၁. ပါရာဇိကကဏ္ဍအတ္ထယောဇနာ

ဧဝံ ဘိက္ခုဝိဘင်္ဂဿ၊ ကတွာန ယောဇနာနယံ၊

ဘိက္ခုနီနံ ဝိဘင်္ဂဿ၊ ကရိဿံ ယောဇနာနယံ.

ယောတိ ဝိဘင်္ဂေါ. ဝိဘင်္ဂဿာတိ ဝိဘင်္ဂေါ အဿ. အဿာတိ ဟောတိ. တဿာတိ ဘိက္ခုနီနံ ဝိဘင်္ဂဿ. ယတောတိ ယသ္မာ. အယံ ပနေတ္ထ ယောဇနာ – ဘိက္ခူနံ ဝိဘင်္ဂဿ အနန္တရံ ဘိက္ခုနီနံ ယော ဝိဘင်္ဂေါ သင်္ဂဟိတော အဿ၊ တဿ ဘိက္ခုနီနံ ဝိဘင်္ဂဿ သံဝဏ္ဏနာက္ကမော ပတ္တော ယတော၊ တတော တဿ ဘိက္ခုနီနံ ဝိဘင်္ဂဿ အပုဗ္ဗပဒဝဏ္ဏနံ ကာတုံ တာဝ ပါရာဇိကေ အယံ သံဝဏ္ဏနာ ဟောတီတိ. အပုဗ္ဗာနံ ပဒါနံ ဝဏ္ဏနာ အပုဗ္ဗပဒဝဏ္ဏနာ၊ တံ.

၁. ပဌမပါရာဇိကသိက္ခာပဒံ

၆၅၆. ‘‘တေန။ပေ။ သာဠှော’’တိ ဧတ္ထ ‘‘ဧတ္ထာ’’တိ ပါဌသေသော ယောဇေတဗ္ဗော. ဒဗ္ဗဂုဏကိရိယာဇာတိနာမသင်္ခါတေသု ပဉ္စသု သဒ္ဒေသု သာဠှသဒ္ဒဿ နာမသဒ္ဒဘာဝံ ဒဿေတုံ ဝုတ္တံ ‘‘သာဠှောတိ တဿ နာမ’’န္တိ. မိဂါရမာတုယာတိ ဝိသာခါယ. သာ ဟိ မိဂါရသေဋ္ဌိနာ မာတုဋ္ဌာနေ ဌပိတတ္တာ မိဂါရမာတာ နာမ. နဝကမ္မံ အဓိဋ္ဌာတီတိ နဝကမ္မိကန္တိ ဒဿေန္တော အာဟ ‘‘နဝကမ္မာဓိဋ္ဌာယိက’’န္တိ. ‘‘ပဏ္ဍိစ္စေန သမန္နာဂတာ’’တိဣမိနာ ပဏ္ဍာ ဝုစ္စတိ ပညာ၊ သာ သဉ္ဇာတာ ဣမိဿာတိ ပဏ္ဍိတာတိ ဝစနတ္ထံ ဒဿေတိ. ဝေယျတ္တိကေနာတိ ဝိသေသေန အဉ္ဇတိ ပါကဋံ ဂစ္ဆတီတိ ဝိယတ္တော၊ ပုဂ္ဂလော၊ တဿ ဣဒံ ဝေယျတ္တိကံ၊ ဉာဏံ၊ တေန. ‘‘ပဏ္ဍာ’’တိ ဝုတ္တပညာယ ‘‘မေဓာ’’တိ ဝုတ္တပညာယ ဝိသေသဘာဝံ ဒဿေတုံ ဝုတ္တံ ‘‘ပါဠိဂဟဏေ’’တိအာဒိ. ‘‘မေဓာ’’တိ ဟိ ဝုတ္တပညာ ‘‘ပဏ္ဍာ’’တိ ဝုတ္တပညာယ ဝိသေသော ဟောတိ သတိသဟာယတ္တာ. တတြုပါယာယာတိ အလုတ္တသမာသော ‘‘တတြမဇ္ဈတ္တတာ’’တိအာဒီသု (ဓ. သ. အဋ္ဌ. ယေဝါပနကဝဏ္ဏနာ) ဝိယ. ‘‘ကမ္မေသူ’’တိ ဣမိနာ တသဒ္ဒဿ ဝိသယံ ဒဿေတိ. ကတ္တဗ္ဗကမ္မုပပရိက္ခာယာတိ ကတ္တဗ္ဗကမ္မေသု ဝိစာရဏာယ. စသဒ္ဒေန ‘‘ကတာကတ’’န္တိ ပဒဿ ဒွန္ဒဝါကျံ ဒဿေတိ. ပရိဝေသနဋ္ဌာနေတိ ပရိဘုဉ္ဇိတုံ ဝိသန္တိ ပဝိသန္တိ ဧတ္ထာတိ ပရိဝေသနံ၊ တမေဝ ဌာနံ ပရိဝေသနဋ္ဌာနံ၊ တသ္မိံ. နိကူဋေတိ ဧတ္ထ ကူဋသင်္ခါတသိခရဝိရဟိတေ ဩကာသေတိ ဒဿေန္တော အာဟ ‘‘ကောဏသဒိသံ ကတွာ ဒဿိတေ ဂမ္ဘီရေ’’တိ. ဝိတျူပသဂ္ဂေါ ဝိကာရဝါစကော၊ သရသဒ္ဒေါ သဒ္ဒဝါစကောတိ အာဟ ‘‘ဝိပ္ပကာရသဒ္ဒေါ’’တိ. စရတိ အနေနာတိ စရဏံ ပါဒေါ၊ တသ္မိံ ဥဋ္ဌိတော ဂိလာနော ဧတိဿာတိ စရဏဂိလာနာတိ ဒဿေန္တော အာဟ ‘‘ပါဒရောဂေန သမန္နာဂတာ’’တိ.

