၁. ပဌမပါဋိဒေသနီယသိက္ခာပဒ-အတ္ထယောဇနာ

ခုဒ္ဒကာနံ အနန္တရာ ပါဋိဒေသနီယာ ယေ ဓမ္မာ သင်္ဂီတိကာရေဟိ ဌပိတာ၊ ဣဒါနိ တေသံ ဓမ္မာနံ အယံ ဝဏ္ဏနာ ဘဝတီတိ ယောဇနာ.

၅၅၂. ပဌမပါဋိဒေသနီယေ တာဝ အတ္ထော ဧဝံ ဝေဒိတဗ္ဗောတိ ယောဇနာ. ပဋိအာဂမနကာလေတိ ပိဏ္ဍာယ စရဏဋ္ဌာနတော ပက္ကမိတွာ၊ ပဋိနိဝတ္တိတွာ ဝါ အာဂမနကာလေ. သဗ္ဗေဝါတိ ဧတ္ထ နိဂ္ဂဟီတလောပဝသေန သန္ဓိ ဟောတီတိ အာဟ ‘‘သဗ္ဗမေဝါ’’တိ. ‘‘ကမ္ပမာနာ’’တိ ဣမိနာ ပပုဗ္ဗဝိဓဓာတုယာ ကမ္ပနတ္ထံ ဒဿေတိ. အပေဟီတိ ဧတ္ထ အပပုဗ္ဗဣဓာတု ဂတျတ္ထောတိ အာဟ ‘‘အပဂစ္ဆာ’’တိ.

၅၅၃. ပဋိဒေသေတဗ္ဗာကာရံ ဒဿေတိ အနေနာတိ ပဋိဒေသေတဗ္ဗာကာရဒဿနံ. ဒွိန္နံ သဒ္ဒါနံ ပရိယာယဘာဝံ ဒဿေတုံ ဝုတ္တံ ‘‘ရထိကာတိ ရစ္ဆာ’’တိ. ရထဿ ဟိတာ ရထိကာ. ဏျပစ္စယေ ကတေ ‘‘ရစ္ဆာ’’တိ (မောဂ္ဂလ္လာနေ ၄.၇၂ သုတ္တေ) ဝုစ္စတိ. ရစ္ဆန္တရေန အနိဗ္ဗိဒ္ဓါ ရစ္ဆာ ဗျူဟော နာမာတိ အာဟ ‘‘အနိဗ္ဗိဇ္ဈိတွာ’’တိအာဒိ. ဗျူဟေတိ သမ္ပိဏ္ဍေတိ ဇနေ အညတ္ထ ဂန္တုမပဒါနဝသေနာတိ ဗျူဟော. သိင်္ဃာဋကံ နာမ မဂ္ဂသန္ဓီတိ အာဟ ‘‘မဂ္ဂသမောဓာနဋ္ဌာန’’န္တိ. သိင်္ဃတိ မဂ္ဂသမောဓာနံ ကရောတိ ဧတ္ထာတိ သိင်္ဃာဋကံ. ဧတေသူတိ ရထိကာဒီသု. ဧသေဝ နယောတိ ဒုက္ကဋပါဋိဒေသနီယေ အတိဒိသတိ. ဟီတိ သစ္စံ. ‘‘ဝစနတော’’တိ ပဒံ ‘‘ဝေဒိတဗ္ဗော’’တိ ပဒေ ဉာပကဟေတု. ဒဒမာနာယ ဘိက္ခုနိယာ ဝသေနာတိ ယောဇနာ. ဧတ္ထာတိ သိက္ခာပဒေ. တသ္မာတိ ယသ္မာ အပမာဏံ၊ တသ္မာ.

ဣဒန္တိ ဝစနံ ဝုတ္တန္တိ သမ္ဗန္ဓော. သမ္ဘိန္နေ ဧကရသေ ကာလိကတ္တယေတိ ယောဇနာ.

၅၅၆. ‘‘ဒါပေတီ’’တိ ဟေတုတ္ထကိရိယာယ ကာရိတကတ္တုကာရိတကမ္မာနိ ဒဿေတုံ ဝုတ္တံ ‘‘အညာတိကာယ အညေန ကေနစီ’’တိ. အညေနာတိ အတ္တနာ အညေန. ‘‘တာယ ဧဝ ဝါ ဘိက္ခုနိယာ အညေန ဝါ ကေနစီ’’တိ ပဒါနိ ‘‘ပဋိဂ္ဂဟာပေတွာ’’တိပဒေ ကာရိတကမ္မာနီတိ. ပဌမံ.