၁၀. ဒုတိယမာရကထာ

၃၅. မယှန္တိပဒဿ ‘‘အနုပ္ပတ္တာ သစ္ဆိကတာ’’တိပဒေသု ဆဋ္ဌီကတ္တုဘာဝံ ဒဿေန္တော အာဟ ‘‘မယာ ခေါတိ အတ္ထော’’တိ. ‘‘အထ ဝါ’’တိအာဒိနာ ‘‘မယှ’’န္တိပဒဿ ‘‘ယောနိသော မနသိကာရာ၊ ယောနိသော သမ္မပ္ပဓာနာ’’တိပဒေသု သမ္ဗန္ဓဘာဝံ ဒဿေတိ. ‘‘ယောနိသော မနသိကာရာ၊ ယောနိသော သမ္မပ္ပဓာနာ’’တိ ဧတ္ထ ကာရဏတ္ထေ နိဿက္ကဝစနန္တိ အာဟ ‘‘တေန ဟေတုနာ’’တိ. ‘‘ပုနာ’’တိအာဒိနာ ‘‘မယှ’’န္တိပဒံ ‘‘ယောနိသော မနသိကာရာ၊ ယောနိသော သမ္မပ္ပဓာနာ’’တိပဒေသု သာမျတ္ထေ သာမိဘာဝေန ယောဇေတွာ ပုန ‘‘အနုပ္ပတ္တာ၊ သစ္ဆိကတာ’’တိ ပဒေသု ကတ္တုတ္ထေ သာမိဘာဝေန ဝိဘတ္တိဝိပလ္လာသော ကာတဗ္ဗောတိ ဒဿေတိ.