၄၉. စတုရာရက္ခနိဒ္ဒေသဝဏ္ဏနာ

၄၆၁-၂. ဗုဒ္ဓါနုဿတိ ။ပေ။ မရဏဿတီတိ ဣမာ စတုရာရက္ခာ နာမာတိ သေသော. အာရကတ္တာဒိနာတိ အာရကဘာဝေါ အာရကတ္တံ၊ တံ အာဒိ ယဿ ‘‘အရီနံ ဟတတ္တာ’’တိအာဒိကဿ တံ အာရကတ္တာဒိ. တေန တေန မဂ္ဂေန သဝါသနာနံ အရာနံ ဟတတ္တာ အာရကာ သဗ္ဗကိလေသေဟိ သုဝိဒူရဝိဒူရေ ဌိတောတိ အာ-ကာရဿ ရဿတ္တံ၊ က-ကာရဿ ဟ-ကာရံ သာနုနာသိကံ ကတွာ ‘‘အရဟ’’န္တိ ပဒသိဒ္ဓိ ဝေဒိတဗ္ဗာ. ‘‘အာရကာ’’တိ စ ဝုတ္တေ သာမညဇောတနာယ ဝိသေသေ အဝဋ္ဌာနတော၊ ဝိသေသတ္ထိနာ စ ဝိသေသဿ အနုပ္ပယောဇိတဗ္ဗတ္တာ ‘‘ကိလေသေဟီ’’တိ လဗ္ဘတိ.

သမ္မာတိ အဝိပရီတံ. သာမန္တိ သယမေဝ၊ အပရနေယျော ဟုတွာတိ အတ္ထော. ‘‘သမ္ဗုဒ္ဓေါ’’တိ ဟိ ဧတ္ထ သံ-သဒ္ဒေါ ‘‘သယ’’န္တိ ဧတဿ အတ္ထဿ ဗောဓကော ဒဋ္ဌဗ္ဗော. ဗုဒ္ဓတောတိ ဘာဝပ္ပဓာနောယံ နိဒ္ဒေသော၊ ဗုဒ္ဓတ္တာတိ အတ္ထော. ‘‘အရဟံ’’ ဣတိ ဝါ ‘‘သမ္မာသမ္ဗုဒ္ဓေါ’’ ဣတိ ဝါ ဘဂဝတော နဝဘေဒေ ဂုဏေ ယာ ပုနပ္ပုနံ အနုဿတိ၊ သာ ဗုဒ္ဓါနုဿတီတိ ယောဇနာ. ‘‘သမ္မာသမ္ဗုဒ္ဓေါ ဣတီ’’တိ ဝတ္တဗ္ဗေ အ-ကာရော သန္ဓိဝသေန အာဂတော. ဣတိ-သဒ္ဒေါ ပနေတ္ထ အာဒိအတ္ထော၊ ဣစ္စာဒီတိ အတ္ထော. နဝဘေဒေတိ ‘‘အနုတ္တရော ပုရိသဒမ္မသာရထီ’’တိ ဧကတော ဂဟေတွာ. ဧတ္ထ ပန ဥပစာရော ဥပ္ပဇ္ဇတိ၊ န အပ္ပနာ၊ တထာ မရဏဿတိယံ. ဣတရေသု ပန ဥဘယမ္ပိ ဥပ္ပဇ္ဇတီတိ ဝေဒိတဗ္ဗံ. ဗုဒ္ဓါနုဿတိ.

၄၆၃-၄. ‘‘သီမဋ္ဌာ’’တိအာဒိနာ မေတ္တာဘာဝနံ ဒဿေတိ. သီမဋ္ဌသံဃေတိ သီမာယံ တိဋ္ဌတီတိ သီမဋ္ဌော၊ သောဝ သံဃော. ဂေါစရဂါမမှိ ဣဿရေ ဇနေတိ သမ္ဗန္ဓော. တတ္ထ မာနုသေ ဥပါဒါယ သဗ္ဗသတ္တေသူတိ ယောဇေတဗ္ဗံ. တတ္ထာတိ တသ္မိံ ဂါမေ. သုခိတာ ဟောန္တု အဝေရာတိ ပဒစ္ဆေဒေါ. အာဒိနာတိ ‘‘အဗျာပဇ္ဇာ ဟောန္တု၊ အနီဃာ ဟောန္တု၊ သုခီ အတ္တာနံ ပရိဟရန္တူ’’တိ ဣမိနာ. ပရိစ္ဆိဇ္ဇ ပရိစ္ဆိဇ္ဇာတိ ‘‘ဣမသ္မိံ ဝိဟာရေ သဗ္ဗေ ဘိက္ခူ’’တိအာဒိနာ ဧဝမ္ပိ ပရိစ္ဆိန္ဒိတွာ ပရိစ္ဆိန္ဒိတွာ. မေတ္တာဘာဝနာ.

