၆. ဒုတိယပဝါရဏသိက္ခာပဒံ

၂၄၂. ဆဋ္ဌေ န အာစရိတဗ္ဗောတိ အနာစာရောတိ ဝုတ္တေ ပဏ္ဏတ္တိဝီတိက္ကမောတိ အာဟ ‘‘ပဏ္ဏတ္တိဝီတိက္ကမ’’န္တိ. ‘‘ကရောတီ’’တိဣမိနာ ‘‘အတ္တာနမာစရတီ’’တိအာဒီသု ဝိယ စရသဒ္ဒေါ ကရသဒ္ဒတ္ထောတိ ဒဿေတိ. ဥပနန္ဓီတိ ဧတ္ထ ဥပသဒ္ဒေါ ဥပနာဟတ္ထော၊ နဟဓာတု ဗန္ဓနတ္ထောတိ ဒဿေန္တော အာဟ ‘‘ဥပနာဟ’’န္တိအာဒိ. ဇနိတော ဥပနာဟော ယေနာတိ ဇနိတဥပနာဟော. ဣမိနာ ‘‘ဥပနန္ဓော’’တိ ပဒဿ ဥပနဟတီတိ ဥပနန္ဓောတိ ကတ္ထုတ္ထံ ဒဿေတိ.

၂၄၃. အဘိဟဋ္ဌုန္တိ ဧတ္ထ တုံပစ္စယော တွာပစ္စယတ္ထောတိ အာဟ ‘‘အဘိဟရိတွာ’’တိ. ပဒဘာဇနေ ပန ဝုတ္တန္တိ သမ္ဗန္ဓော. သာဓာရဏမေဝ အတ္ထန္တိ ယောဇနာ. အဿာတိ ဘိက္ခုဿ. တီဟာကာရေဟီတိ သာမံ ဇာနနေန စ အညေသမာရောစနေန စ တဿာရောစနေန စာတိ တီဟိ ကာရဏေဟိ. အာသာဒီယတေ မင်္ကုံ ကရီယတေ အာသာဒနံ၊ တံ အပေက္ခော အာသာဒနာပေက္ခောတိ ဒဿေန္တော အာဟ ‘‘အာသာဒန’’န္တိအာဒိ.

ယဿ အတ္ထာယ အဘိဟဋန္တိ သမ္ဗန္ဓော. ဣတရဿာတိ အဘိဟာရကတော အညဿ ဘုတ္တဿာတိ. ဆဋ္ဌံ.