၂၀. ပဏာမနာခမာပနာကထာ

၈၀. ယံ လက္ခဏံ ဝုတ္တန္တိ သမ္ဗန္ဓော. နိဿယန္တေဝါသိကေန ကာတဗ္ဗန္တိ ယောဇနာ. ပဗ္ဗဇ္ဇာဥပသမ္ပဒါဓမ္မန္တေဝါသိကေဟီတိ ပဗ္ဗဇ္ဇန္တေဝါသိကေန စ ဥပသမ္ပဒန္တေဝါသိကေန စ ဓမ္မန္တေဝါသိကေန စ. ဧတေသန္တိ ပဗ္ဗဇ္ဇာဥပသမ္ပဒါဓမ္မန္တေဝါသိကာနံ. ဧတေသူတိ ဧတေသု တီသု အန္တေဝါသိကေသု. အာစရိယဿာတိ ပဗ္ဗဇ္ဇန္တေဝါသိကော ပဗ္ဗဇ္ဇာစရိယဿ၊ ဥပသမ္ပဒန္တေဝါသိကော ဥပသမ္ပဒါစရိယဿာတိ အတ္ထော. သမီပေတိ နိဿယာစရိယဿ စ ဓမ္မာစရိယဿ စ အာသန္နေ. တသ္မာတိ ယသ္မာ အန္တေဝါသိကေန အာစရိယမှိ သမ္မာ ဝတ္တိတဗ္ဗံ၊ တသ္မာ. အာစရိယေနာပီတိ နိဿယပဗ္ဗဇ္ဇာ ဥပသမ္ပဒါ ဓမ္မာစရိယေနာပိ. ဩဝါဒါစရိယော တေသု သင်္ဂဟံ ဂစ္ဆတိ. တေသူတိ စတူသု အန္တေဝါသိကေသု.