၆. ဒုတိယသဟသေယျသိက္ခာပဒံ

၅၅. ဆဋ္ဌေ အာဂန္တုကာ ဝသန္တိ ဧတ္ထာတိ အာဝသထော၊ အာဝသထော စ သော အဂါရဉ္စေတိ အာဝသထာဂါရန္တိ ဒဿေန္တော အာဟ ‘‘အာဂန္တုကာနံ ဝသနာဂါရ’’န္တိ. မနုဿာနံ သန္တိကာ ဝစနံ သုတွာတိ ဝစနသေသော ယောဇေတဗ္ဗော. သာဋကန္တိ ဥတ္တရသာဋကံ၊ နိဝတ္ထဝတ္ထန္တိပိ ဝဒန္တိ. အစ္စာဂမ္မာတိ တွာပစ္စယန္တပဒဿ သမ္ဗန္ဓံ ဒဿေတုမာဟ ‘‘ပဝတ္တော’’တိ. ယထာ ဩမသဝါဒသိက္ခာပဒေ အက္ကောသေတုကာမတာယ ခတ္တိယံ ‘‘စဏ္ဍာလော’’တိ ဝဒတော အလိကံ ဘဏတောပိ မုသာဝါဒသိက္ခာပဒေန အနာပတ္တိ၊ ဩမသဝါဒသိက္ခာပဒေနေဝ အာပတ္တိ၊ ဧဝမိဓာပိ မာတုဂါမေန သဟ သယတော ပဌမသဟသေယျသိက္ခာပဒေန အနာပတ္တိ၊ ဣမိနာဝ အာပတ္တီတိ ဒဋ္ဌဗ္ဗန္တိ. ဆဋ္ဌံ.