၂၃၄. ကဿပဂေါတ္တဘိက္ခုဝတ္ထုကထာ

၃၈၀. စမ္ပေယျက္ခန္ဓကေ ဂဂ္ဂရာယ ပေါက္ခရဏိယာတိ ဧတ္ထ ဂဂ္ဂရသဒ္ဒဿ နာမသဒ္ဒဘာဝံ ဒဿေန္တော အာဟ ‘‘ဂဂ္ဂရနာမိကာယ ဣတ္ထိယာ’’တိ. ဣမိနာ ဂဂ္ဂရသဒ္ဒေါ ဂဂ္ဂရဣတိ နာမံ ပဝတ္တိနိမိတ္တံ ကတွာ ဣတ္ထိဒဗ္ဗံ ဝဒတီတိ ဒဿေတိ. တန္တိပဋိဗဒ္ဓေါတိ တန္တိယာ ပဋိဗဒ္ဓေါ. ‘‘ဥဿုက္ကမ္ပိ အကာသိ ယာဂုယာ’’တိအာဒီသု ဧဝံ ဝိနိစ္ဆယော ဝေဒိတဗ္ဗောတိ ယောဇနာ. တဿ ဘိက္ခုနောတိ ကဿပဂေါတ္တနာမကဿ တဿ ဘိက္ခုနော. တတ္ထေဝါတိ ဝါသဘဂါမေယေဝ.

၃၈၂. အဓမ္မေန ဝဂ္ဂကမ္မံ ကရောန္တီတိအာဒီနံ နာနာကရဏန္တိ သမ္ဗန္ဓော.