၅. ပတ္တနိဒ္ဒေသဝဏ္ဏနာ

၆၀. အယောပတ္တော နာမ အယသာ ကာဠလောဟေန နိဗ္ဗတ္တော ပတ္တော. ဇာတိယာ ဥက္ကဋ္ဌာဒီနံ သာမညဝသေန. ပမာဏတောတိ ပရိစ္ဆေဒတော. တယော ပတ္တာတိ ပါဌသေသော.

၆၁. ‘‘မဂဓေသူ’’တိ ဝတ္တဗ္ဗေ မဂဓေတိ ဝစနဝိပလ္လာသေန ဝါ ‘‘ပစ္စာသာ သတီ’’တိအာဒီသု ဝိယ သု-သဒ္ဒလောပေန ဝါ ဝုတ္တံ. နာဠိဒွယတဏ္ဍုလသာဓိတန္တိ ဧတ္ထ မဂဓာပေက္ခောပိ နာဠိ-သဒ္ဒေါ ဒွယ-သဒ္ဒေန သမာသော ဟောတိ ဂမ္မကတ္တာတိ နာဠိယာ ဒွယံ နာဠိဒွယံ. တတ္ထ မဂဓနာဠိ နာမ အဍ္ဎတေရသပလာ ဟောတိ. ဧတ္ထ စ အဍ္ဎတေရသပလာနိ မာသာနန္တိ ဝဒန္တိ. နာဠိဒွယေန ပမိတာ တဏ္ဍုလာ သုကောဋ္ဋိတပရိသုဒ္ဓါ အနုပဟတပုရာဏသာလိတဏ္ဍုလာ နာဠိဒွယတဏ္ဍုလာ၊ တေဟိ သာဓိတံ ပစိတန္တိ အတ္ထော. ဩဒနန္တိ သမ္မာ သမ္ပာဒိတံ အဝဿာဝိတောဒနံ. သူပန္တိ ဩဒနဿ စတုတ္ထဘာဂပ္ပမာဏံ နာတိဃနံ နာတိတနုကံ ဟတ္ထဟာရိယံ သဗ္ဗသမ္ဘာရသင်္ခတံ မုဂ္ဂသုပံ. ဗျဉ္ဇနဉ္စ တဒူပိယန္တိ တဿ ဩဒနဿ ဥပိယံ အနုရူပံ ယာဝ စရိမာလောပပ္ပဟောနကံ မစ္ဆမံသာဒိဗျဉ္ဇနဉ္စ ဥက္ကဋ္ဌော ဂဏှာတီတိ သမ္ဗန္ဓော.

၆၂. တဿာတိ ယထာဝုတ္တဩဒနာဒိနော. ဥပဍ္ဎောတိ ဥပဍ္ဎံ နာဠိကောဒနာဒိ အဿ အတ္ထီတိ ဥပဍ္ဎော. ဧဝ-ကာရေန အတိရေကံ နိဝတ္တေတိ. တတောတိ ယထာဝုတ္တနာဠိကောဒနာဒိတော. ဥက္ကဋ္ဌတော ဥက္ကဋ္ဌော စ ဩမကောမကော စ အပတ္တောတိ ယောဇနာ. ဩမကတော ဩမကော ဩမကောမကော. ဣမိနာ ပုန ပတ္တဒွယဒဿနေန ပမာဏတော တယောပိ ပတ္တာ ဝိဘာဂတော နဝ ဟောန္တီတိ ဒီပေတိ. တတ္ထ ယသ္မိံ မဂဓနာဠိဒွယတဏ္ဍုလောဒနာဒိကံ သဗ္ဗမ္ပိ ဝဍ္ဎနပက္ခေ ဌိတံ ပက္ခိတ္တံ သစေ ပတ္တဿ မုခဝဋ္ဋိယာ ဟေဋ္ဌိမရာဇိသမံ တိဋ္ဌတိ၊ သုတ္တေန ဝါ ဟီရေန ဝါ ဆိန္ဒန္တဿ သုတ္တဿ ဝါ ဟီရဿ ဝါ ဟေဋ္ဌိမန္တံ ဖုသတိ၊ အယံ ဥက္ကဋ္ဌော နာမ ပတ္တော. သစေ တံ ရာဇိံ အတိက္ကမ္မ ထူပီကတံ တိဋ္ဌတိ၊ အယံ ဥက္ကဋ္ဌောမကော နာမ ပတ္တော. သစေ တံ ရာဇိံ န သမ္ပာပုဏာတိ အန္တောဂတမေဝ၊ အယံ ဥက္ကဋ္ဌုက္ကဋ္ဌော နာမ ပတ္တော. ‘‘ဧကံ နာဠိကောဒနာဒိ သဗ္ဗမ္ပိ ပက္ခိတ္တံ ဝုတ္တနယေနေဝ ဟေဋ္ဌိမရာဇိသမံ တိဋ္ဌတိ၊ အယံ မဇ္ဈိမော နာမ ပတ္တော’’တိအာဒိနာ မဇ္ဈိမမဇ္ဈိမောမကမဇ္ဈိမုက္ကဋ္ဌာ စ ‘‘ယတ္ထ ဥပဍ္ဎနာဠိကောဒနာဒိ သဗ္ဗမ္ပိ ပက္ခိတ္တံ ဟေဋ္ဌိမရာဇိသမံ တိဋ္ဌတိ၊ အယံ ဩမကော နာမ ပတ္တော’’တိအာဒိနာ ဩမကဩမကောမကဩမကုက္ကဋ္ဌာ စ ပတ္တာ ဥက္ကဋ္ဌေ ဝုတ္တနယေနေဝ ဝေဒိတဗ္ဗာ. တေသု ဒွေ အပတ္တာ ဘာဇနပရိဘောဂေန ပရိဘုဉ္ဇိတဗ္ဗာ၊ နာဓိဋ္ဌာနူပဂါ၊ န ဝိကပ္ပနူပဂါ.

