၈. ဝိဘတ္တိဟာရဝဏ္ဏနာ

‘‘သဗ္ဗဓမ္မမူလပရိယာယ’’န္တိ ဧတ္ထ သဗ္ဗဓမ္မာ နာမ တေဘူမကာ ဓမ္မာ သက္ကာယဿ အဓိပ္ပေတတ္တာ. တေသံ မညနာ ပဒဋ္ဌာနံ ပပဉ္စသင်္ခါနိမိတ္တတ္တာ လောကဝိစိတ္တဿ. တယိမေ ကုသလာ အကုသလာ အဗျာကတာတိ တိဝိဓာ. တေသု ကုသလာနံ ယောနိသောမနသိကာရာဒိ ပဒဋ္ဌာနံ၊ အကုသလာနံ အယောနိသောမနသိကာရာဒိ၊ အဗျာကတာနံ ကမ္မဘဝအာဝဇ္ဇနဘူတရူပါဒိ ပဒဋ္ဌာနံ. တတ္ထ ကုသလာ ကာမာဝစရာဒိဝသေန ဘူမိတော တိဝိဓာ၊ တထာ အဗျာကတာ စိတ္တုပ္ပါဒသဘာဝါ၊ အစိတ္တုပ္ပါဒသဘာဝါ ပန ကာမာဝစရာဝ တထာ အကုသလာ. ပရိယတ္တိပဋိပတ္တိပဋိဝေဓသုတကိစ္စာဘာဝေန တိဝိဓော အဿုတဝါ. အန္ဓကလျာဏဝိဘာဂေန ဒုဝိဓော ပုထုဇ္ဇနော. သမ္မာသမ္ဗုဒ္ဓပစ္စေကဗုဒ္ဓသာဝကဘေဒေန တိဝိဓာ အရိယာ. မံသစက္ခုဒိဗ္ဗစက္ခုပညာစက္ခူဟိ ဒဿနာဘာဝေန တိဝိဓော အဒဿာဝီ. မဂ္ဂဖလနိဗ္ဗာနဘေဒေန တိဝိဓော၊ နဝဝိဓော ဝါ အရိယဓမ္မော. သဝနဓာရဏပရိစယမနသိကာရပဋိဝေဓဝသေန ပဉ္စဝိဓာ အရိယဓမ္မဿ ကောဝိဒတာ. တဒဘာဝတော အကောဝိဒေါ. သံဝရပဟာနဘေဒေန ဒုဝိဓော၊ ဒသဝိဓော ဝါ အရိယဓမ္မဝိနယော၊ တဒဘာဝတော အရိယဓမ္မေ အဝိနီတော. ဧတ္ထ ပဒဋ္ဌာနဝိဘာဂေါ ဟေဋ္ဌာ ဒဿိတောယေဝ. ‘‘သပ္ပုရိသာနံ အဒဿာဝီ’’တိအာဒီသုပိ ဧသေဝ နယော. ‘‘ပထဝိံ မညတီ’’တိအာဒီသု မညနာဝတ္ထုဝိဘာဂေါ ပါဠိယံ အာဂတောဝ၊ တထာ အဇ္ဈတ္တိကဗာဟိရာဒိကော စ အန္တရဝိဘာဂေါ.

မညနာ ပန တဏှာမာနဒိဋ္ဌိဝသေန သင်္ခေပတော တိဝိဓာ၊ ဝိတ္ထာရတော ပန တဏှာမညနာ တာဝ ကာမတဏှာဒိဝသေန အဋ္ဌသတဝိဓာ၊ တထာ ‘‘အသ္မီတိ သတိ ဣတ္ထံသ္မီတိ ဟောတီ’’တိအာဒိနာ. ဧဝံ မာနမညနာပိ. ‘‘အသ္မီတိ သတိ ဣတ္ထံသ္မီတိ ဟောတီ’’တိအာဒိနာ ပပဉ္စတ္တယံ ဥဒ္ဒိဋ္ဌံ နိဒ္ဒိဋ္ဌဉ္စာတိ. ဧတေန ဒိဋ္ဌိမညနာယပိ အဋ္ဌသတဝိဓတာ ဝုတ္တာတိ ဝေဒိတဗ္ဗာ. အပိစ သေယျဿ ‘‘သေယျောဟမသ္မီ’’တိအာဒိနာ မာနမညနာယ နဝဝိဓတာ တဒန္တရဘေဒေန အနေကဝိဓတာ စ ဝေဒိတဗ္ဗာ. အယဉ္စ အတ္ထော ဟီနတ္တိကတ္ထဝဏ္ဏနာယ ဝိဘာဝေတဗ္ဗော. ဒိဋ္ဌိမညနာယ ပန ဗြဟ္မဇာလေ အာဂတနယေန ဒွါသဋ္ဌိဝိဓတာ တဒန္တရဘေဒေန အနေကဝိဓတာ စ ဝေဒိတဗ္ဗာ. ‘‘အပရိညာတ’’န္တိ ဧတ္ထ ဉာတပရိညာဒိဝသေန စေဝ ရူပမုခါဒိအဘိနိဝေသဘေဒါဒိဝသေန စ ပရိညာနံ အနေကဝိဓတာ ဝေဒိတဗ္ဗာ. တထာ အဋ္ဌမကာဒိဝသေန သေက္ခဝိဘာဂေါ ပညာဝိမုတ္တာဒိဝသေန အသေက္ခဝိဘာဂေါ စ. အယမေတ္ထ ဓမ္မဝိဘာဂေါ. ပဒဋ္ဌာနဝိဘာဂေါ စ ဘူမိဝိဘာဂေါ စ ဝုတ္တနယာနုသာရေန ဝေဒိတဗ္ဗာတိ. အယံ ဝိဘတ္တိဟာရော.