၇၆. ဂါမသီမာဒိကထာ

၁၄၇. ဥပေါသထကမ္မဿ ဝိသုံ ဂဟိတတ္တာ သေသကမ္မဝသေန သမာနသံဝါသကတာ ဂဟေတဗ္ဗာ ဂေါဗလိဗဒ္ဒနယေန ဝါ ပါရိသေသနယေန ဝါ. တန္တိ သမာနသံဝါသဧကူပေါသထဘာဝံ. ‘‘အပရိစ္ဆိန္နာယာ’’တိ ဣမိနာ အဋ္ဌပိတာယာတိ ဧတ္ထ ဌပဓာတုယာ အဓိပ္ပါယတ္ထံ ဒဿေတိ. ဂါမံ ဝါ နိဂမံ ဝါတိ ဧတ္ထ နဂရံ ကေန သင်္ဂဟိတန္တိ အာဟ ‘‘ဂါမဂ္ဂဟဏေန စေတ္ထာ’’တိအာဒိ. တတ္ထ ဧတ္ထာတိ ‘‘ဂါမံ ဝါ နိဂမံ ဝါ’’တိ ပါဌေ၊ ဂါမဂ္ဂဟဏေနာတိ သမ္ဗန္ဓော. အထ ဝါ ဧတ္ထာတိ ဂါမနိဂမနဂရေသု၊ နဂရမ္ပီတိ သမ္ဗန္ဓော. ဂါမာဒီနံ ပရိစ္ဆေဒံ ဝိတ္ထာရေန ဒဿေန္တော အာဟ ‘‘တတ္ထာ’’တိအာဒိ. တတ္ထ တတ္ထာတိ ဂါမနိဂမနဂရေသု. ဂါမဘောဇကာတိ ဂါမံ ဘုဉ္ဇန္တီတိ ဂါမဘောဇကာ. ဗလိန္တိ ကရံ. သော ဟိ တံ နိဿာယ ဂါမဘောဇကာ ဗလန္တိ ဇီဝန္တိ အနေနာတိ ဗလီတိ ဝုစ္စတိ. ယမ္ပိ ဧကံ ပဒေသံ ပရိစ္ဆိန္ဒိတွာ ဒေတီတိ ယောဇနာ. ဂါမခေတ္တေတိ ရညော အာဏာ ခိပိယတိ ဧတ္ထာတိ ခေတ္တံ၊ ဂါမောယေဝ ခေတ္တံ ဂါမခေတ္တံ၊ တသ္မိံ. အယမ္ပီတိ အယံ ပဒေသောပိ. သောပီတိ ပဒေသောပိ. ဝိသုံဂါမော နာမာတိ ယောဇနာ. သောပိ ဝိသုံဂါမော ဂါမသီမာ ဟောတိယေဝါတိ ယောဇနာ. ဝိသုံ ပရိစ္ဆိန္ဒိတွာ ဒိန္နော ဂါမော ဝိသုံဂါမော. တသ္မာတိ ယသ္မာ ဝိသုံ ဂါမော ဟောတိ၊ တသ္မာ. သာ စာတိ ဝိသုံဂါမသီမာ စ. ဣတရာတိ ဝိသုံဂါမသီမတော အညာ ပကတိဂါမနဂရနိဂမသီမာ စာတိ ယောဇနာ.