၄၆၅-၆. ဣဒါနိ အသုဘံ နိဒ္ဒိသန္တော သဗ္ဗပဌမံ သာဓေတဗ္ဗံ သတ္တဝိဓမုဂ္ဂဟကောသလ္လံ ‘‘ဝဏ္ဏေ’’စ္စာဒိနာ ဒဿေတိ. သတ္တဝိဓဉှိ တံ နယတော အာဂတံ ဝါစာသဇ္ဈာယမနသာသဇ္ဈာယေဟိ သဒ္ဓိံ. တတ္ထ ပဌမံ ဝါစာယ သဇ္ဈာယန္တေန စတ္တာရိ တစပဉ္စကာဒီနိ ပရိစ္ဆိန္ဒိတွာ အနုလောမပ္ပဋိလောမဝသေန ကာတဗ္ဗံ. ယထာ ပန ဝစသာ၊ တထေဝ မနသာပိ သဇ္ဈာယော ကာတဗ္ဗော. ဝစသာ သဇ္ဈာယော ဟိ မနသာ သဇ္ဈာယဿ ပစ္စယော. သော ပန လက္ခဏပ္ပဋိဝေဓဿ ပစ္စယော. တတ္ထ ဝဏ္ဏော နာမ ကေသာဒီနံ ဝဏ္ဏော. သဏ္ဌာနံ တေသံယေဝ သဏ္ဌာနံ. ဩကာသော တေသံယေဝ ပတိဋ္ဌောကာသော. ဒိသာ နာဘိတော ဥဒ္ဓံ ဥပရိမဒိသာ၊ အဓော ဟေဋ္ဌိမာ. ပရိစ္ဆေဒေါ နာမ ‘‘အယံ ကောဋ္ဌာသော ဟေဋ္ဌာ စ ဥပရိ စ တိရိယဉ္စ ဣမိနာ နာမ ပရိစ္ဆိန္နော’’တိ ဧဝံ သဘာဂပရိစ္ဆေဒေါ စေဝ ‘‘ကေသာ န လောမာ၊ လောမာ န ကေသာ’’တိ ဧဝံ အမိဿကတာဝသေန ဝိသဘာဂပရိစ္ဆေဒေါ စ. ကေသာဒိကောဋ္ဌာသေ ဝဝတ္ထပေတွာတိ သမ္ဗန္ဓော. ဝဝတ္ထပေတွာတိ ဝုတ္တနယေန ဝဝတ္ထပေတွာ.

ဧဝံ ဝဝတ္ထပေန္တေန ယထာဝုတ္တံ သတ္တဝိဓံ ဥဂ္ဂဟကောသလ္လံ သမ္ပာဒေတွာ အဋ္ဌာရသဝိဓံ မနသိကာရကောသလ္လံ သမ္ပာဒေတဗ္ဗန္တိ ဒဿေတုံ ‘‘အနုပုဗ္ဗတော’’တိအာဒိမာဟ. တတ္ထ အပ္ပနာတော တယော စ သုတ္တန္တာတိ ဣမေ စတ္တာရောပိ နယတောဝါဂတေ နာတိသီဃာဒီသု ပက္ခိပိတွာ ဒသဝိဓတာ ဝေဒိတဗ္ဗာ. အနုပုဗ္ဗတောတိ သဇ္ဈာယကရဏတော ပဋ္ဌာယ အနုပဋိပါဋိယာ. နာတိသီဃံ နာတိသဏိကံ ကတွာတိ ကိရိယာဝိသေသနံ. ဝိက္ခေပံ ပဋိဗာဟယန္တိ ကမ္မဋ္ဌာနံ ဝိဿဇ္ဇေတွာ ဗဟိဒ္ဓါ ပုထုတ္တာရမ္မဏေ စေတသော ဝိက္ခေပံ ပဋိဗာဟန္တော. ပဏ္ဏတ္တိံ သမတိက္ကမ္မာတိ ယာယံ ‘‘ကေသာ လောမာ’’တိ ပဏ္ဏတ္တိ၊ တံ အတိက္ကမိတွာ၊ ‘‘ပဋိက္ကူလ’’န္တိ စိတ္တံ ဌပေတွာတိ အဓိပ္ပါယော. အနုပုဗ္ဗတော မုဉ္စန္တဿာတိ ယော ယော ကောဋ္ဌာသော န ဥပဋ္ဌာတိ၊ တံ တံ အနုက္ကမေန မုဉ္စတော၊ တဿ ‘‘ဘာဝနာ’’တိ ဣမိနာ သမ္ဗန္ဓော ဝေဒိတဗ္ဗော.