၆၅၇. ‘‘တိန္တာ’’တိ ဣမိနာ အဝဿုတသဒ္ဒေါ ဣဓ ကိလိန္နတ္ထေ ဧဝ ဝတ္တတိ၊ န အညတ္ထေတိ ဒဿေတိ. အဿာတိ ‘‘အဝဿုတာ’’တိပဒဿ. ပဒဘာဇနေ ဝုတ္တန္တိ သမ္ဗန္ဓော. တတ္ထာတိ ပဒဘာဇနေ. ဝတ္ထံ ရင်္ဂဇာတေန ရတ္တံ ဝိယ၊ တထာ ကာယသံသဂ္ဂရာဂေန သုဋ္ဌု ရတ္တာတိ ယောဇနာ. ‘‘အပေက္ခာယ သမန္နာဂတာ’’တိ ဣမိနာ အပေက္ခာ ဧတိဿမတ္ထီတိ အပေက္ခဝတီတိ အတ္ထံ ဒဿေတိ. ပဋိဗဒ္ဓံ စိတ္တံ ဣမိဿန္တိ ပဋိဗဒ္ဓစိတ္တာတိ ဒဿေန္တော အာဟ ‘‘ပဋိဗန္ဓိတွာ ဌပိတစိတ္တာ ဝိယာ’’တိ. ဒုတိယပဒဝိဘင်္ဂေပီတိ ‘‘အဝဿုတော’’တိ ဒုတိယပဒဘာဇနေပိ. ပုဂ္ဂလသဒ္ဒဿ သတ္တသာမညဝါစကတ္တာ ပုရိသသဒ္ဒေန ဝိသေသေတိ. အဓောဥဗ္ဘဣတိ နိပါတာနံ ဆဋ္ဌိယာ သမသိတဗ္ဗဘာဝံ ဒဿေတုံ ဝုတ္တံ ‘‘အက္ခကာနံ အဓော’’တိအာဒိ. နနု ယထာ ဣဓ ‘‘အက္ခကာနံ အဓော’’တိ ဝုတ္တံ၊ ဧဝံ ပဒဘာဇနေပိ ဝတ္တဗ္ဗံ၊ ကသ္မာ န ဝုတ္တန္တိ အာဟ ‘‘ပဒဘာဇနေ’’တိအာဒိ. ပဒပဋိပါဋိယာတိ ‘‘အဓော’’တိ စ ‘‘အက္ခက’’န္တိ စ ပဒါနံ အနုက္ကမေန. ဧတ္ထာတိ အဓက္ခကဥဗ္ဘဇာဏုမဏ္ဍလေသု. သာဓာရဏပါရာဇိကေဟီတိ ဘိက္ခုဘိက္ခုနီနံ သာဓာရဏေဟိ ပါရာဇိကေဟိ. နာမမတ္တန္တိ နာမမေဝ.