၆၃. ကပ္ပေါ သကော အတိရေကပတ္တော ဒသာဟပရမံ ဓာရေယျာတိ ယောဇနာ. တတ္ထ ကပ္ပေါတိ ကပ္ပိယော. သကောတိ အတ္တနော သန္တကော. ကပ္ပိယတ္တာ ပန အတ္တသန္တကတ္တာ စ သတ္တန္နမ္ပိ အဓိဋ္ဌာနဝိကပ္ပနူပဂတာ ဝေဒိတဗ္ဗာ. တတ္ထ အယောပတ္တော ပဉ္စဟိ ပါကေဟိ၊ မတ္တိကာပတ္တော ဒွီဟိ ပါကေဟိ ပက္ကော အဓိဋ္ဌာနူပဂေါ စ ဝိကပ္ပနူပဂေါ စ၊ တထာ ဥဘောပိ ကာကဏိကမတ္တဿာပိ မူလဿ အနဝသေသေတွာ ဒိန္နေ၊ သဗ္ဗသော အတ္တသန္တကတ္တေ ဝိညာတေ စ အဓိဋ္ဌာနဝိကပ္ပနူပဂါတိ ဒဋ္ဌဗ္ဗံ. အတိရေကပတ္တောတိ အနဓိဋ္ဌိတာဝိကပ္ပိတတာယ အတိရေကပတ္တော. အဓိဋ္ဌာနပစ္စုဒ္ဓါရာ ပနေတ္ထ စီဝရေ ဝုတ္တာဝ. ဝိကပ္ပေန္တေန ပန ပတ္တာနံ ဧကဗဟုဘာဝံ၊ သန္နိဟိတာသန္နိဟိတဘာဝဉ္စ ဉတွာ ‘‘ဣမံ ပတ္တ’’န္တိ ဝါ ‘‘ဣမေ ပတ္တေ’’တိ ဝါ ‘‘ဧတံ ပတ္တ’’န္တိ ဝါ ‘‘ဧတေ ပတ္တေ’’တိ ဝါ ဝတွာ ‘‘တုယှံ ဝိကပ္ပေမီ’’တိ ဝတ္တဗ္ဗံ. သမ္မုခါဒိဘေဒေါ ပနေတ္ထ စီဝရေ ဝက္ခမာနနယေန ဝေဒိတဗ္ဗော. ဒသာဟပရမန္တိ ဒသ အဟာနိ ပရမော ပရိစ္ဆေဒေါ အဿာတိ ဒဟာဟပရမော၊ ကာလော၊ တံ. အစ္စန္တသံယောဂေ ဥပယောဂဝစနံ. ဓာရေယျောတိ ပရိဘောဂဝသေန ဓာရေတဗ္ဗော. တသ္မိံကာလေ အတိနာမိတေ ပတ္တော နိဿဂ္ဂိယော ဟောတီတိ ယောဇနာ. အတိနာမိတေတိ အတိက္ကာမိတေ နိဿဂ္ဂိယော ဟောတိ၊ ဧကာဒသေ အရုဏုဂ္ဂမနေ သံဃဿ ဝါ ဂဏဿ ဝါ ပုဂ္ဂလဿ ဝါ ပဒဘာဇနီယေ (ပါရာ. ၆၀၂) ဝုတ္တနယေန ပတ္တော နိဿဇ္ဇိတဗ္ဗော ဟောတိ၊ တထာ သတိ ပါစိတ္တိယာပတ္တိ စဿ ဟောတီတိ အဓိပ္ပါယော.

