၇. သဉ္စိစ္စသိက္ခာပဒံ

၄၆၄. သတ္တမေ ဥပပုဗ္ဗဒဟဓာတုဿ သကမ္မိကတ္တာ ကာရိတန္တောဂဓဘာဝံ ဒဿေတုံ ဝုတ္တံ ‘‘ဥပ္ပါဒေန္တီ’’တိ. ‘‘အနုပသမ္ပန္နဿာ’’တိ ဧတ္ထ အကာရဿ သဒိသတ္ထံ ဒဿေတုံ ဝုတ္တံ ‘‘သာမဏေရဿာ’’တိ. သာမဏေရောပိ ဟိ ဥပသမ္ပန္နေန သဒိသော ဟောတိ သဏ္ဌာနေန စ ပုရိသဘာဝေန စ. သာမဏေရဿ ကုက္ကုစ္စံ ဥပဒဟတီတိ သမ္ဗန္ဓော. နိသိန္နံ မညေ၊ နိပန္နံ မညေ၊ ဘုတ္တံ မညေ၊ ပီတံ မညေ၊ ကတံ မညေတိ ယောဇနာ. နိသိန္နန္တိ နိသီဒိတံ. နိပန္နန္တိ နိပဇ္ဇိတန္တိ. သတ္တမံ.