၆၅၉. ဧဝန္တိ ဣမာယ ပါဠိယာ ဝိဘဇိတွာတိ သမ္ဗန္ဓော. တတ္ထာတိ ‘‘ဥဘတောအဝဿုတေ’’တိအာဒိဝစနေ. ‘‘ဥဘတောအဝဿုတေ’’တိ ပါဌော မူလပါဌောယေဝ၊ နာညောတိ ဒဿေန္တေန ဝိသေသမကတွာ ‘‘ဥဘတောအဝဿုတေတိ ဥဘတော အဝဿုတေ’’တိ ဝုတ္တံ. ဥဘတောတိ ဧတ္ထ ဥဘသရူပဉ္စ တောသဒ္ဒဿ ဆဋ္ဌျတ္ထေ ပဝတ္တိဉ္စ ဒဿေတုံ ဝုတ္တံ ‘‘ဘိက္ခုနိယာ စေဝ ပုရိသဿ စာ’’တိ. တတ္ထ ဘိက္ခုနီပုရိသသဒ္ဒေဟိ ဥဘသရူပံ ဒဿေတိ. ‘‘ယာ’’တိ စ ‘‘သ’’ဣတိ စ ဒွီဟိ သဒ္ဒေဟိ တောပစ္စယဿ ဆဋ္ဌျတ္ထံ၊ ဥဘိန္နံ အဝဿုတဘာဝေ သတီတိ အတ္ထော. ဘာဝပစ္စယေန ဝိနာ ဘာဝတ္ထော ဉာတဗ္ဗောတိ အာဟ ‘‘အဝဿုတဘာဝေ’’တိ. ယထာပရိစ္ဆိန္နေနာတိ ‘‘အဓက္ခကံ၊ ဥဗ္ဘဇာဏုမဏ္ဍလ’’န္တိ ယေန ယေန ပရိစ္ဆိန္နေန. အတ္တနောတိ ဘိက္ခုနိယာ. တဿ ဝါတိ ပုရိသဿ ဝါ. ဣဓာပီတိ ကာယပဋိဗဒ္ဓေန ကာယာမသနေပိ.

တတြာတိ တေသု ဘိက္ခုဘိက္ခုနီသု. န ကာရေတဗ္ဗော ‘‘ကာယသံသဂ္ဂံ သာဒိယေယျာ’’တိ အဝုတ္တတ္တာတိ အဓိပ္ပါယော. အစောပယမာနာပီတိ အစာလယမာနာပိ၊ ပိသဒ္ဒေါ သမ္ဘာဝနတ္ထော၊ တေန စောပယမာနာ ပဂေဝါတိ ဒဿေတိ. ဧဝံ ပန သတီတိ စိတ္တေနေဝ အဓိဝါသယမာနာယ သတိ ပန. ကိရိယသမုဋ္ဌာနတာတိ ဣမဿ သိက္ခာပဒဿ ကိရိယသမုဋ္ဌာနဘာဝေါ. တဗ္ဗဟုလနယေနာတိ ‘‘ဝနစရကော (မ. နိ. အဋ္ဌ. ၂.၂၀၁၊ ၃.၁၃၃)၊ သင်္ဂါမာဝစရော’’တိအာဒီသု (မ. နိ. ၂.၁၀၈) ဝိယ တဿံ ကိရိယာယံ ဗဟုလတော သမုဋ္ဌာနနယေန. သာတိ ကိရိယသမုဋ္ဌာနတာ.

၆၆၀. ဧတ္ထာတိ ဥဗ္ဘက္ခကအဓောဇာဏုမဏ္ဍလေသု.

၆၆၂. ‘‘ဧကတော အဝဿုတေ’’တိ ဧတ္ထာပိ တောပစ္စယော ဆဋ္ဌျတ္ထေ ဟောတိ. သာမညဝစနဿာပိ ဝိသေသေ အဝဋ္ဌာနတော၊ ဝိသေသတ္ထိနာ စ ဝိသေသဿ အနုပယောဇိတဗ္ဗတော အာဟ ‘‘ဘိက္ခုနိယာ ဧဝါ’’တိ. တတြာတိ ‘‘ဧကတော အဝဿုတေ’’တိအာဒိဝစနေ. ‘‘တထေဝါ’’တိဣမိနာ ကာယသံသဂ္ဂရာဂေန အဝဿုတောတိ အတ္ထံ အတိဒိသတိ. စတူသူတိ မေထုနရာဂ ကာယသံသဂ္ဂရာဂဂေဟသိတပေမ သုဒ္ဓစိတ္တသင်္ခါတေသု စတူသု. ယတ္ထာတိ ယသ္မိံ ဌာနေ.

