၁၅၁. အဇ္ဈာရာမေ ဥပါဟနပဋိက္ခေပကထာ

၂၄၈. ‘‘ယေန သိပ္ပေနာ’’တိအာဒိနာ အဘိ အဓိကံ ဇီဝန္တိ အနေနာတိ အဘိဇီဝနံ၊ ကိံတံ? သိပ္ပန္တိ အတ္ထံ ဒဿေတိ. တဿာတိ သိပ္ပဿ. ဣဓာတိ ဣမသ္မိံ သာသနေ. ယံသဒ္ဒေါ ဝစနဝိပလ္လာသောတိ အာဟ ‘‘ယေ တုမှေ’’တိ. ဟီတိ သစ္စံ. ယံနိပါတောတိ ယံဣတိ နိပါတော ယဒိသဒ္ဒဿ အတ္ထေ ပဝတ္တတီတိ ယောဇနာ. အာစရိယာ ဧဝါတိ ဧဝသဒ္ဒေန အာစရိယမတ္တဘာဝံ ပဋိက္ခိပတိ. ဟီတိ သစ္စံ. သောတိ အဝဿိကော. တန္တိ ဆဗ္ဗဿံ. နိဿာယ ဝစ္ဆတီတိ အဝဿိကဿ စတုဝဿကာလေ ဆဗ္ဗဿဿ ဒသဝဿိကတ္တာ တံ နိဿာယ ဝသတိ. ဥပဇ္ဈာယမတ္တံ ဒဿေန္တော အာဟ ‘‘ဥပဇ္ဈာယဿာ’’တိအာဒိ. မဟန္တတရာတိ အတ္တနော ဝုဍ္ဎတရာ. ဥပဇ္ဈာယဿ မတ္တံ ပမာဏမေတေသန္တိ ဥပဇ္ဈာယမတ္တာ.

၂၄၉. ပါဒတော နိက္ခန္တေန ခီလသဒိသေန မံသေန ပဝတ္တော အာဗာဓော ပါဒခီလာဗာဓောတိ ဝစနတ္ထံ ဒဿေန္တော အာဟ ‘‘ပါဒတော’’တိအာဒိ. ပါဒတော နိက္ခန္တန္တိ သမ္ဗန္ဓော.

၂၅၁. တိဏပါဒုကာတိအာဒီသု တိဏေန ကတာ ပါဒုကာ တိဏပါဒုကာတိ ဝစနတ္ထာဒိံ ဒဿေန္တော အာဟ ‘‘ယေန ကေနစိ တိဏေနာ’’တိအာဒိ. တံ သုဝိညေယျမေဝ. ‘‘ဘူမိယံ သုပ္ပတိဋ္ဌိတာတိ’’အာဒိနာ န သင်္ကမိတဗ္ဗာတိ အသင်္ကမနီယာတိ အတ္ထံ ဒဿေတိ.

၂၅၂. အင်္ဂဇာတေနေဝါတိ အတ္တနော အင်္ဂဇာတေန ဧဝ. အင်္ဂဇာတန္တိ ဂါဝီနံ အင်္ဂဇာတံ. ဩဂါဟေတွာတိ ဧတ္ထ ဩတျူပသဂ္ဂေါ ဒဠှတ္ထောတိ အာဟ ‘‘ဒဠှံ ဂဟေတွာ’’တိ.