၂. ဥဇ္ဇဂ္ဃိကဝဂ္ဂ-အတ္ထယောဇနာ

၅၈၆. ဥစ္စာသဒ္ဒံ ကတွာ ဇဂ္ဃနံ ဟသနံ ဥဇ္ဇဂ္ဃေါ၊ သောယေဝ ဥဇ္ဇဂ္ဃိကာ၊ တာယ. ဣတိ ဣမမတ္ထံ ဒဿေန္တော အာဟ ‘‘မဟာဟသိတံ ဟသန္တော’’တိ. ဧတ္ထာတိ ‘‘ဥဇ္ဇဂ္ဃိကာယာ’’တိပဒေ.

၅၈၈. ကိတ္တာဝတာတိ ကိတ္တကေန ပမာဏေန၊ ဧဝံ နိသိန္နေသု ထေရေသူတိ သမ္ဗန္ဓော၊ နိဒ္ဓါရဏေ စေတံ ဘုမ္မဝစနံ. ဝဝတ္ထပေတီတိ ဣဒဉ္စီဒဉ္စ ကထေတီတိ ဝဝတ္ထပေတိ. ဧတ္တာဝတာတိ ဧတ္တကေန ပမာဏေန.

၅၉၀. နိစ္စလံ ကတွာ ကာယဿ ဥဇုဋ္ဌပနံ ကာယပဂ္ဂဟော နာမာတိ အာဟ ‘‘နိစ္စလံ ကတွာ’’တိအာဒိ. ဧသေဝ နယော ဗာဟုပဂ္ဂဟသီသပဂ္ဂဟေသုပီတိ. ဒုတိယော ဝဂ္ဂေါ.