၅. ကဗဠဝဂ္ဂ-အတ္ထယောဇနာ

၆၁၇. ‘‘မုခဒွါရ’’န္တိ ကမ္မဿ ‘‘အနာဟဋေ’’တိ စ ‘‘ဝိဝရိဿာမီ’’တိ စ ဒွီသု ကိရိယာသု သမ္ဗန္ဓဘာဝံ ဒဿေတုံ ဝုတ္တံ ‘‘အနာဟရိတေ မုခဒွါရ’’န္တိ.

၆၁၈. သကလံ ဟတ္ထန္တိ ပဉ္စင်္ဂုလိံ သန္ဓာယ ဝုတ္တံ.

၆၁၉. သကဗဠေနာတိ ဧတ္ထ ကဗဠသဒ္ဒေန ဝစနဿ အပရိပုဏ္ဏကာရဏံ သဗ္ဗမ္ပိ ဂဟေတဗ္ဗံ.

၆၂၀. ပိဏ္ဍုက္ခေပကန္တိအာဒီသု ဝိစ္ဆတ္ထေ ကပစ္စယောတိ အာဟ ‘‘ပိဏ္ဍံ ဥက္ခိပိတွာ ဥက္ခိပိတွာ’’တိ. တွာသဒ္ဒေန ကိရိယာဝိသေသနဘာဝံ ဒဿေတိ.

၆၂၄. ‘‘အဝကိရိတွာ’’တိ ဣမိနာ သိတ္ထာဝကာရကန္တိ ဧတ္ထ အဝပုဗ္ဗော ကိရဓာတုယေဝ၊ န ကရဓာတူတိ ဒဿေတိ.

၆၂၆. ‘‘စပုစပူ’’တိ ဧဝံ သဒ္ဒန္တိ ‘‘စပုစပူ’’တိ ဧဝံ အနုကရဏရဝန္တိ. ပဉ္စမော ဝဂ္ဂေါ.