၈၃. ပါတိမောက္ခုဒ္ဒေသကအဇ္ဈေသနာဒိကထာ

၁၅၅. နဝဝိဓဉ္စာတိ ဒိဝသဝသေန တိဝိဓံ၊ ကာရကဝသေန တိဝိဓံ၊ ကတ္တဗ္ဗာကာရဝသေန တိဝိဓဉ္စာတိ နဝကောဋ္ဌာသဉ္စ၊ နဝပကာရဉ္စ ဝါ. စတုဗ္ဗိဓန္တိ ‘‘အဓမ္မေန ဝဂ္ဂ’’န္တိအာဒိကံ စတုဗ္ဗိဓံ. ဒုဝိဓန္တိ ဘိက္ခုဘိက္ခုနီဝသေန ဒုဝိဓံ. နဝဝိဓန္တိ ဘိက္ခုပါတိမောက္ခေ ပဉ္စဝိဓံ၊ ဘိက္ခုနိပါတိမောက္ခေ စတုဗ္ဗိဓန္တိ နဝဝိဓံ. ဧတ္ထာတိ ‘‘ယော တတ္ထ ဘိက္ခု ဗျတ္တော ပဋိဗလော’’တိ ပါဌေ. သုဝိသဒါတိ သုဋ္ဌု ဗျတ္တာ၊ သုဒ္ဓါ ဝါ. ဧတ္တကမ္ပီတိ ပိသဒ္ဒေါ ဂရဟာယံ၊ အဓိကေ ကာ နာမ ကထာတိ ဒဿေတိ.

သာမန္တာ အာဝါသာတိ ဧတ္ထ ဥပယောဂတ္ထေ နိဿက္ကဝစနန္တိ အာဟ ‘‘သာမန္တံ အာဝါသ’’န္တိ. ယော သက္ကောတီတိ ဗဟူသု နဝေသု ယော သက္ကောတိ.