝေါ ပုရိမပဒေ ဥတ္တရပဒလောပေန ‘‘သာကဘက္ခော ပတ္ထဝေါ သာကပတ္ထဝေါ’’တိ ယထာ. ပဌမံ ကမ္မဝဋ္ဋပဓာနံ အတ္ထံ ဝတွာ ပုန ကိလေသကမ္မာနံ ဝသေန ဥဘယပ္ပဓာနံ အတ္ထံ ဝဒန္တော ‘‘နန္ဒိယာ စာ’’တိအာဒိမာဟ. ပုရိမနယေတိ နန္ဒီမူလကော ကမ္မဘဝေါ နန္ဒီဘဝေါတိ ဧတသ္မိံ ပက္ခေ. နန္ဒီဘဝေနာတိ နန္ဒီဘဝပဒေန. တိဝိဓကမ္မာဘိသင်္ခါရဝသေနာတိ ပုညာဘိသင်္ခါရာဒိဝသေန ကာယသင်္ခါရာဒိဝသေန စ တိပ္ပကာရဿ ကမ္မာဘိသင်္ခါရဿ ဝသေန. သင်္ခါရက္ခန္ဓော ဂဟိတော စေတနာပဓာနတ္တာ သင်္ခါရက္ခန္ဓဿ. သညာဝိညာဏေဟီတိ ‘‘သညာဝိညာဏသင်္ခယာ’’တိ ဧဝံ ဝုတ္တသညာဝိညာဏပဒေဟိ. တံသမ္ပယုတ္တာ စာတိ တေန ယထာဝုတ္တသင်္ခါရက္ခန္ဓေန သမံ ယုတ္တာ ဧဝ. ဒွေ ခန္ဓာတိ သညာဝိညာဏက္ခန္ဓာ.

နနု ဧတ္ထ ဝေဒနာက္ခန္ဓော န ဂဟိတောတိ? နော န ဂဟိတောတိ ဒဿေန္တော ‘‘တေဟိ ပနာ’’တိအာဒိမာဟ. တီဟိ ခန္ဓေဟီတိ သညာသင်္ခါရဝိညာဏက္ခန္ဓေဟိ. ဂဟိတာဝ အဝိနာဘာဝတော. န ဟိ ဝေဒနာရဟိတော ကောစိ စိတ္တုပ္ပါဒေါ အတ္ထိ. အနုပါဒိဏ္ဏကာနန္တိ ကုသလာကုသလာနံ. န ဟေတ္ထ ကိရိယာခန္ဓာနံ အပ္ပဝတ္တိ အဓိပ္ပေတာ. အပ္ပဝတ္တိဝသေနာတိ အနုပ္ပတ္တိဓမ္မတာပတ္တိဝသေန. နိဗ္ဗတ္တနဝသေန ကမ္မကိလေသေဟိ ဥပါဒီယတီတိ ဥပါဒိ၊ ပဉ္စက္ခန္ဓာ. ဥပါဒိနော သေသော ဥပါဒိသေသော၊ သဟ ဥပါဒိသေသေနာတိ သဥပါဒိသေသံ. နိဗ္ဗာနံ ကထိတံ သကလကမ္မကိလေသဝူပသမတ္ထဿ ဇောတိတတ္တာ. ဟေဋ္ဌာ ဒွီဟိ ပဒေဟိ အနုပါဒိဏ္ဏကက္ခန္ဓာ ဂဟိတာတိ ‘‘ဝေဒနာန’’န္တိ ဧတ္ထ ဥပါဒိဏ္ဏကဂ္ဂဟဏံ ယုတ္တန္တိ အာဟ ‘‘ဥပါဒိဏ္ဏကဝေဒနာန’’န္တိ. နိရောဓေနာတိ တပ္ပဋိဗဒ္ဓဆန္ဒရာဂနိရောဓဝသေန နိရုဇ္ဈနေန. ဥပသမေနာတိ အစ္စန္တူပသမေန အပ္ပဝတ္တနေန. ဧဝဉ္စ ကတွာ စ-သဒ္ဒဂ္ဂဟဏံ သမတ္ထိတံ ဟောတိ. တေသန္တိ တဿာ ဝေဒနာယ တံသမ္ပယုတ္တာနဉ္စ တိဏ္ဏံ ခန္ဓာနံ. ဝတ္ထာရမ္မဏဝသေနာတိ ဝတ္ထုဘူတာနံ ဆန္နံ အာရမ္မဏဘူတာနဉ္စ သဗ္ဗေသမ္ပိ ဥပါဒိဏ္ဏကရူပဓမ္မာနံ ဝသေန.