၆၄. ‘‘အစ္ဆေဒါ’’တိအာဒိ စီဝရေ ဝုတ္တနယတ္တာ ဥတ္တာနမေဝ. အယံ ပန ဝိသေသော – မရဏုဒ္ဓဋာတိ ဥဒ္ဓရဏံ ဥဒ္ဓဠံ၊ ပစ္စုဒ္ဓါရော. မရဏဉ္စ ဥဒ္ဓဋဉ္စ မရဏုဒ္ဓဋာ၊ တသ္မာ. ဆိဒ္ဒေနာတိ ယေန ကင်္ဂုသိတ္ထံ နိက္ခမတိ စေဝ ပဝိသတိ စ၊ တေန မုခဝဋ္ဋိတော ဟေဋ္ဌာ ဒွင်္ဂုလဆိဒ္ဒေန. ပတ္တာဓိဋ္ဌာနမုဇ္ဈတီတိ ပတ္တော အဓိဋ္ဌာနံ ဥဇ္ဈတိ ဝိဿဇ္ဇတိ.

၆၅. ဣဒါနိ ‘‘ပတ္တ’’န္တိအာဒိနာ အညထာ ပရိဟရဏေ ဒုက္ကဋံ ဒဿေတိ. တတ္ထ သောဒကံ ပတ္တံ န ပဋိသာမေယျာတိ ယောဇနာ. န ပဋိသာမေယျာတိ ဂုတ္တဋ္ဌာနေ န နိက္ခိပေယျ၊ ‘‘သောဒကံ ပတ္တံ ဥဏှေ န စ ဩတပေ’’တိအာဒိနာ စ ယောဇနီယံ. န စ ဩတပေတိ နေဝ ဤသကံ တာပေယျ. န နိဒဟေတိ နိရုဒကံ ကတွာပိ ဘုသံ န နိဒဟေယျ၊ ဝေါဒကံ ကတွာ ဤသကံ တာပေယျာတိပိ ဗျတိရေကတ္ထော. ဘူမျာ န ဌပေတိ ခရာယ ဘူမိယာ န ဌပေယျ. ယတ္ထ ပန ဝဏ္ဏော န ဒုဿတိ၊ ဧဝရူပါယ မတ္တိကာယ ပရိဘဏ္ဍကတာယ ဘူမိယာ ဝါ တထာရူပါယ ဧဝ ဝါလိကာယ ဝါ နိက္ကုဇ္ဇိတွာ ဥက္ကုဇ္ဇိတွာ ဌပေတုံ ဝဋ္ဋတိ. နော စ လဂ္ဂယေတိ ဘိတ္တိခိလာဒီသု န ဩလမ္ဗေယျ.

