၃. ပဗ္ဗာဇနီယကမ္မကထာ

၂၇. ဧတ္ထာတိ အဿဇိပုနဗ္ဗသုကဝတ္ထုမှိ. ကာယိကောတိ ဧတ္ထ ကာယေန ကီဠတီတိ ကာယိကောတိ ဝစနတ္ထံ ဒဿေန္တော အာဟ ‘‘ကာယကီဠာ ဝုစ္စတီ’’တိ. ‘‘ဧသေဝ နယော’’တိ ဣမိနာ ဝါစာယ ကီဠတီတိ ဝါစသိကော၊ ကာယိကော စ ဝါစသိကော စ ကာယိကဝါစသိကောတိ ဝစနတ္ထံ အတိဒိသတိ. ဧတ္ထ စ ပစ္ဆိမဝစနတ္ထော သမာဟာရဒွန္ဒော၊ သမာဟာရဒွန္ဒေပိ ကတ္ထစိ ပုလ္လိင်္ဂမိစ္ဆန္တိ သဒ္ဒဝိဒူ ‘‘ဓမ္မဝိနယော’’တိအာဒီသု (ဝိဘ. အဋ္ဌ. ၅၀၉) ဝိယ. ကာယဒွါရပညတ္တသိက္ခာပဒံ ဝီတိက္ကမတီတိ ကာယိကောတိ ဝစနတ္ထံ ဒဿေန္တော အာဟ ‘‘ကာယဒွါရေ ပညတ္တသိက္ခာပဒဝီတိက္ကမော ဝုစ္စတီ’’တိ. ကာယေန ပညတ္တသိက္ခာပဒံ ဝီတိက္ကမေတီတိ ကာယိကောတိ ဝစနတ္ထောပိ ယုဇ္ဇတေဝ. ‘‘ဥပဟနနံ ဝုစ္စတီ’’တိ ဣမိနာ ဥပဟနနံ ဥပဃာတံ၊ တမေဝ ဥပဃာတိကန္တိ ဝစနတ္ထံ ဒဿေတိ. ‘‘နာသန’’န္တိ ဣမိနာ ဟနဓာတုယာ ဟိံသနတ္ထံ ဒဿေတိ. ပဋိက္ခိတ္တဝေဇ္ဇကမ္မာဒိဝသေန တေလပစနအရိဋ္ဌပစနာဒီနိ ကာယိကော မိစ္ဆာဇီဝေါ နာမာတိ ယောဇနာ. ဣမိနာ မိစ္ဆာဇီဝဿ သရူပံ ဒဿေတိ.