၆၆၃. အယံ ပုရိသော ဣတိ ဝါ ဣတ္ထီ ဣတိ ဝါ အဇာနန္တိယာ ဝါတိ ယောဇနာတိ. ပဌမံ.

၂. ဒုတိယပါရာဇိကသိက္ခာပဒံ

၆၆၄. ဒုတိယေ ကစ္စိ နော သာတိ ဧတ္ထ နောသဒ္ဒေါ နုသဒ္ဒတ္ထောတိ အာဟ ‘‘ကစ္စိ နု သာ’’တိ. ပရိဝါရဝိပတ္တီတိ ပရိဇနဿ ဝိနာသနံ. ‘‘အကိတ္တီ’’တိ ဧတ္ထ သမ္မုခါ နိန္ဒံ ဂဟေတွာ ‘‘အယသော’’တိဣမိနာ ပရမ္မုခါ နိန္ဒာ ဂဟေတဗ္ဗာတိ ဒဿေတုံ ဝုတ္တံ ‘‘ပရမ္မုခဂရဟာ ဝါ’’တိ.

၆၆၆. ‘‘ယာ ပါရာဇိကံ အာပန္နာ’’တိဣမိနာ ‘‘သာ ဝါ’’တိ ဧတ္ထ တသဒ္ဒဿ ဝိသယံ ဒဿေတိ. စတုန္နန္တိ နိဒ္ဓါရဏတ္ထေ စေတံ သာမိဝစနံ၊ စတူသူတိ အတ္ထော. ပစ္ဆာတိ သဗ္ဗပါရာဇိကာနံ ပစ္ဆာ. ဣမသ္မိံ ဩကာသေတိ ပဌမတတိယပါရာဇိကာနမန္တရေ ဌာနေ. ဌပိတန္တိ သင်္ဂီတိကာရေဟိ နိက္ခိတ္တံ. ဧတ္ထာတိ ဣမသ္မိံ သိက္ခာပဒေ. တတြာတိ ဒုဋ္ဌုလ္လသိက္ခာပဒေတိ. ဒုတိယံ.

၃. တတိယပါရာဇိကသိက္ခာပဒံ

၆၆၉. တတိယေ အဿာတိ ‘‘ဓမ္မေန ဝိနယေနာ’’တိ ပဒဿ. ပဒဘာဇနံ ဝုတ္တန္တိ သမ္ဗန္ဓော. ဉတ္တိသမ္ပဒါ စေဝ အနုသာဝနသမ္ပဒါ စ သတ္ထုသာသနံ နာမာတိ ဒဿေန္တော အာဟ ‘‘ဉတ္တိ။ပေ။ သမ္ပဒါယ စာ’’တိ. သတ္ထုသာသနေနာတိ စ သတ္ထု အာဏာယ. ကမ္မန္တိ ဥက္ခေပနီယကမ္မံ. တတ္ထာတိ သံဃေ. ‘‘ဝစနံ နာဒိယတီ’’တိအာဒီသု ဝိယ သံဃံ ဝါ နာဒိယတီတိ ဧတ္ထ နာဒိယနံ နာမ နာနုဝတ္တနမေဝါတိ အာဟ ‘‘နာနုဝတ္တတီ’’တိ. တတ္ထာတိ သံဃာဒီသု. အယံ တာဝ သံဝါသောတိ သဟ ဘိက္ခူ ဝသန္တိ ဧတ္ထာတိ သံဝါသောတိ အတ္ထေန အယံ ဧကကမ္မာဒိ သံဝါသော နာမ. ‘‘သဟ အယနဘာဝေနာ’’တိဣမိနာ သဟ အယန္တိ ပဝတ္တန္တီတိ သဟာယာတိ ဝစနတ္ထံ ဒဿေတိ. တေတိ ဘိက္ခူ. ယေဟိ စာတိ ဘိက္ခူဟိ စ. တဿာတိ ဥက္ခိတ္တကဿ. တေနာတိ ဥက္ခိတ္တကေန. အတ္တနောတိ ဥက္ခိတ္တကဿာတိ. တတိယံ.

