၁၈၀. မေဏ္ဍကဂဟပတိဝတ္ထုကထာ

၂၉၆. ‘‘ဗဟိဒွါရေ’’တိ ဧတ္ထ ကဿ ဗဟိဒွါရေတိ အာဟ ‘‘ဓညာဂါရဿ ဗဟိဒွါရေ’’တိ. အာဠကထာလိကန္တိ ဧတ္ထ အာဠကတဏ္ဍုလပစနကံ ဂဏှကထာလိ အာဠကထာလိ၊ တာယ ပစိတံ ဘတ္တံ အာဠကထာလိကန္တိ ဝစနတ္ထံ ဒဿေန္တော အာဟ ‘‘အာဠကတဏ္ဍုလပစနကထာလိက’’န္တိ. ဗျဉ္ဇနဘဏ္ဍိကန္တိ ဗျဉ္ဇနပရိက္ခာရိကံ၊ ဗျဉ္ဇနပရိဝါရကန္တိ အတ္ထော. ဣမိနာ သူပဘိဉ္ဇနကန္တိ ဧတ္ထ သူပသဒ္ဒေါ ဗျဉ္ဇနဝါစကော၊ ဘိဉ္ဇနကသဒ္ဒေါ ဘဏ္ဍိကပရိယာယောတိ ဒဿေတိ. ဒါသကမ္မကရပေါရိသန္တိ ဧတ္ထ ဒါသပေါရိသာ စ ကမ္မကရပေါရိသာ စ ဒါသကမ္မကရပေါရိသံ၊ သမာဟာရဒွန္ဒော ပုဗ္ဗပဒေ ဥတ္တရလောပေါ၊ ဣတိ ဣမမတ္ထံ ဒဿေန္တော အာဟ ‘‘ဒါသပုရိသေ စ ကမ္မကရပုရိသေ စာ’’တိ. ပေါရိသသဒ္ဒေါပိ ပုရိသသဒ္ဒေန သမာနော ‘‘ပုရိသော ဧဝ ပေါရိသော’’တိ အတ္ထေန. ဓုဝဘတ္တေနာတိ ဧတ္ထ ဓုဝသဒ္ဒေါ နိစ္စပရိယာယောတိ အာဟ ‘‘နိစ္စကာလ’’န္တိ. ဒုယှေန ခီရေနာတိ သမ္ဗန္ဓော. ‘‘မေဏ္ဍကဝတ္ထုသ္မိံ ပနာ’’တိ ပါဌတော ပဋ္ဌာယ ယာဝ ‘‘ခဏညေဝ ဒုယှေနာ’’တိ ပါဌာ ကေသုစိယေဝ အဋ္ဌကထာပေါတ္ထကေသု အတ္ထိ. ဧတ္ထာတိ မေဏ္ဍကဝတ္ထုမှိ. ဂေါရသေတိ ဂဝယေဟိ နိဗ္ဗတ္တေ ခီရဒဓိတက္ကနဝနီတသဗ္ဗိသင်္ခါတေ ရသေ. ပါထေယျန္တိ ပထဿ ဟိတံ ပါထေယျံ. ဉတွာတိ ပါထေယျမိစ္ဆတီတိ ဉတွာ. ဘိက္ခာစာရဝတ္တေန ဝါတိ အညာတကအပဝါရိတဋ္ဌာနတော ဘိက္ခာစာရဝတ္တေန ဝါ. ယာစိတွာပီတိ ပိသဒ္ဒေါ ပဂေဝ ဘိက္ခာစာရဝတ္တေနာတိ ဒဿေတိ. ယတ္တကေန ပါထေယျေနာတိ သမ္ဗန္ဓော.