ဧဝန္တိ ‘‘အသမ္မတာယ ဘိက္ခဝေ’’တိအာဒိနာ ပါဌေန. တန္တိ သီမပရိစ္ဆေဒံ. အပရိစ္ဆိန္နေတိ ရာဇူဟိ အပရိစ္ဆိန္နေ. ‘‘အဋဝိပဒေသေ’’တိ ဣမိနာ နတ္ထိ ဂါမော ဧတ္ထာတိ အဂါမကောတိ ဝစနတ္ထဿ သရူပံ ဒဿေတိ. ဝိဇ္ဈာဋဝိသဒိသေတိ ဝိဂတံ အဂ္ဂိနော ဈာယနမေတ္ထာတိ ဝိဇ္ဈာ၊ စောရာဒယော မနုဿေ အာဘုသော ဋဝန္တိ ပီဠယန္တိ ဧတ္ထာတိ အာဋဝိ. ဝိဇ္ဈာ စ သာ အာဋဝိ စေတိ ဝိဇ္ဈာဋဝိ၊ တာယ သဒိသေ ဝိဇ္ဈာဋဝိသဒိသေ. ဧတ္ထ ပုရိမနယေ ဂါမာဒီဟိ အာသန္နော ဝါ ဟောတု၊ အနာသန္နော ဝါ တေဟိ အပရိစ္ဆိန္နော အဋဝိပဒေသော ဂဟေတဗ္ဗော. ပစ္ဆိမနယေ ဒူရော မနုဿာနံ အနာဂမနပထော အာဋဝိပဒေသော ဂဟေတဗ္ဗောတိ အယမေတေသံ ဝိသေသော. အဿာတိ ဘိက္ခုနော. သမန္တာတိ သမန္တတော. အယံ သီမာတိ အယံ သတ္တဗ္ဘန္တရသီမာ. တတ္ထာတိ သတ္တသု အဗ္ဘန္တရေသု. သမန္တာ ဌိတဿ ဝါ နိသိန္နဿ ဝါ အဗ္ဘန္တရေ အန္တောကောဋ္ဌာသေ ဇာတံ အဗ္ဘန္တရံ အဋ္ဌဝီသဟတ္ထပမာဏံ.

ယာ ကာစိ နဒီ အသီမာဝ ဟောတီတိ သမ္ဗန္ဓော. နဒီသီမလက္ခဏပတ္တာတိ နဒီသီမလက္ခဏံ ပတ္တာ. ဣမိနာ သီမလက္ခဏံ အပတ္တာ နဒီ ဗန္ဓိယမာနာ သီမာဝ ဟောတီတိ ဒဿေတိ. သာဝဓာရဏေန ‘‘အတ္တနော သဘာဝေနေဝါ’’တိ ဣမိနာ ဘိက္ခူနံ ဗန္ဓနဘာဝေနာတိ အတ္ထံ နိဝတ္တေတိ. ဧတ္ထာတိ နဒိယံ. ဧတ္ထာတိ ဇာတဿရသမုဒ္ဒေသု. ယေန ကေနစီတိ အန္တမသော တိရစ္ဆာနဂတေနပိ ယေန ကေနစိ. ခဏိတွာ အကတော သယံဇာတောတိ သမ္ဗန္ဓော. ဣဒံ ဟေတုအန္တောဂဓဝိသေသနံ. ခဏိတွာ အကတတ္တာတိ ဟိ အတ္ထော. သယံဇာတောတိ သယမေဝ ဇာတောတိ ဧဝကာရော ယောဇေတဗ္ဗော. တေန ဝုတ္တံ ‘‘ယေန ကေနစိ ခဏိတွာ အကတော’’တိ. သောဗ္ဘောတိ သံ ဥဘောတိ ပဒဝိဘာဂေါ ကာတဗ္ဗော. တတ္ထ သံသဒ္ဒေါ သမန္တတ္ထဝါစကော၊ ဥဘသဒ္ဒေါ ပူရဏတ္ထဝါစကော. တသ္မာ သမန္တတော အာဂတေန ဥဒကေန ဥဘတိ ပူရတိ ဧတ္ထာတိ သောဗ္ဘောတိ ဝစနတ္ထော ကာတဗ္ဗော. တေန ဝုတ္တံ ‘‘သမန္တတော အာဂတေန ဥဒကေန ပူရိတော တိဋ္ဌတီ’’တိ.