၄. စတုတ္ထပါရာဇိကသိက္ခာပဒံ

၆၇၅. စတုတ္ထေ မေထုနရာဂေန အဝဿုတာ နာဓိပ္ပေတာ၊ ကာယသံသဂ္ဂရာဂေန အဝဿုတာဝါဓိပ္ပေတာတိ အာဟ ‘‘ကာယသံသဂ္ဂရာဂေန အဝဿုတာ’’တိ. ‘‘ပုရိသပုဂ္ဂလဿာ’’တိပဒံ န ဟတ္ထသဒ္ဒေန သမ္ဗန္ဓိတဗ္ဗံ၊ ဂဟဏသဒ္ဒေနေဝ သမ္ဗန္ဓိတဗ္ဗန္တိ ဒဿေန္တော အာဟ ‘‘ယံ ပုရိသပုဂ္ဂလေနာ’’တိအာဒိ. တန္တိ ဂဟဏံ၊ ‘‘ဟတ္ထဂ္ဂဟဏ’’န္တိ ဝုတ္တဝစနံ ဥပလက္ခဏမတ္တမေဝါတိ အာဟ ‘‘အညမ္ပီ’’တိအာဒိ. တတ္ထ ‘‘အညမ္ပီ’’တိ ဟတ္ထဂဟဏတော ဣတရမ္ပိ. အပါရာဇိကက္ခေတ္တေတိ ဥဗ္ဘက္ခကေ အဓောဇာဏုမဏ္ဍလေ. အဿာတိ ‘‘ဟတ္ထဂ္ဂဟဏ’’န္တိပဒဿ. ဧတ္ထာတိ ‘‘အသဒ္ဓမ္မဿ ပဋိသေဝနတ္ထာယာ’’တိပဒေ. ကာယသံသဂ္ဂေါတိ ကာယသံသဂ္ဂေါ ဧဝ. တေန ဝုတ္တံ ‘‘န မေထုနဓမ္မော’’တိ. ဟီတိ သစ္စံ၊ ယသ္မာ ဝါ. ဧတ္ထာတိ ကာယသံသဂ္ဂဂဟဏေ. သာဓကန္တိ ဉာပကံ.

တိဿိတ္ထိယောတိ ဘုမ္မတ္ထေ စေတံ ဥပယောဂဝစနံ. တီသု ဣတ္ထီသူတိ ဟိ အတ္ထော၊ တိဿော ဣတ္ထိယော ဥပဂန္တွာတိ ဝါ ယောဇေတဗ္ဗော. ဧသေဝ နယော ပရတောပိ. ယံ မေထုနံ အတ္ထိ၊ တံ န သေဝေတိ ယောဇနာ. န သေဝေတိ စ န သေဝတိ. တိကာရဿ ဟိ ဧကာရော. တယော ပုရိသေတိ တီသု ပုရိသေသု၊ တေ ဝါ ဥပဂန္တွာ. တယော စ အနရိယပဏ္ဍကေတိ တီသု အနရိယသင်္ခါတေသု ဥဘတောဗျဉ္ဇနကေသု စ ပဏ္ဍကေသု စ၊ တေ ဝါ ဥပဂန္တွာတိ ယောဇနာ. န စာစရေ မေထုနံ ဗျဉ္ဇနသ္မိန္တိ အတ္တနော နိမိတ္တသ္မိံ မေထုနံ န စ အာစရတိ. ဣဒံ အနုလောမပါရာဇိကံ သန္ဓာယ ဝုတ္တံ. ဆေဇ္ဇံ သိယာ မေထုနဓမ္မပစ္စယာတိ မေထုနဓမ္မကာရဏာ ဆေဇ္ဇံ သိယာ၊ ပါရာဇိကံ ဘဝေယျာတိ အတ္ထော. ကုသလေဟီတိ ပဉှာဝိသဇ္ဇနေ ဆေကေဟိ၊ ဆေကကာမေဟိ ဝါ. အယံ ပဉှော အဋ္ဌဝတ္ထုကံ သန္ဓာယ ဝုတ္တော.

