၈. ဥယျုတ္တသေနာသိက္ခာပဒံ

၃၁၁. အဋ္ဌမေ ‘‘အဘိမုခ’’န္တိဣမိနာ အဘိသဒ္ဒဿတ္ထံ ဒဿေတိ. ‘‘ဥယျာတော’’တိပဒဿ ဥဋ္ဌဟိတွာ ယာတောတိ ဒဿေန္တော အာဟ ‘‘နဂရတော နိဂ္ဂတော’’တိ. ‘‘ကတဥယျောဂ’’န္တိ ဣမိနာ ဥဋ္ဌဟိတွာ ယုဉ္ဇတိ ဂစ္ဆတီတိ ဥယျုတ္တာတိ ဒဿေတိ. ဓာတူန၊ မနေကတ္ထတ္တာ ဝုတ္တံ ‘‘ဂါမတော နိက္ခန္တ’’န္တိ.

၃၁၄. ဒွါဒသ ပုရိသာ ဣမဿ ဟတ္ထိနောတိ ဒွါဒသပုရိသော၊ အာဝုဓော ဟတ္ထေသု ဧတေသန္တိ အာဝုဓဟတ္ထာ. နိန္နန္တိ နိန္နဋ္ဌာနံ၊ ပဿတော ဘိက္ခုနောတိ သမ္ဗန္ဓောတိ. အဋ္ဌမံ.