၅. တလသတ္တိကသိက္ခာပဒံ

၄၅၄. ပဉ္စမေ တလန္တိ ဟတ္ထတလံ. တဉှိ တလတိ ယံကိဉ္စိ ဂဟိတဝတ္ထု ပတိဋ္ဌာတိ ဧတ္ထာတိ ‘‘တလ’’န္တိ ဝုစ္စတိ. သတ္တီတိ ကုန္တော. သော ဟိ သကတိ ဝိဇ္ဈိတုံ သမတ္ထေတီတိ ‘‘သတ္တီ’’တိ ဝုစ္စတိ. တလမေဝ သတ္တိသဒိသတ္တာ တလသတ္တိကံ၊ သဒိသတ္ထေ ကော၊ တံ တလသတ္တိကံ ဥပစာရေန ဂဟေတွာ ‘‘ကာယမ္ပီ’’တိ ဝုတ္တံ. ကာယတော အညံ ဝတ္ထုမ္ပိ တလသတ္တိကသင်္ခါတေန ကာယေန ဂဟေတွာ ဥဂ္ဂိရတ္တာ ဝုတ္တံ ‘‘ကာယပဋိဗဒ္ဓမ္ပီ’’တိ. ‘‘ပဟာရသမုစ္စိတာ’’တိ ဧတ္ထ သံပုဗ္ဗော စ ဥပုဗ္ဗော စ စိသဒ္ဒေါ ပဂုဏနသင်္ခါတေ ပရိစိတေ ဝတ္တတီတိ အာဟ ‘‘ပဟာရပရိစိတာ’’တိ. ပဟာရေန သံ ပုနပ္ပုနံ ဥစ္စိတာ ပရိစိတာတိ အတ္ထော. ဣမမေဝတ္ထံ သန္ဓာယ ဝုတ္တံ ‘‘ပုဗ္ဗေပိ။ပေ။ အတ္ထော’’တိ. အညမ္ပိ သဇ္ဈာယနနယံ ဒဿေတုံ ဝုတ္တံ ‘‘ပဟာရဿ ဥဗ္ဗိဂါ’’တိ. တဿာတိ တဿ ပါဌဿ. ပဟာရဿာတိ ပဟာရတော. နိဿက္ကတ္ထေ စေတံ သာမိဝစနံ. ‘‘ဘီတာ’’တိ ဣမိနာ ‘‘ဥဗ္ဗိဂါ’’တိ ဧတ္ထ ဥပုဗ္ဗ ဝိဇဓာတုဿတ္ထံ ဒဿေတိ.

၄၅၇-၈. ဝိရဒ္ဓေါတိ ပဏ္ဏကော ဟုတွာ. ပုဗ္ဗေတိ ပုရိမသိက္ခာပဒေ. ဝုတ္တေသု ဝတ္ထူသူတိ ‘‘စောရံ ဝါ ပစ္စတ္ထီကံ ဝါ’’တိအာဒိနာ ဝုတ္တေသု ဝတ္ထူသူတိ. ပဉ္စမံ.