တတ္ထာတိ နဒီသမုဒ္ဒဇာတဿရေသု၊ အာဓာရေ ဘုမ္မံ. ယံသဒ္ဒေါ ဌာနဝိသယောတိ အာဟ ‘‘ယံ ဌာန’’န္တိ. မဇ္ဈိမဿာတိ ထာမမဇ္ဈိမဿ. ဝက္ခတိ ဟိ ‘‘ထာမမဇ္ဈိမေနာ’’တိ. ‘‘သမန္တတော’’တိ ဣမိနာ သမန္တာတိ ဧတ္ထ နိဿက္ကတ္ထေ နိဿက္ကဝစနန္တိ ဒဿေတိ. ‘‘ဥဒကုက္ခေပေနာ’’တိ ဣမိနာ ဥဒကုက္ခေပါတိ ဧတ္ထ ကရဏတ္ထေ နိဿက္ကဝစနန္တိ ဒဿေတိ. ဥဒကံ ဥက္ခိပိတွာ ခိပိယတိ ဧတ္ထာတိ ဥဒကုက္ခေပေါ. ‘‘ပရိစ္ဆိန္န’’န္တိ ဣမိနာ ပါဌသေသံ ဒဿေတိ. အက္ခဓုတ္တာတိ ဧတ္ထ အက္ခောတိ ပါသကော. သော ဟိ အကတိ ကုဋိလံ ဂစ္ဆတိ အနေနာတိ အက္ခောတိ ဝုစ္စတိ၊ ဓဝန္တိ မရိယာဒမတိက္ကမ္မ ကီဠာဒိပသုတံ ဂစ္ဆန္တီတိ ဓုတ္တာ၊ အက္ခေသု ဓုတ္တာ အက္ခဓုတ္တာ. ဒါရုဂုဠန္တိ သာရဒါရုမယံ ဂုဠံ. ‘‘ဝါလုကံ ဝါ’’တိ ဣမိနာ ‘‘ဥဒကုက္ခေပါ’’တိ ဧတ္ထ ဥပလက္ခဏံ ဒဿေတိ. ယတ္ထာတိ ယသ္မိံ ပဒေသေ. အယန္တိ ပဒေသော. တဿာတိ ဥဒကုက္ခေပဿ.

ဧတ္ထာတိ နဒီသမုဒ္ဒဇာတဿရေသု. မုခဒွါရန္တိ သမုဒ္ဒါဒီနံ မုခသင်္ခါတံ ဒွါရံ. သဗ္ဗတ္ထာတိ သဗ္ဗာယ နဒိယံ. ထေရဝါဒံ ဒဿေန္တော အာဟ ‘‘ယံ ပနာ’’တိအာဒိ. ‘‘ယောဇနံ။ပေ။ ဝဋ္ဋတီ’’တိ ယံ ပန ဝစနံ မဟာသုမတ္ထေရေန ဝုတ္တန္တိ ယောဇနာ. တတြာပီတိ ယောဇနနဒိယမ္ပိ. ပဋိက္ခိတ္တာကာရံ ဝိတ္ထာရေန္တော အာဟ ‘‘ဘဂဝတာ ဟီ’’တိအာဒိ. နဒိယာ ပမာဏန္တိ နဒိယာ ဂမ္ဘီရပမာဏမေဝ၊ န အာယာမဝိတ္ထာရပမာဏန္တိ အတ္ထော. ‘‘န ယောဇနံ ဝါ အဒ္ဓယောဇနံ ဝါ’’တိ ဝစနမ္ပိ ဣဒမေဝ သန္ဓာယ ဝုတ္တန္တိ ဒဋ္ဌဗ္ဗံ. ကိဉ္စာပိ အာယာမဝိတ္ထာရပမာဏံ န ဝုတ္တံ၊ ပဘဝတော ပန ယာဝ မုခဒွါရာ အာယာမဝိတ္ထာရဝသေန ကမ္မံ ကာတုံ ပဟောနကနဒီယေဝ ဂဟေတဗ္ဗာတိ ဒဋ္ဌဗ္ဗာ. ယာ နဒီတိ သမ္ဗန္ဓော. ဣမဿ သုတ္တဿာတိ ‘‘တိမဏ္ဍလ’’န္တိအာဒိကဿ ဣမဿ သုတ္တဿ. ပဘဝတောတိ သမုဒါဂမတော. ဧတ္ထာတိ နဒိယံ. သဗ္ဗေဟိ ဘိက္ခူဟိ ဌပေတဗ္ဗောတိ သမ္ဗန္ဓော. တတောတိ ဧကဥဒကုက္ခေပတော.

