၁၁၂. ပဟိတေယေဝအနုဇာနနကထာ

၁၉၉. ဘိက္ခုဂတိကောတိ ဘိက္ခု ဧဝ ဂတိ ပတိဋ္ဌာ ဧတဿာတိ ဘိက္ခုဂတိကောတိ ဝုတ္တေ ဘိက္ခုနိဿိတကော ပုရိသောတိ အာဟ ‘‘ဘိက္ခူဟိ သဒ္ဓိံ ဝသနကပုရိသော’’တိ. ပလုဇ္ဇတီတိ ဝိနဿတိ. ဘဏ္ဍံ ဆေဒါပိတန္တိ ဧတ္ထ ဘဏ္ဍသဒ္ဒေါ ပရိက္ခာရတ္ထော ဧဝ၊ န မူလဓနတ္ထောတိ အာဟ ‘‘ဒဗ္ဗသမ္ဘာရဘဏ္ဍ’’န္တိ. ဆေဒါပိတန္တိ စုရာဒိဂဏိကဓာတုံ ‘‘ဆိန္ဒာပိတ’’န္တိ ရုဓာဒိဂဏိကဓာတုယာ ဝဏ္ဏေတိ. ဒဇ္ဇာဟန္တိ ဧကာရလောပသန္ဓီတိ အာဟ ‘‘ဒဇ္ဇေ အဟ’’န္တိ. ‘‘ဒဇ္ဇေဟ’’န္တိပိ ပါဌော. ဧဝဉှိ သတိ အကာရလောပသန္ဓိ. ဒဇ္ဇေတိ ဒဒေယျံ၊ ဒဒါမိ ဝါ. သံဃကရဏီယေနာတိ သံဃဿ ကာတဗ္ဗေန ကိစ္စေန. တမတ္ထံ ဒဿေန္တော အာဟ ‘‘ယံကိဉ္စီ’’တိအာဒိ. တတ္ထ ယံကိဉ္စိ ကာတဗ္ဗန္တိ ယောဇနာ. စေတိယဆတ္တဝေဒိကာဒီသူတိ စေတိယဿ ဆတ္တေ စ ဝေဒိကာယ စ. အာဒိသဒ္ဒေန သုဓာလိမ္ပာဒယော သင်္ဂဏှာတိ. တဿာတိ သံဃကရဏီယဿ. နိပ္ဖါဒနတ္ထံ ဂန္တဗ္ဗန္တိ သမ္ဗန္ဓော.

ဧတ္ထာတိ ဝဿူပနာယိကက္ခန္ဓကေ. ‘‘အနိမန္တိတေနာ’’တိ ပဒံ ‘‘ဂန္တု’’န္တိ ပဒေ ဘာဝကတ္တာ. ဂန္တုန္တိ ဂမိတုံ၊ ဂမနံ ဝါ ‘‘န ဝဋ္ဋတီ’’တိ ပဒေ ကတ္တာ. ပဌမံယေဝါတိ ဓမ္မဿဝနတော ပဌမမေဝ. သန္နိပတိတဗ္ဗံ ဣတိ ကတိကာ ကတာ ဟောတီတိ ယောဇနာ. ဘဏ္ဍကန္တိ စီဝရာဒိဘဏ္ဍကံ. ဂန္တုံ န ဝဋ္ဋတီတိ သယမေဝ ဂန္တုံ န ဝဋ္ဋတီတိ အတ္ထော ဒဋ္ဌဗ္ဗော. တေန ဝုတ္တံ ‘‘သစေ ပနာ’’တိအာဒိ. တတ္ထာတိ တံ ဝိဟာရံ. ‘‘ဝဋ္ဋတီ’’တိ ဣမိနာ ဝဿစ္ဆေဒေါ စ အာပတ္တိ စ န ဟောတီတိ ဒဿေတိ. အတ္ထာယပီတိ ပိသဒ္ဒေန ‘‘ဘဏ္ဍကံ ဓောဝိဿာမီ’’တိ အတ္ထံ အပေက္ခတိ. နန္တိ အန္တေဝါသိကံ. ဝဋ္ဋတီတိ အာစရိယဿ အာဏာယ သတ္တာဟေ အနတိက္ကန္တေ ဝဋ္ဋတိ၊ ဝဿစ္ဆေဒေါ စ အာပတ္တိ စ န ဟောတိ. သတ္တာဟေ အတိက္ကန္တေ ဝဿစ္ဆေဒေါဝ ဟောတိ၊ န အာပတ္တီတိ အဓိပ္ပါယော.