၄. စတုတ္ထသိက္ခာပဒံ

၈၀၆. စတုတ္ထေ ရညော ဩရောဓာ ရာဇောရောဓာ၊ ပုရာဏေ ရာဇောရောဓာ ပုရာဏရာဇောရောဓာတိ ဝစနတ္ထံ ဒဿေန္တော အာဟ ‘‘ပုရာဏေ’’တိအာဒိ. ‘‘ဂိဟိဘာဝေ’’တိ ဣမိနာ ပုရာဏေတိ ဧတ္ထ ဏပစ္စယဿ သရူပံ ဒဿေတိ. စိရာစိရန္တိ နိပါတပဋိရူပကံ. တေန ဝုတ္တံ ‘‘စိရေန စိရေနာ’’တိ. ‘‘သက္ကောထာ’’တိ ဣမိနာ ကထံ တုမှေ ရာဂစိတ္တံ ပဋိဟနိတွာ အတ္တာနံ ဓာရေထ ဓာရေတုံ သက္ကောထာတိ အတ္ထံ ဒဿေတိ. အနာရောစိတေပီတိ ဘူတတော အနာရောစိတေပိ.

၈၀၇. ဇတုနာတိ လာခါယ. ပဋ္ဌဒဏ္ဍကေတိ ပဋုဘာဝေန ဌာတိ ပဝတ္တတီတိ ပဋ္ဌော၊ သောယေဝ ဒဏ္ဍော ပဋ္ဌဒဏ္ဍော၊ တဿ ပဝေသနံ ပဋ္ဌဒဏ္ဍကံ၊ တသ္မိံ နိမိတ္တဘူတေ. ဧတန္တိ ‘‘ဇတုမဋ္ဌကေ’’တိ ဧတံ ဝစနန္တိ. စတုတ္ထံ.