ကသ္မာ ပန ဟေဋ္ဌာ စတ္တာရော အရူပက္ခန္ဓာယေဝ ဝုတ္တာ၊ ရူပက္ခန္ဓော န ဂဟိတောတိ? ဝိသေသဘာဝတော. သဥပါဒိသေသနိဗ္ဗာနပ္ပတ္တိယဉှိ ဥပါဒိဏ္ဏကရူပဓမ္မာနံ ဝိယ အနုပါဒိဏ္ဏကရူပဓမ္မာနံ အပ္ပဝတ္တိယေဝ နတ္ထိ. ဒုတိယနယေတိ နန္ဒိယာ စ ဘဝဿ စာတိ ဧတမှိ ပက္ခေ. နန္ဒိဂ္ဂဟဏေန သင်္ခါရက္ခန္ဓော ဂဟိတော တံသဟစရဏတော. ဥပပတ္တိဘဝသင်္ခါတော ရူပက္ခန္ဓောတိ ဥပါဒိဏ္ဏကရူပဓမ္မမေဝ ဝဒတိ. တဂ္ဂဟဏေနေဝ စ တန္နိမိတ္တကာနိ ဥတုအာဟာရဇာနိ၊ ဝိညာဏဂ္ဂဟဏေန စိတ္တဇာနီတိ စတုသန္တတိရူပဿပေတ္ထ ဂဟိတတာ ဝေဒိတဗ္ဗာ. သညာဒီဟီတိ သညာဝိညာဏဝေဒနာဂဟဏေဟိ တယော ခန္ဓာ ဂဟိတာ၊ တဉ္စ ခေါ ဥပါဒိဏ္ဏာ အနုပါဒိဏ္ဏာတိ ဝိဘာဂံ အကတွာ အဝိသေသတော. အဝိသေသေန ဟိ ပဉ္စန္နံ ခန္ဓာနံ အပ္ပဝတ္တိ နိဗ္ဗာနံ. တေနာဟ ‘‘ဧဝံ။ပေ။ နိဗ္ဗာနံ ကထိတံ ဟောတီ’’တိ. ‘‘နိဗ္ဗာန’’န္တိ ဟိ ဣဓ အမတမဟာနိဗ္ဗာနံ အဓိပ္ပေတံ. ဣမမေဝ စ နယန္တိ ဣဒံ ယထာဝုတ္တံ ဒုတိယမေဝ. စတ္တာရော မဟာနိကာယေ ဓာရေတီတိ စတုနိကာယိကော. ဘဏ္ဍိကနာမကော ထေရော ဘဏ္ဍိကတ္ထေရော. ဣတီတိ ဝုတ္တပ္ပကာရပရာမသနံ. နိဗ္ဗာနဝသေနေဝါတိ ပဌမနယေ သဥပါဒိသေသနိဗ္ဗာနဿ အနုပါဒိသေသနိဗ္ဗာနဿ စ၊ ဒုတိယေ ပန ‘‘အမတမဟာနိဗ္ဗာနဿာ’’တိ သဗ္ဗထာပိ နိဗ္ဗာနဿေဝ ဝသေန ဘဂဝါ ဒေသနံ နိဋ္ဌပေသိ သမာပေသီတိ.

နိမောက္ခသုတ္တဝဏ္ဏနာ နိဋ္ဌိတာ.