၂. တိပုက္ခလနယဝဏ္ဏနာ

တထာ ဝုတ္တနယေန သရူပတော ပရိယာယတော စ ဂဟိတေသု တဏှာဝိဇ္ဇာတပ္ပက္ခိယဓမ္မေသု တဏှာ လောဘော၊ အဝိဇ္ဇာ မောဟော၊ အဝိဇ္ဇာယ သမ္ပယုတ္တော လောဟိတေ သတိ ပုဗ္ဗော ဝိယ တဏှာယ သတိ သိဇ္ဈမာနော အာဃာတော ဒေါသော၊ ဣတိ တီဟိ အကုသလမူလေဟိ ဂဟိတေဟိ၊ တပ္ပဋိပက္ခတော မညနာပဋိက္ခေပပရိညာဂဟဏာဒီဟိ စ ကုသလမူလာနိ သိဒ္ဓါနိယေဝ ဟောန္တိ. ဣဓာပိ ‘‘လောဘော သဗ္ဗာနိ ဝါ သာသဝကုသလာကုသလမူလာနိ သမုဒယသစ္စံ၊ တေဟိ နိဗ္ဗတ္တာ၊ တေသံ အဓိဋ္ဌာနဂေါစရဘူတာ စ ဥပါဒါနက္ခန္ဓာ ဒုက္ခသစ္စ’’န္တိအာဒိနာ သစ္စယောဇနာ ဝေဒိတဗ္ဗာ. ဖလံ ပနေတ္ထ တယော ဝိမောက္ခာ၊ တီဟိ ပန အကုသလမူလေဟိ တိဝိဓဒုစ္စရိတ-သံကိလေသမလ-ဝိသမအကုသလ-သညာ-ဝိတက္ကာဒိဝသေန အကုသလပက္ခော နေတဗ္ဗော. တထာ တီဟိ ကုသလမူလေဟိ တိဝိဓသုစရိတ-သမကုသလ-သညာ-ဝိတက္က-သဒ္ဓမ္မ-သမာဓိ-ဝိမောက္ခမုခ-ဝိမောက္ခာ-ဒိဝသေန ကုသလပက္ခော နေတဗ္ဗောတိ. အယံ တိပုက္ခလဿ နယဿ ဘူမိ.