ကိတ္တကာ ပရိပုဏ္ဏာ ဟောတီတိ အာဟ ‘‘သမတိတ္ထိကာ’’တိ. တိတ္ထေန သမံ ပရိပူရတီတိ သမတိတ္ထိကာ. ဥဒကသာဋိကံ နိဝါသေတွာပီတိ ပိသဒ္ဒေါ ‘‘အနိဝါသေတွာပီ’’တိ ဒဿေတိ. ဥဒကသာဋိကံ အနိဝါသေန္တောပိ ဝတ္ထေန အဝိနာဘာဝတော အညံ နိဝါသေတွာတိ အတ္ထော ဂဟေတဗ္ဗော. နာဝါယ ဌတွာ ကရိယမာနေ ကိံ ဂစ္ဆန္တိယာပိ နာဝါယ ကာတုံ ဝဋ္ဋတီတိ အာဟ ‘‘ဂစ္ဆန္တိယာ ပနာ’’တိအာဒိ. ‘‘ကသ္မာ’’တိအာဒိနာ ကာရဏံ ဒဿေတိ. ဟီတိ ယသ္မာ. တန္တိ ဥဒကုက္ခေပမတ္တံ. ဧဝံ သတိ။ပေ။ အနုသာဝနာ ဟောတိ၊ တသ္မာ ဂစ္ဆန္တိယာ နာဝါယ ကာတုံ န ဝဋ္ဋတီတိ ယောဇနာ. ‘‘တသ္မာ’’တိအာဒိနာ လဒ္ဓဂုဏံ ဒဿေတိ. န ကေဝလံ နာဝါယမေဝါတိ ဒဿေန္တော အာဟ ‘‘အန္တောနဒိယ’’န္တိအာဒိ.

ရုက္ခဿာတိ အန္တောနဒိယံ ဇာတဿ ရုက္ခဿ. သာခါ ဝါ ပတိဋ္ဌိတာတိ သမ္ဗန္ဓော. သီမံ ဝါ သောဓေတွာတိ ဝိဟာရသီမဂါမသီမာသု ဌိတာနံ ဟတ္ထပါသာနယနဗဟိကရဏဝသေန သီမံ ဝါ သောဓေတွာ. ဇာတရုက္ခဿ ပဝိဋ္ဌသာခါယ ဝါ ပါရောဟေ ဝါတိ သမ္ဗန္ဓော. အဿာတိ ဗဟိနဒိတီရေ ဇာတရုက္ခဿ. တတ္ထာတိ ခါဏုကေ.

တဿာတိ ပါသာဏဒီပကဿ. ပုဗ္ဗေ ဝုတ္တပ္ပကာရေတိ ပုဗ္ဗေ နဒီနိမိတ္တဋ္ဌာနေ ‘‘အနွဒ္ဓမာသ’’န္တိအာဒိနာ (မဟာဝ. အဋ္ဌ. ၁၃၈) ဝုတ္တပ္ပကာရေ. သောတိ ပါသာဏဒီပကော. ပုန သောတိ ပါသာဏဒီပကောယေဝ. ဟီတိ သစ္စံ၊ ယသ္မာ ဝါ.

