၄၄. ဥပေါသထနိဒ္ဒေသဝဏ္ဏနာ

၄၁၀. ဒုဝေ ဥပေါသထာတိ သုလဘပ္ပဝတ္တိဝသေန ဝုတ္တံ. တယော ပန ဒိဝသဝသေနေဝ ဥပေါသထာ စာတုဒ္ဒသိကော ပန္နရသိကော သာမဂ္ဂိကောတိ. တတ္ထ ဟေမန္တဂိမှဝဿာနာနံ တိဏ္ဏံ ဥတူနံ တတိယသတ္တမပက္ခေသု ဒွေ ဒွေ ကတွာ ဆ စာတုဒ္ဒသိကာ၊ သေသာ ပန္နရသိကာတိ ဧဝံ ဧကသံဝစ္ဆရေ စတုဝီသတိဥပေါသထာ. ဣဒံ တာဝ လောကဿ ပကတိစာရိတ္တံ. ‘‘အာဂန္တုကေဟိ အာဝါသိကာနံ အနုဝတ္တိတဗ္ဗ’’န္တိအာဒိဝစနတော (မဟာဝ. ၁၇၈) ပန တထာရူပပစ္စယေ သတိ အညသ္မိမ္ပိ စာတုဒ္ဒသေ ဥပေါသထံ ကာတုံ ဝဋ္ဋတိ.

၄၁၁. သုတ္တုဒ္ဒေသော သံဃဿေဝါတိ ယောဇနာ. အဓိဋ္ဌာနဉ္စ တံ ဥပေါသထော စာတိ ကမ္မဓာရယော. သေသာနန္တိ ဒွိန္နံ တိဏ္ဏံ ဝါ. ‘‘ဒုဝေ’’တိအာဒိနာ စ စာတုဒ္ဒသော ပန္နရသော သာမဂ္ဂီတိ ဒိဝသဝသေန၊ သုတ္တုဒ္ဒေသော အဓိဋ္ဌာနံ ပါရိသုဒ္ဓီတိ ကရဏပ္ပကာရေန၊ သင်္ဃုပေါသထော ဂဏုပေါသထော ပုဂ္ဂလုပေါသထောတိ ပုဂ္ဂလဝသေန စာတိ နဝ ဥပေါသထာ ဒီပိတာ ဟောန္တိ.

၄၁၂. ပုဗ္ဗကိစ္စေတိ –

‘‘ဆန္ဒပါရိသုဒ္ဓိဥတုက္ခာနံ၊ ဘိက္ခုဂဏနာ စ ဩဝါဒေါ၊

ဥပေါသထဿ ဧတာနိ၊ ပုဗ္ဗကိစ္စန္တိ ဝုစ္စတီ’’တိ. (မဟာဝ. အဋ္ဌ. ၁၆၈) –

ဧဝံ အဋ္ဌကထာစရိယေဟိ ဝုတ္တေ ပုဗ္ဗကရဏာနန္တရံ ကတ္တဗ္ဗေ ပုဗ္ဗကိစ္စေ.

ပုဗ္ဗကရဏေတိ –

‘‘သမ္မဇ္ဇနီ ပဒီပေါ စ၊ ဥဒကံ အာသနေန စ၊

ဥပေါသထဿ ဧတာနိ၊ ပုဗ္ဗကရဏန္တိ ဝုစ္စတီ’’တိ. (မဟာဝ. အဋ္ဌ. ၁၆၈) –

ဧဝံ အဋ္ဌကထာစရိယေဟေဝ ဝုတ္တေ သဗ္ဗပဌမံ ကတ္တဗ္ဗေ ပုဗ္ဗကရဏေ. ပတ္တကလ္လေတိ ဥပေါသထာဒီနံ စတုန္နံ အင်္ဂါနံ သမ္ဘဝေန ပတ္တော ကာလော ဣမဿာတိ ပတ္တကာလံ၊ ပတ္တကာလမေဝ ပတ္တကလ္လံ. ကိံ တံ? ဥပေါသထာဒိကမ္မံ. တံ ပန စတူဟိ အင်္ဂေဟိ သင်္ဂဟိတံ. ယထာဟု အဋ္ဌကထာစရိယာ –