၄၆၇. ဧဝံ ဥဘယကောသလ္လံ သမ္ပာဒေတွာ သဗ္ဗကောဋ္ဌာသေ ဝဏ္ဏာဒိဝသေန ဝဝတ္ထပေတွာ ဝဏ္ဏာဒိဝသေနေဝ ပဉ္စဓာ ပဋိက္ကူလတာ ဝဝတ္ထပေတဗ္ဗာတိ ဒဿေတုံ ‘‘ဝဏ္ဏာ’’တိအာဒိမာဟ. ဝဏ္ဏ။ပေ။ ဩကာသေဟိ ကောဋ္ဌာသေ ပဋိက္ကူလာတိ ဘာဝနာ အသုဘန္တိ ယောဇနာ. တတြ ကေသာ တာဝ ပကတိဝဏ္ဏေန ကာဠကာ အဒ္ဒါရိဋ္ဌကဝဏ္ဏာ၊ သဏ္ဌာနတော ဒီဃဝဋ္ဋတုလာဒဏ္ဍသဏ္ဌာနာ၊ ဒိသတော ဥပရိမဒိသာယ ဇာတာ၊ ဩကာသတော ဥဘောသု ပဿေသု ကဏ္ဏစူဠိကာဟိ၊ ပုရတော နဠာဋန္တေန၊ ပစ္ဆတော ဂဠဝါဋကေန ပရိစ္ဆိန္နာ၊ သီသကဋာဟဝေဌနအလ္လစမ္မံ ကေသာနံ ဩကာသော. ပရိစ္ဆေဒတော ကေသာ သီသဝေဌနစမ္မေ ဝီဟဂ္ဂမတ္တံ ပဝိသိတွာ ပတိဋ္ဌိတေန ဟေဋ္ဌာ အတ္တနော မူလတလေန၊ ဥပရိ အာကာသေန၊ တိရိယံ အညမညေန ပရိစ္ဆိန္နာ. ဒွေ ကေသာ ဧကတော နတ္ထီတိ အယံ သဘာဂပရိစ္ဆေဒေါ. ‘‘ကေသာ န လောမာ၊ လောမာ န ကေသာ’’တိ ဧဝံ အဝသေသဧကတိံ သကောဋ္ဌာသေဟိ အမိဿီကတာ ကေသာ နာမ ပါဋိယေက္ကော ဧကော ကောဋ္ဌာသောတိ အယံ ဝိသဘာဂပရိစ္ဆေဒေါ. ဣဒံ ကေသာနံ ဝဏ္ဏာဒိတော နိစ္ဆယနံ. ဣဒံ ပန နေသံ ဝဏ္ဏာဒိဝသေန ပဉ္စဓာ ပဋိက္ကူလတော နိစ္ဆယနံ – ကေသာ နာမေတေ ဝဏ္ဏတောပိ ပဋိက္ကူလာ အာသယတောပိ သဏ္ဌာနတောပိ ဂန္ဓတောပိ ဩကာသတောပိ ပဋိက္ကူလာတိ ဧဝံ သေသကောဋ္ဌာသာနမ္ပိ ယထာယောဂံ ဝေဒိတဗ္ဗံ.

