၂. ဒုတိယပါရာဇိကသိက္ခာပဒံ

၆၆၄. ဒုတိယေ ကစ္စိ နော သာတိ ဧတ္ထ နောသဒ္ဒေါ နုသဒ္ဒတ္ထောတိ အာဟ ‘‘ကစ္စိ နု သာ’’တိ. ပရိဝါရဝိပတ္တီတိ ပရိဇနဿ ဝိနာသနံ. ‘‘အကိတ္တီ’’တိ ဧတ္ထ သမ္မုခါ နိန္ဒံ ဂဟေတွာ ‘‘အယသော’’တိဣမိနာ ပရမ္မုခါ နိန္ဒာ ဂဟေတဗ္ဗာတိ ဒဿေတုံ ဝုတ္တံ ‘‘ပရမ္မုခဂရဟာ ဝါ’’တိ.

၆၆၆. ‘‘ယာ ပါရာဇိကံ အာပန္နာ’’တိဣမိနာ ‘‘သာ ဝါ’’တိ ဧတ္ထ တသဒ္ဒဿ ဝိသယံ ဒဿေတိ. စတုန္နန္တိ နိဒ္ဓါရဏတ္ထေ စေတံ သာမိဝစနံ၊ စတူသူတိ အတ္ထော. ပစ္ဆာတိ သဗ္ဗပါရာဇိကာနံ ပစ္ဆာ. ဣမသ္မိံ ဩကာသေတိ ပဌမတတိယပါရာဇိကာနမန္တရေ ဌာနေ. ဌပိတန္တိ သင်္ဂီတိကာရေဟိ နိက္ခိတ္တံ. ဧတ္ထာတိ ဣမသ္မိံ သိက္ခာပဒေ. တတြာတိ ဒုဋ္ဌုလ္လသိက္ခာပဒေတိ. ဒုတိယံ.