‘‘ဥပေါသထော ယာဝတိကာ စ ဘိက္ခူ ကမ္မပ္ပတ္တာ၊

သဘာဂါပတ္တိယော စ န ဝိဇ္ဇန္တိ၊

ဝဇ္ဇနီယာ စ ပုဂ္ဂလာ တသ္မိံ န ဟောန္တိ၊

ပတ္တကလ္လန္တိ ဝုစ္စတီ’’တိ. (မဟာဝ. အဋ္ဌ. ၁၆၈)၊

သမာနိတေတိ သမ္မာ အာနီတေ ပဝတ္တိတေတိ အတ္ထော. သောတိ သုတ္တုဒ္ဒေသော. ပဉ္စဓာတိ နိဒါနုဒ္ဒေသော ပါရာဇိကုဒ္ဒေသော သံဃာဒိသေသုဒ္ဒေသော အနိယတုဒ္ဒေသော ဝိတ္ထာရုဒ္ဒေသောတိ ဧဝံ ပဉ္စဓာ.

၄၁၃. ဝိနာန္တရာယန္တိ ရာဇန္တရာယော စောရန္တရာယော အဂျန္တရာယော ဥဒကန္တရာယော မနုဿန္တရာယော အမနုဿန္တရာယော ဝါဠန္တရာယော သရီသပန္တရာယော ဇီဝိတန္တရာယော ဗြဟ္မစရိယန္တရာယောတိ (မဟာဝ. ၁၅၀) ဝုတ္တေသု ဒသသု ယံ ကိဉ္စိ အန္တရာယံ ဝိနာ. သင်္ခေပေနာတိ ဝိနာ ဝိတ္ထာရံ. ‘‘ဧတ္ထ ဒွီသု တီသု ဝါ ဥဒ္ဒေသေသု ဝိသဒေသု ထေရောဝ ဣဿရော’’တိ ဝုတ္တတ္တာ အဝတ္တန္တေပိ ဝဋ္ဋတီတိ ယောဇနာ. ဧတ္ထာတိ ပဉ္စသု ဥဒ္ဒေသေသု. အဝတ္တန္တေတိ ထေရဿ ဝိတ္ထာရေန အဝတ္တမာနေ အပ္ပဂုဏေ. ဝဋ္ဋတီတိ သံခိတ္တေန ဥဒ္ဒိသိတုမ္ပိ ဝဋ္ဋတိ. ဣမိနာဝ ယဿ ကဿစိ ဥဒ္ဒေသကဿ အဝတ္တန္တေပိ ဝဋ္ဋတီတိ ဝိညာယတိ. ဒွီသု ဝတ္တမာနေသု ဣဿရတ္တေ အဓိကေ ဝတ္တဗ္ဗမေဝ နတ္ထီတိ ဒဿနတ္ထံ ‘‘တီသူ’’တိ ဝုတ္တံ. ‘‘ထေရောဝ ဣဿရော’’တိအာဒိနာ ဣဒံ ပရိဒီပေတိ – ဒွေ အခဏ္ဍာ သုဝိသဒါ ဝါစုဂ္ဂတာ၊ ထေရာဓေယျံ ပါတိမောက္ခံ၊ သစေ ပန ဧတ္တကမ္ပိ ဝိသဒံ ကာတုံ န သက္ကောတိ၊ ဗျတ္တဿ ဘိက္ခုနော အာယတ္တံ ဟောတိ၊ တသ္မာ သယံ ဥဒ္ဒိသိတဗ္ဗံ၊ အညာ ဝါ အဇ္ဈေသိတဗ္ဗောတိ.

၄၁၄. ဥဒ္ဒိသန္တေ သမာ ဝါ အထ ထောကိကာ ဝါ ယဒိ အာဂစ္ဆေယျုန္တိ သမ္ဗန္ဓနီယံ. ဥဒ္ဒိသန္တေ အာဝါသိကေဟိ ပါတိမောက္ခေ ဥဒ္ဒိဿမာနေ. သမာ ဝါ ထောကိကာ ဝါတိ အာဝါသိကေဟိ သမာ ဝါ ထောကိကာ ဝါ အာဂန္တုကာ ဘိက္ခူ. အဝသေသကံ သောတဗ္ဗန္တိ ဣမိနာ ဧတ္တာဝတာပိ ဥပေါသထော ကတောယေဝ နာမာတိ ဒီပေတိ.

