၁၁၄. သံဃဘေဒေ အနာပတ္တိဝဿစ္ဆေဒကထာ

၂၀၂. ဘိန္နောတိ ဧတ္ထ တပစ္စယဿ အတီတတ္ထေ အယုတ္တဘာဝံ ဒဿေန္တော အာဟ ‘‘ဘိန္နေ သံဃေ ကရဏီယံ နတ္ထီ’’တိ. ယော ပနာတိ သံဃော ပန. ဣဒံ ‘‘ဘိဇ္ဇိဿတီ’’တိပဒေ ကတ္တာ၊ ‘‘အာသင်္ကိတော’’တိပဒေ ကမ္မံ. ‘‘ဘိဇ္ဇိဿတီ’’တိ ဣမိနာ ဘိန္နောတိ ဧတ္ထ တပစ္စယဿ အနာဂတတ္ထေ ပဝတ္တဘာဝံ ဒဿေတိ. ဘိက္ခုနီဟိ သံဃော ဘိန္နောတိ ဧတ္ထ ကိံ ဘိက္ခုနီဟိ သံဃော ဘိန္နောတိ ဒဋ္ဌဗ္ဗောတိ အာဟ ‘‘န ဘိက္ခုနီဟိ သံဃော ဘိန္နောတိ ဒဋ္ဌဗ္ဗော’’တိ. ဧတန္တိ ဘိက္ခုနီဟိ အဘိန္နဘာဝံ. ဧတာ ပနာတိ ဘိက္ခုနိယော ပန. တန္တိ သံဃံ. ဧတန္တိ ‘‘သမ္ဗဟုလာဟိ ဘိက္ခုနီဟိ သံဃော ဘိန္နော’’တိ ဝစနံ.