အာဝရဏန္တိ ပါဠိံ. တန္တိ အာဝရဏံ. အာဝရဏေန ဝါ ကောဋ္ဌကဗန္ဓေန ဝါ ဟေတုဘူတေန၊ ပစ္ဆိဇ္ဇတီတိ သမ္ဗန္ဓော. ကောစိ အာဝရဏပ္ပဒေသော အဇ္ဈောတ္ထရိယတီတိ သမ္ဗန္ဓော. တတ္ထာတိ အာဝရဏပ္ပဒေသေ. ဟီတိ သစ္စံ၊ ယသ္မာ ဝါ. ‘‘ဟေဋ္ဌာပါဠိ ဗဒ္ဓါ’’တိ ဣဒံ နဒိံ ဝိနာသေတွာ တဠာကကရဏာကာရဒဿနံ. ဧတ္ထာတိ နဒိယံ၊ တဠာကေ ဝါ. ဆဍ္ဍိတမောဒကန္တိ တဠာကရက္ခနတ္ထံ ဧကေန ဝါရိမဂ္ဂေန ဆဍ္ဍိတံ ဥဒကံ. ဒေဝေ အဝဿန္တေတိ ဒုဗ္ဗုဋ္ဌိကာလတ္တာ ဝဿန္တကာလေပိ ဒေဝေ အဝဿန္တေ. သာတိ နဒိတော နီဟဋမာတိကာ. ကာလန္တရေနာတိ အညေန ကာလေန. ဥပ္ပတိတွာတိ ဂါမနိဂမာနံ ဥပရိ ပတိတွာ. ပဝတ္တတီတိ ပုဗ္ဗေ ဝုတ္တပကာရေ ဝဿကာလေ စတ္တာရော မာသေ အဗ္ဘောစ္ဆိန္နာ သန္ဒတိ. ဝိဟာရသီမန္တိ ဝိဟာရသမ္ဗန္ဓံ ဗဒ္ဓသီမံ.

သမုဒ္ဒေပီတိ ပိသဒ္ဒေါ နဒိမပေက္ခတိ. တတ္ထာတိ ပဒေသေ. ဩတရိတွာတိ ဟေဋ္ဌာ တရိတွာ. ‘‘ဩသရိတွာ’’တိပိ ပါဌော၊ အယမေဝတ္ထော. သဏ္ဌဟန္တီတိ ဥဒကေန သမံ တိဋ္ဌန္တိ. သောတိ ပဒေသော. ဥဒကန္တတောတိ ဥဒကကောဋိတော. တတ္ထာတိ သမုဒ္ဒေ. ဗာဓတီတိ ပီဠယတိ. တေသူတိ နာဝါအဋ္ဋကေသု. တန္တိ ပိဋ္ဌိပါသာဏံ. ဦမိယောတိ ဝီစိယော. တာ ဟိ ပရံပရာဝသေန ဥဂ္ဂန္တွာ သဝိညာဏကာဝိညာဏကေ မိယန္တိ ဟိံသန္တိ၊ အန္တော ပက္ခိပန္တီတိ ဝါ ဦမိယောတိ ဝုစ္စန္တိ. တတ္ထာတိ ပိဋ္ဌိပါသာဏေ. ဟီတိ သစ္စံ၊ ယသ္မာ ဝါ. ဥဒကေနေဝ ပိဋ္ဌိပါသာဏော ဩတ္ထရီယတီတိ ယောဇနာ. သောတိ ဒီပကပဗ္ဗတော. ‘‘ဒူရေ’’တိ ဝတွာ တဿ ပမာဏံ ဒဿေန္တော အာဟ ‘‘မစ္ဆဝဓာနံ အနာဂမနပထေ’’တိ. မစ္ဆဝဓာနန္တိ ကေဝဋ္ဋာနံ. တေ ဟိ ယသ္မာ မစ္ဆေ ဟနန္တိ၊ တသ္မာ မစ္ဆဝဓာတိ ဝုစ္စန္တိ. ‘‘မစ္ဆဗန္ဓာန’’န္တိပိ ပါဌော. မစ္ဆေ ဗန္ဓန္တီတိ မစ္ဆဗန္ဓာတိ ဝစနတ္ထော ကာတဗ္ဗော. အနာဂမနပထေတိ ယတ္ထ ဂန္တွာ တဒဟေဝ ပစ္စာဂန္တွာ န အာဂမနပထိကေ ဒေသေ. နတ္ထိ အာဂမနပထော ဧတ္ထာတိ အနာဂမနပထော၊ ဒေသော. တသ္မိံ ‘‘အဂမနပထေ’’တိပိ ပါဌော၊ သော အယုတ္တော. ကသ္မာ? အဂမနပထဿ နာဓိပ္ပေတတ္တာ. ဂန္တွာ ဟိ ပုန အနာဂမနပထောယေဝါဓိပ္ပေတော. တေသန္တိ မစ္ဆဝဓာနံ. ဂမနပရိယန္တဿာတိ ဂမနကောဋိယာ. ဩရတောတိ ဩရဘာဂေ ဌိတော ဒီပကော ဝါ ပဗ္ဗတော ဝါတိ ယောဇေတဗ္ဗော. တတ္ထာတိ ဩရဘာဂေ ဌိတေသု ဒီပကပဗ္ဗတေသု. ဩတ္ထရိတွာတိ ပကတိဥဒကေန ဩတ္ထရိတွာ. တတ္ထာတိ ဩတ္ထရိတွာ ဌိတေ သမုဒ္ဒေ.

