၃. ဝိကာလဂါမပ္ပဝိသနသိက္ခာပဒံ

၅၀၈. တတိယေ ‘‘တိရစ္ဆာနဘူတံ ကထ’’န္တိ ဣမိနာ ‘‘တိရစ္ဆာနကထ’’န္တိ ပဒဿ တုလျနိဿိတသမာသံ ဒဿေတိ. ရာဇပဋိသံယုတ္တန္တိ ရာဇူဟိ ပဋိသံယုတ္တံ.

၅၁၂. သမ္ဗဟုလာ ဘိက္ခူတိ သမ္ဗန္ဓော. တသ္မိံ ဂါမေတိ တသ္မိံ ပဌမပဝိသနဂါမေ. တံ ကမ္မန္တိ တံ ဣစ္ဆိတကမ္မံ. အန္တရာတိ ဂါမဝိဟာရာနမန္တရေ. ဘုမ္မတ္ထေ စေတံ နိဿက္ကဝစနံ.

ကုလဃရေ ဝါတိ ဉာတိကုလဥပဋ္ဌာကကုလဃရေ ဝါ. တေလဘိက္ခာယ ဝါတိ တေလယာစနတ္ထာယ ဝါ. ပဿေတိ အတ္တနော ပဿေ သမီပေတိ ဝုတ္တံ ဟောတိ. တေနာတိ ဂါမမဇ္ဈမဂ္ဂေန. အနောက္ကမ္မာတိ အနောက္ကမိတွာ၊ အပက္ကမိတွာတိ အတ္ထောတိ. တတိယံ.