၆၆. ‘‘မိဍ္ဎန္တေ ဝါ’’တိအာဒိနာ ဝတွာ ပတ္တံ ဌပေတုံ န စ ကပ္ပတီတိ ယောဇေတဗ္ဗံ. မိဍ္ဎန္တေတိ အာဠိန္ဒကမိဍ္ဎိကာဒီနံ မိဍ္ဎီနံ အန္တေ. သစေ ပန ပရိဝတ္တေတွာ တတ္ထေဝ ပတိဋ္ဌာတိ၊ ဧဝရူပါယ ဝိတ္ထိဏ္ဏာယ မိဍ္ဎိယာ ဌပေတုံ ဝဋ္ဋတိ. ပရိဘဏ္ဍန္တေ ဝါတိ ဗာဟိရပဿေ ကတာယ တနုကာယ မိဍ္ဎိကာယ အန္တေ ဝါ. ဧတ္ထ ဝါ-သဒ္ဒေါ သမုစ္စယေ၊ သော စ ပစ္စေကံ ယောဇေတဗ္ဗော. အင်္ကေ ပန အံသဗဒ္ဓကေန အံသကူဋေ လဂ္ဂေတွာ ဌပေတုဉ္စ ဝဋ္ဋတိ. ဆတ္တေပိ ဘဏ္ဍကေန သဒ္ဓိံ ဗန္ဓိတွာ ဝါ အဋ္ဋံ ကတွာ ဝါ ဌပေတုံ ဝဋ္ဋတိ. မဉ္စေပိ အညေန သဒ္ဓိံ ဗန္ဓိတွာ ဌပေတုံ၊ အဋနိယံ ဗန္ဓိတွာ ဩလမ္ဗေတုံ ဝဋ္ဋတိ.

၆၇. ပတ္တေန ဥစ္ဆိဋ္ဌောဒကဉ္စ စလကဋ္ဌိကဉ္စ န နီဟရေယျာတိ သမ္ဗန္ဓော. ဥစ္ဆိဋ္ဌောဒကန္တိ မုခဝိက္ခာလနောဒကံ. စလကာနိ စ စဗ္ဗေတွာ အပဝိဒ္ဓါမိသာနိ အဋ္ဌိကာနိ မစ္ဆမံသအဋ္ဌိကာနိ စ စလကဋ္ဌိကံ. ပတ္တံ ပဋိဂ္ဂဟံ ကတွာ ဟတ္ထံ ဓောဝိတုမ္ပိ ဟတ္ထဓောတာဒိ ဥဒကမ္ပိ ပတ္တေ အာကိရိတွာ နီဟရိတုမ္ပိ အနုစ္ဆိဋ္ဌံ သုဒ္ဓပတ္တံ ဥစ္ဆိဋ္ဌဟတ္ထေန ဂဏှိတုမ္ပိ န ဝဋ္ဋတိ. မစ္ဆမံသဖလာဖလာဒီနိ ခါဒန္တော ယံ တတ္ထ အဋ္ဌိံ ဝါ စလကံ ဝါ ဆဍ္ဍေတုကာမော ဟောတိ၊ တံ ပတ္တေ ဌပေတုံ န လဘတိ. မုခတော နီဟဋံ ပန ယံ ကိဉ္စိ ပုန အခါဒိတုကာမော ပတ္တေ ဌပေတုံ န လဘတိ. သိင်္ဂိဝေရာဒီနိ ဍံသိတွာ ပုန ဌပေတုံ လဘတိ. ပတ္တဟတ္ထောတိ ပတ္တော ဟတ္ထေ ယဿာတိ ဝိဂ္ဂဟော. ‘‘ပတ္တဟတ္ထော၊ ကဝါဋ’’န္တိ စ ဥပလက္ခဏမေတံ. ယတ္ထ ကတ္ထစိ သရီရာဝယဝေ ပန ပတ္တသ္မိံ သတိ ယေန ကေနစိ သရီရာဝယဝေန ကဝါဋံ ပဏာမေတုံ၊ ဃဋိကံ ဝါ ဥက္ခိပိတုံ၊ သူစိံ ဝါ ကုဉ္စိကာယ အဝါပုရိတုံ န လဘတိ. အံသကူဋေ ပန ပတ္တံ လဂ္ဂေတွာ ယထာသုခံ အဝါပုရိတုံ လဘတိ.