ဥဒ္ဓုမာတာဒိဝတ္ထူသူတိ ဥဒ္ဓုမာတကဝိနီလကဝိပုဗ္ဗကဝိစ္ဆိဒ္ဒကဝိက္ခာယိတကဝိက္ခိတ္တကဟတဝိ- က္ခိတ္တကလောဟိတကပုဠဝကအဋ္ဌိကသင်္ခါတေသု ဒသေသု အဝိညာဏကအသုဘဝတ္ထူသု အသုဘာကာရံ ဂဟေတွာ ပဝတ္တာ ဘာဝနာ ဝါ အသုဘန္တိ သမ္ဗန္ဓော. အသုဘဘာဝနာ.

၄၆၈. ‘‘မရဏံ မေ ဘဝိဿတီ’’တိ ဝါ ‘‘ဇီဝိတံ မေ ဥပရုဇ္ဈတီ’’တိ ဝါ ‘‘မရဏံ မရဏ’’န္တိ ဝါ ယောနိသော ဘာဝယိတွာနာတိ ယောဇနာ. ဇီဝိတန္တိ ရူပဇီဝိတိန္ဒြိယဉ္စ အရူပဇီဝိတိန္ဒြိယဉ္စ. ယောနိသောတိ ဥပါယေန. ဧဝံ ပဝတ္တယတောယေဝ ဟိ ဧကစ္စဿ နီဝရဏာနိ ဝိက္ခမ္ဘန္တိ၊ မရဏာရမ္မဏာ သတိ သဏ္ဌာတိ၊ ဥပစာရပ္ပတ္တမေဝ ကမ္မဋ္ဌာနံ ဟောတိ.

၄၆၉-၄၇၀. ယဿ ပန ဧတ္တာဝတာ န ဟောတိ၊ တေန ဝဓကပစ္စူပဋ္ဌာနာဒီဟိ အဋ္ဌဟာကာရေဟိ မရဏံ အနုဿရိတဗ္ဗန္တိ ဒဿေတုံ ‘‘ဝဓကဿေဝါ’’တိအာဒိမာဟ. ဝဓကဿ ဣဝ ဥပဋ္ဌာနာတိ ‘‘ဣမဿ သီသံ ဆိန္ဒိဿာမီ’’တိ အသိံ ဂဟေတွာ ဂီဝါယ သဉ္စာရယမာနဿ ဝဓကဿ ဝိယ မရဏဿ ဥပဋ္ဌာနတော. သမ္ပတ္တီနံ ဝိပတ္တိတောတိ ဘောဂသမ္ပတ္တိယာ ဇီဝိတသမ္ပတ္တိယာ စ ဝိနာသမရဏသင်္ခါတဝိပတ္တိတော. ဥပသံဟရတောတိ ယသမဟတ္တတော ပုညမဟတ္တတော ထာမမဟတ္တတော ဣဒ္ဓိမဟတ္တတော ပညာမဟတ္တတော ပစ္စေကဗုဒ္ဓတော သမ္မာသမ္ဗုဒ္ဓတောတိ ဣမေဟိ သတ္တဟာကာရေဟိ အတ္တနော ဥပသံဟရဏတော. ကာယဗဟုသာဓာရဏာတိ အသီတိယာ ကိမိကုလာနံ၊ အနေကသတာနံ ရောဂါနံ၊ ဗာဟိရာနဉ္စ အဟိဝိစ္ဆိကာဒီနံ မရဏဿ ပစ္စယာနံ သာဓာရဏတော. အာယုဒုဗ္ဗလတောတိ အဿာသပဿာသူပနိဗဒ္ဓတ္တဣရိယာပထူပနိဗဒ္ဓတ္တာဒိနာ အာယုနော ဒုဗ္ဗလတော. ကာလဝဝတ္ထာနဿ အဘာဝတောတိ ‘‘ဣမသ္မိံယေဝ ကာလေ မရိတဗ္ဗံ၊ န အညသ္မိ’’န္တိ ဧဝံ ကာလဝဝတ္ထာနဿ အဘာဝတော. အဒ္ဓါနဿ ပရိစ္ဆေဒါတိ ‘‘မနုဿာနံ ဇီဝိတဿ ပရိစ္ဆေဒေါ နာမ ဧတရဟိ ပရိတ္တော၊ အဒ္ဓါ ယော စိရံ ဇီဝတိ၊ သော ဝဿသတံ ဇီဝတီ’’တိ ဧဝံ အဒ္ဓါနဿ ကာလဿ ပရိစ္ဆေဒတော.