ကရောန္တေဟိပိ ကာတဗ္ဗန္တိ သမ္ဗန္ဓော. ယတ္ထာတိ ယသ္မိံ သရေ. အယန္တိ အယံ သရော၊ န ဇာတဿရော ဟောတိ. အယံ သရော ဂါမခေတ္တသင်္ချမေဝ ဂစ္ဆတီတိ ယောဇနာ. တတ္ထာတိ သရေ. ယတ္ထ ပနာတိ ယသ္မိံ သရေ ပန. တဿာတိ ဇာတဿရဿ. တတ္ထာတိ ပဒေသေ. သစေ ဂမ္ဘီရံ ဥဒကံ ဟောတီတိ ယောဇနာ. တတ္ထာတိ အဋ္ဋကေ. ဧတ္ထာတိ ဇာတဿရေ၊ ဌိတေသု ပိဋ္ဌိပါသာဏဒီပကေသူတိ ယောဇနာ. ပဟောနကဇာတဿရောတိ သံဃကမ္မံ ကာတုံ ပဟောနကော ဇာတဿရော. ‘‘သုက္ခတီ’’တိ ဝတွာ တဒေဝ သမတ္ထေတုံ ဝုတ္တံ ‘‘နိရုဒကော’’တိ. တတ္ထာတိ ဇာတဿရေ. သစေ နိရုဒကမတ္တေန ဂါမခေတ္တံ ဂစ္ဆတိ. ကဒါ ဂစ္ဆတီတိ အာဟ ‘‘သစေ ပနေတ္ထာ’’တိအာဒိ. တတ္ထ ဧတ္ထာတိ ဇာတဿရေ. ပေါက္ခရဏီအာဒီနီတိ ဧတ္ထ အာဒိသဒ္ဒေန ဥဒကမာတိကာဒယော သင်္ဂဏှာတိ. ယဒါ ခဏန္တိ၊ တဒါတိ ပါဌသေသော ယောဇေတဗ္ဗော. ‘‘တံ ဌာန’’န္တိ ဝုတ္တေပိ န ခဏနဋ္ဌာနမေဝ ဂဟေတဗ္ဗံ၊ ‘‘ဧတ္ထာ’’တိ သာမညတော ဝုတ္တတ္တာ သဗ္ဗောယေဝ ဇာတဿရော ဂဟေတဗ္ဗော. န ကေဝလံ အဇာတဿရမတ္တံ ဟောတိ၊ အထ ခေါ ဂါမခေတ္တန္တိ အာဟ ‘‘ဂါမသီမာသင်္ချမေဝ ဂစ္ဆတီ’’တိ.

