၉. နဝမသိက္ခာပဒံ

၁၁၅၈. နဝမေ အန္တောတိ အဗ္ဘန္တရေ. ဣမိနာ အာတျူပသဂ္ဂဿတ္ထံ ဒဿေတိ. ‘‘သောက’’န္တိအာဒိနာ အန္တော ဝါသေတိ ပဝေသေတီတိ အာဝါသာ. သောကံ အာဝါသာ သောကာဝါသာတိ ဝစနတ္ထံ ဒဿေတိ. ဃရံ ဃရသာမိကာ အာဝိသန္တိ ဝိယ၊ ဧဝံ အယမ္ပိ သောကံ အာဝိသတီတိ ယောဇနာ. ဣတီတိ ဧဝံ. ယန္တိ သောကံ. သွာဿာတိ သော အဿာ. သောတိ သောကော. အဿာတိ သိက္ခမာနာယ. အာဝါသောတိ အာဝါသောကာသော. ‘‘ဧဒိသာ အယ’’န္တိ ဣမိနာ ‘‘အဇာနန္တီ’’တိ ဧတ္ထ အဇာနနာကာရံ ဒဿေတီတိ. နဝမံ.