ဧတ္ထ ပန ကမ္မဋ္ဌာနံ ဘာဝေတွာ ဝိပဿနာယ သဟ ပဋိသမ္ဘိဒါဟိ အရဟတ္တံ ပတ္တုကာမေန ဗုဒ္ဓပုတ္တေန ယံ ကာတဗ္ဗံ၊ တံ အာဒိကမ္မိကဿ ကုလပုတ္တဿ ဝသေန အာဒိတော ပဋ္ဌာယ သင်္ခေပေနောပဒိဿာမ. စတုဗ္ဗိဓံ တာဝ သီလံ သောဓေတဗ္ဗံ. တတ္ထ တိဝိဓာ ဝိသုဇ္ဈနာ အနာပဇ္ဇနံ၊ အာပန္နဝုဋ္ဌာနံ၊ ကိလေသေဟိ စ အပ္ပဋိပီဠနံ. ဧဝံ ဝိသုဒ္ဓသီလဿ ဟိ ဘာဝနာ သမ္ပဇ္ဇတိ. ယမ္ပိဒံ စေတိယင်္ဂဏဝတ္တာဒီနံ ဝသေန အာဘိသမာစာရိကသီလံ ဝုစ္စတိ၊ တမ္ပိ သာဓုကံ ပရိပူရေတဗ္ဗံ. တတော –

‘‘အာဝါသော စ ကုလံ လာဘော၊ ဂဏော ကမ္မဉ္စ ပဉ္စမံ၊

အဒ္ဓါနံ ဉာတိ အာဗာဓော၊ ဂန္ထော ဣဒ္ဓီတိ တေ ဒသာ’’တိ. (ဝိသုဒ္ဓိ. ၁.၄၁) –

ဧဝံ ဝုတ္တေသု ဒသသု ပလိဗောဓေသု ယော ပလိဗောဓော၊ ယော ဥပစ္ဆိန္ဒိတဗ္ဗော. ဧဝံ ဥပစ္ဆိန္နပလိဗောဓေန –

‘‘ပိယော ဂရု ဘာဝနီယော၊ ဝတ္တာ စ ဝစနက္ခမော၊

ဂမ္ဘီရဉ္စ ကထံ ကတ္တာ၊ နော စာဋ္ဌာနေ နိယောဇကော’’တိ. (အ. နိ. ၇.၃၇) –

ဧဝံ ဝုတ္တလက္ခဏံ အာစရိယံ ဥပသင်္ကမိတွာ ကမ္မဋ္ဌာနံ ဥဂ္ဂဟေတဗ္ဗံ. တံ ဒုဝိဓံ ဟောတိ သဗ္ဗတ္ထကကမ္မဋ္ဌာနဉ္စ ပါရိဟာရိယကမ္မဋ္ဌာနဉ္စ. တတ္ထ သဗ္ဗတ္ထကကမ္မဋ္ဌာနံ နာမ ဘိက္ခုသံဃာဒီသု မေတ္တာ၊ မရဏဿတိ စ၊ ‘‘အသုဘသညာ’’တိပိ ဧကေ. ဧတံ ပန တယံ သဗ္ဗတ္ထ အတ္ထယိတဗ္ဗံ ဣစ္ဆိတဗ္ဗန္တိ ကတွာ၊ အဓိပ္ပေတဿ စ ယောဂါနုယောဂကမ္မဿ ပဒဋ္ဌာနတ္တာ ‘‘သဗ္ဗတ္ထကကမ္မဋ္ဌာန’’န္တိ ဝုစ္စတိ. အဋ္ဌတိံသာရမ္မဏေသု ပန ယံ ယဿ စရိတာနုကူလံ၊ တံ တဿ နိစ္စံ ပရိဟရိတဗ္ဗတ္တာ ယထာဝုတ္တေနေဝ နယေန ‘‘ပါရိဟာရိယကမ္မဋ္ဌာန’’န္တိ ဝုစ္စတိ၊ တတော –

‘‘မဟာဝါသံ နဝါဝါသံ၊ ဇရာဝါသဉ္စ ပန္ထနိံ၊

သောဏ္ဍိံ ပဏ္ဏဉ္စ ပုပ္ဖဉ္စ၊ ဖလံ ပတ္ထိတမေဝ စ.