၆၈. ဘူမိယာ ဘူမိသမ္ဗန္ဓီ အာဓာရကော၊ တသ္မိံ ဒန္တဝလ္လိဝေတ္တာဒီဟိ ကတေ ဝလယာဓာရကေ စ ဧကဒါရုနာ ကတေ ဒါရုအာဓာရကေ စ ဗဟူဟိ ဒဏ္ဍေဟိ ကတေ ဒဏ္ဍာဓာရကေ စ ယတ္ထ ဌပိတော ပတ္တော ယထာ ပရိဝတ္တိတွာ န ပရိပတတိ၊ တထာ သုဋ္ဌု သဇ္ဇိတေ တသ္မိံ ပတ္တဿုပရိ ပတ္တောတိ ဧဝရူပေ ဒုဝေ ပတ္တေ ဌပေယျာတိ ပဒတ္ထယောဇနာ. ဘမကောဋိသဒိသော ပန ဒါရုအာဓာရကော တီဟိ ဒဏ္ဍကေဟိ ဗဒ္ဓေါ ဒဏ္ဍာဓာရကော စ ဧကဿပိ ပတ္တဿ အနောကာသော၊ တတ္ထ ဌပေတွာပိ ဟတ္ထေန ဂဟေတွာ နိသီဒိတဗ္ဗံ. ဘူမိယန္တိ ကဋသာရကာဒိနာ အတ္ထတာယ ဘူမိယာ ပန နိက္ကုဇ္ဇိတွာ ဝါ ပဋိကုဇ္ဇိတွာ ဝါ ဧကံ ပတ္တံ ဌပေယျာတိ ယောဇနာ.

၆၉. ဣဒါနိ အကပ္ပိယပတ္တေ ဒဿေတိ ‘‘ဒါရူ’’တိအာဒိနာ. တတ္ထ သုဝဏ္ဏမေဝ သောဝဏ္ဏံ. ဒါရု စ ရူပိယဉ္စ သောဝဏ္ဏဉ္စ မဏိ စ ဝေဠုရိယဉ္စ ဒါရု။ပေ။ ဝေဠုရိယာနိ၊ တေဟိ နိဗ္ဗတ္တာ ဒါရု။ပေ။ မယာ. ဒီဃော ပန ‘‘ဝေဠုရိယာမယာ’’တိ ဂါထာဗန္ဓသုခတ္ထံ ကတော. ဧဝမုပရိပိ တာဒိသံ ဝိညေယျံ. တတ္ထ ဣန္ဒနီလာဒိ မဏိ နာမ. ကံသော စ ကာစော စ တိပု စ သီသဉ္စ ဖလိကာ စ တမ္ဗလောဟော စာတိ ဒွန္ဒော၊ တေဟိ ဇာတာ ကံသ။ပေ။ ဇာ. တတ္ထ ကံသ-သဒ္ဒေန ဝဋ္ဋလောဟောပိ သင်္ဂဟိတော. သေတံ တိပု၊ ကဏှံ သီသံ.

၇၀. ဆဝသီသမယောတိ ဆဝဿ မတမနုဿဿ သီသံ သီသကပါလံ၊ တေန နိဗ္ဗတ္တော ဆဝသီသမယော. ဃဋိ စ တုမ္ဗဉ္စ၊ တေသံ ကဋာဟော၊ တေဟိ ဇာတာတိ ဃဋိတုမ္ဗကဋာဟဇာ. တတ္ထ ဃဋီတိ ဃဋောယေဝ. တုမ္ဗံ အလာဗု. ဣတိ ဣမေ သဗ္ဗေ ပတ္တာ အကပ္ပိယာ ဝုတ္တာ၊ ဒုက္ကဋဝတ္ထုကာ စ ဝုတ္တာတိ ယောဇနာ. တတ္ထ ရူပိယာဒီသု စတူသု သစေ ဂိဟီ ဘတ္တဂ္ဂေသု သုဝဏ္ဏတဋ္ဋကာဒီသု ဗျဉ္ဇနံ ကတွာ ဥပနာမေန္တိ၊ အာမသိတုံ န ဝဋ္ဋတိ. ကံသကာစဖလိကဇာနိ ပန တဋ္ဋကာဒီနိ ဘာဇနာနိ ပုဂ္ဂလိကပရိဘောဂေနေဝ န ဝဋ္ဋန္တိ၊ သံဃိကပရိဘောဂေန ဝါ ဂိဟိဝိကဋာနိ ဝါ ဝဋ္ဋန္တိ. ဃဋိတုမ္ဗကဋာဟဇာ ပန လဘိတွာ ပရိဟရိတုံ န ဝဋ္ဋန္တိ၊ တာဝကာလိကံ ပရိဘုဉ္ဇိတုံ ဝဋ္ဋန္တိ.

ပတ္တနိဒ္ဒေသဝဏ္ဏနာ နိဋ္ဌိတာ.