၄၁၅. ဥဒ္ဒိဋ္ဌမတ္တေတိ ဥဒ္ဒိဋ္ဌံယေဝ ဥဒ္ဒိဋ္ဌမတ္တံ. မတ္တ-သဒ္ဒေါ အဝဓာရဏေ. သကလာယ ဧကစ္စာယ ဝါ ဥဋ္ဌိတာယ သမာ ဝါ ထောကိကာ ဝါ ယဒိ အာဂစ္ဆေယျုန္တိ ယောဇနာ. သကလာယာတိ သဗ္ဗာယ ပရိသာယ. ဧသံ သန္တိကေ ပါရိသုဒ္ဓိံ ကရေယျုန္တိ ဧသံ အာဝါသိကာနံ သမီပေ တေ အာဂန္တုကာ ဘိက္ခူ ပါရိသုဒ္ဓိဥပေါသထံ ကရေယျုန္တိ အတ္ထော. အထ ဗဟုကာ စေ၊ သဗ္ဗဝိကပ္ပေသု ပုဗ္ဗကိစ္စံ ကတွာတိ ယောဇနီယံ. ဝိကပ္ပီယန္တိ ပရိကပ္ပီယန္တီတိ ဝိကပ္ပါ၊ အဝသေသသဝနပါရိသုဒ္ဓိဥပေါသထဝိဓာနာ သဗ္ဗေ စ တေ ဝိကပ္ပါ စေတိ သဗ္ဗဝိကပ္ပါ. တေသု. ပုနုဒ္ဒိသေတိ ပုန ပါတိမောက္ခံ ဥဒ္ဒိသေယျ.

၄၁၆. ဣတရာနန္တိ အာဂန္တုကာနံ. ဣတရောတိ စာတုဒ္ဒသော. ဧတ္ထ ပန ယေသံ ပန္နရသော၊ တေ အတီတံ ဥပေါသထံ စာတုဒ္ဒသိကံ အကံသူတိ ဝေဒိတဗ္ဗာ. အယမေတ္ထာဓိပ္ပါယော – တာဒိသေ ပစ္စယေ သတိ စာတုဒ္ဒသိကဿ ကတတ္တာ တေသံ ယထာဝုတ္တတတိယသတ္တမပက္ခသင်္ခါတစာတုဒ္ဒသိကေ သမ္ပတ္တေ တေရသီစာတုဒ္ဒသီကတ္တဗ္ဗတ္တာ အနုပေါသထတ္တာ ပန တတ္ထ ဥပေါသထော န ကတောတိ စာတုဒ္ဒသောယေဝ ပန္နရသော ဇာတော. သမာနေတရေတိ သမာ ဦနာ ဣတရေတိ ပဒစ္ဆေဒေါ. ဣတရေတိ အာဂန္တုကာ. ပုရိမာနံ အနုဝတ္တန္တူတိ အာဝါသိကေဟိ ‘‘အဇ္ဇုပေါသထော ပန္နရသော’’တိ ပုဗ္ဗကိစ္စေ ကယိရမာနေ ပုရိမာနံ အာဝါသိကာနံ အနုဝတ္တန္တူတိ အတ္ထော. သစေဓိကာတိ ယဒိ အာဂန္တုကာ ဗဟုကာ ဟောန္တိ. ပုရိမာတိ အာဝါသိကာ. တေသံ အနုဝတ္တန္တူတိ တေသံ အာဂန္တုကာနံ ‘‘အဇ္ဇုပေါသထော စာတုဒ္ဒသော’’တိ ပုဗ္ဗကိစ္စေ ကယိရမာနေ အနုဝတ္တန္တု. သေသေပီတိ အာဂန္တုကာနံ ပန္နရသဝါရေပိ. အယံ နယောတိ ‘‘အာဂန္တုကာနံ ပန္နရသော ဣတရာနံ သစေတရော’’တိအာဒိကော အယမေဝ နယော. ဧတ္ထ ပန ယေသံ ပန္နရသော၊ တေ တိရောရဋ္ဌတော ဝါ အာဂတာ အတီတံ ဝါ ဥပေါသထံ စာတုဒ္ဒသိကံ အကံသူတိ ဝေဒိတဗ္ဗော.