‘‘နဂရံ ဒါရုနာ ခေတ္တံ၊ ဝိသဘာဂေန ပဋ္ဋနံ၊

ပစ္စန္တသီမာသပ္ပါယံ၊ ယတ္ထ မိတ္တော န လဗ္ဘတိ.

‘‘အဋ္ဌာရသေတာနိ ဌာနာနိ၊ ဣတိ ဝိညာယ ပဏ္ဍိတော၊

အာရကာ ပရိဝဇ္ဇေယျ၊ မဂ္ဂံ သပ္ပဋိဘယံ ယထာ’’တိ. (ဝိသုဒ္ဓိ. ၁.၅၂) –

ဝုတ္တအဋ္ဌာရသသေနာသနဒေါသဝဇ္ဇိတံ ‘‘ဣဓ၊ ဘိက္ခဝေ၊ သေနာသနံ နာတိဒူရံ ဟောတိ နစ္စာသန္နံ ဂမနာဂမနသမ္ပန္နံ ဒိဝါ အပ္ပါကိဏ္ဏံ ရတ္တိံ အပ္ပသဒ္ဒံ အပ္ပနိဂ္ဃေါသံ အပ္ပဍံသမကသဝါတာတပသရီသပသမ္ဖဿံ. တသ္မိံ ခေါ ပန သေနာသနေ ဝိဟရန္တဿ အပ္ပကသိရေနေဝ ဥပ္ပဇ္ဇန္တိ စီဝရပိဏ္ဍပါတသေနာသနဂိလာနပစ္စယဘေသဇ္ဇပရိက္ခာရာ. တသ္မိံ ခေါ ပန သေနာသနေ ထေရာ ဘိက္ခူ ဝိဟရန္တိ ဗဟုဿုတာ အာဂတာဂမာ ဓမ္မဝိနယဓရာ မာတိကာဓရာ. တေ ကာလေန ကာလံ ဥပသင်္ကမိတွာ ပရိပုစ္ဆတိ ပရိပဉှတိ ‘ဣဒံ ဘန္တေ ကထံ၊ ဣမဿ ကော အတ္ထော’တိ. တဿ တေ အာယသ္မန္တော အဝိဝဋဉ္စေဝ ဝိဝရန္တိ၊ အနုတ္တာနီကတဉ္စ ဥတ္တာနိံ ကရောန္တိ၊ အနေကဝိဟိတေသု စ ကင်္ခါဌာနီယေသု ဓမ္မေသု ကင်္ခံ ပဋိဝိနောဒေန္တိ. ဧဝံ ခေါ၊ ဘိက္ခဝေ၊ သေနာသနံ ပဉ္စင်္ဂသမန္နာဂတံ ဟောတီ’’တိ (အ. နိ. ၁၀.၁၁) ဝုတ္တပဉ္စင်္ဂသမန္နာဂတံ သေနာသနံ ဥပဂမ္မ တတ္ထ ဝသန္တေန ‘‘ဒီဃာနိ ကေသလောမနခါနိ ဆိန္ဒိတဗ္ဗာနိ၊ ဇိဏ္ဏစီဝရေသု အဂ္ဂဠအနုဝါတပရိဘဏ္ဍဒါနာဒိနာ ဒဠှီကမ္မံ ဝါ တန္တစ္ဆေဒါဒီသု တုန္နကမ္မံ ဝါ ကာတဗ္ဗံ၊ ကိလိဋ္ဌာနိ ရဇိတဗ္ဗာနိ၊ သစေ ပတ္တေ မလံ ဟောတိ၊ ပတ္တော ပစိတဗ္ဗော၊ မဉ္စပီဌာဒီနိ သောဓေတဗ္ဗာနီ’’တိ ဧဝံ ဝုတ္တဥပစ္ဆိန္နခုဒ္ဒကပလိဗောဓေန ကတဘတ္တကိစ္စေန ဘတ္တသမ္မဒံ ဝိနောဒေတွာ ရတနတ္တယဂုဏာနုဿရဏေန စိတ္တံ သမ္ပဟံသေတွာ အာစရိယုဂ္ဂဟတော ဧကပဒမ္ပိ အသမ္မုယှန္တေန မနသိ ကာတဗ္ဗန္တိ.

စတုရာရက္ခနိဒ္ဒေသဝဏ္ဏနာ နိဋ္ဌိတာ.