၂၃၀. သံဃေ ဘိန္နေ စီဝရုပ္ပါဒကထာ

၃၇၆. သံဃော ဘိဇ္ဇတီတိ ဧတ္ထ ဒွိကောဋ္ဌာသဝသေန ဘိဇ္ဇနမေဝါဓိပ္ပေတံ၊ န အညန္တိ အာဟ ‘‘ဒွေ ကောဋ္ဌာသာ’’တိ. ဧကသ္မိံ ပက္ခေ စီဝရာနိ ဒေန္တီတိ ယောဇနာ. ဒွိပက္ခံ သန္ဓာယ ‘‘သကလဿ သံဃဿာ’’တိ ဝုတ္တံ. ဧတန္တိ စီဝရံ. တဿေဝ စီဝရန္တိ တဿ ကောဋ္ဌာသဿ စီဝရမေဝ. ယတ္ထာတိ ယသ္မိံ ဒေသေ. ဒက္ခိဏောဒကံ ပမာဏန္တိ ဒက္ခိဏောဒကမေဝ ပမာဏံ၊ န ဒေယျဓမ္မော. တသ္မာ ဒက္ခိဏောဒကံ ပဋိဂ္ဂဏှန္တာ၊ ဒေယျဓမ္မဿ သာမိနော ဟောန္တီတိ အဓိပ္ပါယော. ဥဘောဟိပိ ပက္ခေဟီတိ ယောဇနာ. ပရသမုဒ္ဒေတိ ဇမ္ဗုဒီပေ. သော ဟိ သီဟဠဒီပတော သမုဒ္ဒဿ ပါရတ္တာ ပရသမုဒ္ဒေါတိ ဝုစ္စတိ. ဣတရော ပက္ခောတိ ဒက္ခိဏောဒကဿ စ စီဝရဿ စ လဒ္ဓပက္ခတော ဣတရော အလဒ္ဓေါ ပက္ခော.