၄၁၇. အတီတုပေါသထဿ စာတုဒ္ဒသိယံ ကတတ္တာ စာတုဒ္ဒသိယံ ပန္နရသုပေါသထော ကတောတိ ပန္နရသီ အာဝါသိကာနံ ပါဋိပဒေါ ဇာတောတိ အာဟ ‘‘အာဝါသိကာနံ ပါဋိပဒေါ’’တိ. ဣတရာနန္တိ အာဂန္တုကာနံ. ဥပေါသထောတိ ပန္နရသော ဥပေါသထော. သမထောကာနန္တိ အတ္တနာ သမာနံ ဝါ ထောကာနံ ဝါ အာဂန္တုကာနံ. မူလဋ္ဌာတိ အာဝါသိကာ. ကာမတော ဒေန္တူတိ အတ္တနော ဣစ္ဆာယ ဒေန္တု.

၄၁၈. နော စေ ဒေန္တီတိ ယဒိ အာဝါသိကာ ကာယသာမဂ္ဂိံ န ဒေန္တိ၊ တေသံ ပန အာဝါသိကာနံ ဟိယျော ဥပေါသထဿ ကတတ္တာ အဇ္ဇ ဥပေါသထကရဏံ နတ္ထိ. ဗဟူသု အနိစ္ဆာယ ကာယသာမဂ္ဂိံ ဒဒေယျာတိ ယောဇနာ. ဗဟူသူတိ အာဂန္တုကေသု ဗဟုကေသု. ဗဟိ ဝါ ဝဇေတိ အာဝါသိကဘိက္ခုပရိသာ နိဿီမံ ဝါ ဝဇေယျာတိ အတ္ထော.

၄၁၉. သာဝေယျ သုတ္တန္တိ ပါတိမောက္ခသင်္ခါတံ သုတ္တံ ဝါယမိတွာ သာဝေယျ.

၄၂၀. သမ္မဇ္ဇိတုံ ။ပေ။ ဥဒကာသနံ ပညပေတုဉ္စ မဟာထေရေန ပေသိတော ကလ္လော န ကရေယျ တထာတိ သမ္ဗန္ဓော. ကလ္လောတိ အဂိလာနော. တထာတိ ဒုက္ကဋံ အတိဒိသတိ. အာသနေသု အသတိ အန္တမသော သာခါဘင်္ဂမ္ပိ ကပ္ပိယံ ကာရာပေတွာ ပညပေတဗ္ဗံ. တေလေ အသတိ ကပလ္လေ အဂ္ဂိပိ ဇာလေတဗ္ဗော.

၄၂၁-၃. ပဋ္ဌပေတွာ ဒကာသနန္တိ ပရိဘောဇနီယပါနီယောဒကဉ္စ အာသနဉ္စ သန္နိဟိတံ ကတွာ. ဂဏဉတ္တိန္တိ ဣဒါနိ ဝက္ခမာနံ ဂဏေန ဌပေတဗ္ဗံ ဉတ္တိံ. တေတိ အညေ ဒုဝေ ဘိက္ခူ. သမတ္တပုဗ္ဗာရမ္ဘေနာတိ သမတ္တော နိဋ္ဌိတော ပုဗ္ဗေသု ဥတ္တရာသင်္ဂဧကံသကရဏာဒီသု အာရမ္ဘော ယဿာတိ တိပဒဗဟုဗ္ဗီဟိ. နဝေန တေ ဧဝမီရိယာတိ သမ္ဗန္ဓော. တေတိ ဣတရေ ဒွေ.

၄၂၄. ကတ္တဗ္ဗံ ကတွာ ပုဗ္ဗကိစ္စာဒိကံ သမ္ပာဒေတွာ နဝေါ ဧဝံ ဤရိယောတိ ယောဇနာ.