ပဉှာဝိသဇ္ဇနတ္ထာယ စိန္တေန္တာနံ သေဒမောစနကာရဏတ္တာ ‘‘သေဒမောစနဂါထာ’’တိ ဝုတ္တာ. ဝိရုဇ္ဈတီတိ ‘‘န မေထုနဓမ္မော’’တိ ဝစနေန ‘‘ဆေဇ္ဇံ သိယာ မေထုနဓမ္မပစ္စယာ’’တိ ဝစနံ ဝိရုဇ္ဈတိ၊ န သမေတီတိ အတ္ထော. ဣတိ စေ ဝဒေယျ၊ န ဝိရုဇ္ဈတိ. ကသ္မာ? မေထုနဓမ္မဿ ပုဗ္ဗဘာဂတ္တာတိ ယောဇနာ. ဣမိနာ မေထုနဓမ္မဿ ပုဗ္ဗဘာဂဘူတော ကာယသံသဂ္ဂေါဝ ဥပစာရေန တတ္ထ မေထုနဓမ္မသဒ္ဒေန ဝုတ္တော၊ န ဒွယံဒွယသမာပတ္တီတိ ဒီပေတိ. ဟိသဒ္ဒေါ ဝိတ္ထာရဇောတကော. ပရိဝါရေယေဝ ဝုတ္တာနီတိ သမ္ဗန္ဓော. ဝဏ္ဏာဝဏ္ဏောတိ သုက္ကဝိသဋ္ဌိ. ဓနမနုပ္ပါဒါနန္တိ သဉ္စရိတ္တံ. ‘‘ဣမိနာ ပရိယာယေနာ’’တိ ဣမိနာ လေသေန သမီပူပစာရေနာတိ အတ္ထော. ဧတေနုပါယေနာတိ ‘‘ဟတ္ထဂ္ဂဟဏံ သာဒိယေယျာ’’တိပဒေ ဝုတ္တဥပါယေန. သဗ္ဗပဒေသူတိ သဗ္ဗေသု ‘‘သင်္ဃာဋိကဏ္ဏဂ္ဂဟဏံ သာဒိယေယျာ’’တိအာဒီသု ပဒေသု. အပိ စာတိ ဧကံသေန၊ ဝိသေသံ ဝက္ခာမီတိ အဓိပ္ပါယော. ‘‘ဧဝံနာမကံ ဌာန’’န္တိ ဣမိနာ ‘‘ဣတ္ထံနာမံ ဣမဿ ဌာနဿာ’’တိ ဝစနတ္ထံ ဒီပေတိ.

၆၇၆. ဧကန္တရိကာယ ဝါတိ ဧတ္ထ ဝါသဒ္ဒေန ဒွန္တရိကာဒီနိပိ သင်္ဂယှန္တိ. ယေန တေနာတိ ယေန ဝါ တေန ဝါ. ဒွိတိစတုပ္ပဉ္စဆဝတ္ထူနိ ပေယျာလဝသေန ဝါ ဝါသဒ္ဒေန ဝါ ဂဟေတဗ္ဗာနိ. အပိ စာတိ ကိဉ္စ ဘိယျော၊ ဝတ္တဗ္ဗဝိသေသံ ဝက္ခာမီတိ အဓိပ္ပါယော. ဧတ္ထာတိ ‘‘အာပတ္တိယော ဒေသေတွာ’’တိ ဝစနေ. ဟီတိ သစ္စံ. ဝုတ္တန္တိ ပရိဝါရေ ဝုတ္တံ. တတြာတိ ပုရိမဝစနာပေက္ခံ. ဒေသိတာ အာပတ္တိ ဂဏနူပိကာတိ ယောဇနာ. ဧကံ ဝတ္ထုံ အာပန္နာ ယာ ဘိက္ခုနီတိ ယောဇနာ. ဓုရနိက္ခေပံ ကတွာတိ ‘‘ဣမဉ္စ ဝတ္ထုံ၊ အညမ္ပိ စ ဝတ္ထုံ နာပဇ္ဇိဿာမီ’’တိ ဓုရနိက္ခေပံ ကတွာ. ယာ ပန သဥဿာဟာဝ ဒေသေတီတိ ယောဇနာတိ. စတုတ္ထံ.

သာဓာရဏာတိ ဘိက္ခုနီဟိ သာဓာရဏာ. ဧတ္ထာတိ ‘‘ဥဒ္ဒိဋ္ဌာ ခေါ အယျာယော’’တိအာဒိဝစနေ.

ဣတိ သမန္တပါသာဒိကာယ ဝိနယသံဝဏ္ဏနာယ

ဘိက္ခုနိဝိဘင်္ဂေ ပါရာဇိကကဏ္ဍဝဏ္ဏနာယ ယောဇနာ သမတ္တာ.