နန္တိ ဇာတဿရံ. ပူရေတွာတိ မတ္တိကာဒီဟိ ပူရေတွာ. ပါဠိန္တိ အာဝရဏံ. သဗ္ဗမေဝ နန္တိ သကလမေဝ တံ ဇာတဿရံ. လောဏီပီတိ ပိသဒ္ဒေန န ကေဝလံ သောဗ္ဘောယေဝ ဇာတဿရသင်္ချံ ဂစ္ဆတိ၊ အထ ခေါ လောဏီပီတိ ဒဿေတိ. ဥဒကဋ္ဌာနောကာသေတိ ဥဒကဿ ဌာနေ ဩကာသေ.

၁၄၈. သီမာယ သီမံ သမ္ဘိန္ဒန္တီတိ ဧတ္ထ ‘‘သီမာယ သီမ’’န္တိ ပဒါနံ သမ္ဗန္ဓာပေက္ခတ္တာ တေသံ သမ္ဗန္ဓံ ဒဿေတုံ ဝုတ္တံ ‘‘အတ္တနော ပရေသ’’န္တိ. ‘‘ဗဒ္ဓသီမ’’န္တိ ဣမိနာ ‘‘သီမ’’န္တိ သာမညတော ဝုတ္တေပိ ဝိသေသတော ဗဒ္ဓသီမာယေဝ ဂဟေတဗ္ဗာတိ ဒဿေတိ. တမေဝတ္ထံ ဝိတ္ထာရေန္တော အာဟ ‘‘သစေ ဟီ’’တိအာဒိ. သံသဋ္ဌဝိဋပါတိ အညမညံ အာသန္နတ္တာ သံသဋ္ဌော ဝိဋပေါ ဧတေသန္တိ သံသဋ္ဌဝိဋပါ. ‘‘သံသဋ္ဌဝိဋပါ’’တိ ဣဒံ ဥပလက္ခဏမတ္တံ၊ မူလာနိပိ သံသဋ္ဌာနိယေဝါတိ ဒဋ္ဌဗ္ဗံ. တေသူတိ ဒွီသု ရုက္ခေသု. ဝိဟာရသီမာ စာတိ ပေါရာဏကဝိဟာရသီမာ စ. အန္တော ကတွာတိ သီမာယ အန္တော ကတွာ. အထ ပစ္ဆာတိ ဧတ္ထ ‘‘ပစ္ဆာ’’တိ ဣမိနာ အထသဒ္ဒဿတ္ထံ ဒဿေတိ. ဧဝံ ကေ အကံသူတိ အာဟ ‘‘ဧဝံ ဆဗ္ဗဂ္ဂိယာ အကံသူ’’တိ. တေနာတိ ကရဏေန.

အဇ္ဈောတ္ထရဏာကာရံ ဒဿေန္တော အာဟ ‘‘ပရေသ’’န္တိအာဒိ. တဿာတိ ဗဒ္ဓသီမာယ. ပဒေသန္တိ ဘိက္ခူဟိ ကမ္မံ ကာတုံ ပဟောနကံ ဧကဒေသံ. အန္တမသော ဧကဿပိ ဘိက္ခုနော ဌတွာ အဓိဋ္ဌာနုပေါသထံ ကာတုံ ပဟောနကံ ပဒေသံ. ကမ္မံ ကာတုံ အပ္ပဟောနကပဒေသံ အန္တော ကရိတွာ ဗန္ဓန္တာ သီမာယ သီမံ သမ္ဘိန္ဒန္တိ နာမ. သီမာယ ဥပစာရောတိ ပစ္ဆာ ဗန္ဓိတဗ္ဗာယ သီမာယ ဥပစာရော. ‘‘ဝဍ္ဎန္တော သီမာသင်္ကရံ ကရောတီ’’တိ ဣမိနာ သစေ အဝဍ္ဎနကော ပါသာဏော ဟောတိ၊ ဒွိန္နမ္ပိ သီမာနံ နိမိတ္တံ ကာတုံ ဝဋ္ဋတီတိ ဒဿေတိ.