၄၂၇. ယတ္ထာတိ ယသ္မိံ ဝိဟာရေ ဧကေကဿ ပါရိသုဒ္ဓိံ ဟရိတွာနာတိ သမ္ဗန္ဓော. ဧကေကဿာတိ ဧတ္ထ ဝိစ္ဆာယံ ဒွိတ္တံ. ကိရိယာယ ဂုဏေန ဒဗ္ဗေန ဝါ ဘိန္နေ အတ္ထေ ဗျာပိတုံ ဣစ္ဆာ ဝိစ္ဆာ. ဧတ္ထ ပန ဆန္ဒပါရိသုဒ္ဓိဟရဏသင်္ခါတာယ ကိရိယာယ စတူသု စ တီသု စ ဒွီသု စ ဘိန္နမေကေကံ ဗျာပိတုံ သမ္ဗန္ဓိတုံ ဣစ္ဆာတိ ဝိစ္ဆာ. ဣတရီတရေတိ ဧတ္ထာပိ ကရဏကိရိယာဝသေန ဝေဒိတဗ္ဗံ. တယော ဒွေ ဧကော ဝါ တံ တံ သင်္ဃုပေါသထံ ဂဏုပေါသထံ ပုဂ္ဂလုပေါသထံ ဝါတိ ဝုတ္တံ ဟောတိ. အယမေတ္ထာဓိပ္ပါယော – စတူသု ဧကဿ အာဟရိတွာ တယော ပါရိသုဒ္ဓိဥပေါသထံ ကရောန္တိ၊ တီသု ဝါ ဧကဿ အာဟရိတွာ ဒွေ သင်္ဃုပေါသထံ ကရောန္တိ၊ အဓမ္မေန ဝဂ္ဂံ ဥပေါသထကမ္မံ. အထ ပန ဧကဿ အာဟရိတွာ တယော သင်္ဃုပေါသထံ ကရောန္တိ၊ ဧကဿ အာဟရိတွာ ဒွေ ပါရိသုဒ္ဓိဥပေါသထံ ကရောန္တိ၊ အဓမ္မေန ဝဂ္ဂံ နာမ ဟောတိ. ယဒိ ပန စတ္တာရောပိ သန္နိပတိတွာ ပါရိသုဒ္ဓိဥပေါသထံ ကရောန္တိ၊ တယော ဝါ ဒွေ ဝါ သင်္ဃုပေါသထံ ကရောန္တိ၊ အဓမ္မေန သမဂ္ဂံ နာမ ဟောတီတိ. တဗ္ဗိပရိယာယေန ဓမ္မေန သမဂ္ဂံ ဝေဒိတဗ္ဗံ.

၄၂၈. ဝဂ္ဂေ သမဂ္ဂေ ဝါ ‘‘ဝဂ္ဂေါ’’တိ သညိနော ဝိမတိဿ ဝါ ကရောတော ဒုက္ကဋန္တိ သမ္ဗန္ဓော. ဝဂ္ဂေတိ ဝဂ္ဂသံဃေ. ဝိမတိဿာတိ ‘‘ဝဂ္ဂေါ နု ခေါ၊ သမဂ္ဂေါ’’တိ ဧဝံ ဝေမတိကဿ. ဣမိနာဝ ကုက္ကုစ္စပကတဝါရောပိ ဥပလက္ခိတော. ကရောတောတိ ဥပေါသထံ ကရောန္တဿ. ဘေဒါဓိပ္ပါယေန ကရောတောတိ ယောဇနာ. ဧတ္ထ ပန ပါပဿ ဗလဝတာယ ထုလ္လစ္စယံ ဝုတ္တံ. သညိနောတိ သညာသီသေန စိတ္တံ ဝုတ္တံ၊ စိတ္တဝတောတိ အတ္ထော.

၄၂၉-၃၀. ‘‘ဥက္ခိတ္တဿာ’’တိအာဒိနာ ဝဇ္ဇနီယပုဂ္ဂလေ ဒဿေတိ. ဥက္ခိတ္တဿာတိ ကတ္တုအတ္ထေ သာမိဝစနံ. နိသိန္နသဒ္ဒဿ ကမ္မသာဓနတ္တာ ဥက္ခိတ္တာဒီဟိ ကတ္တူဟိ ဘဝိတဗ္ဗန္တိ. ‘‘သေသာန’’န္တိ ဝိသေသနဿ ဘိက္ခူနံ ဗျဘိစာရေန သာတ္ထကတာ. အဘဗ္ဗဿ ပဏ္ဍကာဒိဧကာဒသဝိဓဿ အဘဗ္ဗဿ. နိသိန္နပရိသာယဉ္စ ပါတိမောက္ခံ န ဥဒ္ဒိသေတိ သမ္ဗန္ဓော. သဘာဂါပတ္တိကော တထာ န ဥဒ္ဒိသေတိ ယောဇေတဗ္ဗံ. ဝိကာလဘောဇနာဒိဝတ္ထုတော သမာနော ဘာဂေါ ကောဋ္ဌာသော ဧတိဿာတိ သဘာဂါ၊ သာ အာပတ္တိ အဿာတိ ဗဟုဗ္ဗီဟိ.

ဆန္ဒေန ပရိဝုတ္ထေနာတိ ဧတ္ထ စတုဗ္ဗိဓံ ပါရိဝါသိယံ ပရိသပါရိဝါသိယံ ရတ္တိပါရိဝါသိယံ ဆန္ဒပါရိဝါသိယံ အဇ္ဈာသယပါရိဝါသိယန္တိ. တတ္ထ ဘိက္ခူ ကေနစိဒေဝ ကရဏီယေန သန္နိပတိတာ ဟောန္တိ၊ အထ မေဃုဋ္ဌာနာဒိနာ ကေနစိဒေဝ ကရဏီယေန အနောကာသော၊ အထ ‘‘အညတ္ထ ဂစ္ဆာမာ’’တိ ဆန္ဒံ အဝိဿဇ္ဇိတွာဝ ဥဋ္ဌဟန္တိ၊ ဣဒံ ပရိသပါရိဝါသိယံ နာမ ကိဉ္စာပိ ပရိသပါရိဝါသိယံ၊ ဆန္ဒဿ ပန အဝိဿဋ္ဌတ္တာ ကမ္မံ ကာတုံ ဝဋ္ဋတိ.

‘‘ယာဝ ပန သဗ္ဗေ သန္နိပတန္တိ၊ တာဝ ဓမ္မံ သုဏိဿာမာ’’တိ ဧကံ အဇ္ဈေသန္တိ၊ တသ္မိံ ဓမ္မကထံ ကထေန္တေယေဝ အရုဏော ဥဂ္ဂစ္ဆတိ၊ သစေ စာတုဒ္ဒသိကံ ကာတုံ နိသိန္နာ၊ ပန္နရသောတိ ကာတုံ ဝဋ္ဋတိ၊ သစေ ပန္နရသိကံ ကာတုံ နိသိန္နာ၊ ပါဋိပဒေ အနုပေါသထေ ဥပေါသထံ ကာတုံ န ဝဋ္ဋတိ၊ အညံ ပန သံဃကိစ္စံ ကာတုံ ဝဋ္ဋတိ၊ ဣဒံ ရတ္တိပါရိဝါသိယံ နာမ.

ဧဝံ ပန နိသိန္နေ ကောစိ နက္ခတ္တပါဌကော ဘိက္ခု ‘‘အဇ္ဇ နက္ခတ္တံ ဒါရုဏံ၊ ဣမံ ကမ္မံ မာ ကရောထာ’’တိ ဝဒတိ၊ တေ တဿ ဝစနေန ဆန္ဒံ ဝိဿဇ္ဇေတွာ တတ္ထေဝ နိသိန္နာ ဟောန္တိ၊ အထညော အာဂန္တွာ ‘‘နက္ခတ္တံ ပဋိမာနေန္တံ၊ အတ္ထော ဗာလံ ဥပစ္စဂါ’’တိ (ဇာ. ၁.၁.၄၉) ဝတွာ ‘‘ကိံ နက္ခတ္တေန၊ ကရောထာ’’တိ ဝဒတိ၊ ဣဒံ ဆန္ဒပါရိဝါသိယဉ္စေဝ အဇ္ဈာသယပါရိဝါသိယဉ္စ. ဧကသ္မိံ ပါရိဝါသိယေ ပုန ဆန္ဒပါရိသုဒ္ဓိံ အာနေတွာ ကမ္မံ ကာတုံ ဝဋ္ဋတိ.

၄၃၁. အာပန္နဉ္စ ဝေမတိကဉ္စ အဒေသယိတွာ ဝါ နာဝိကတွာ ဝါ ဥပေါသထံ ကာတုံ န စ ကပ္ပတီတိ သမ္ဗန္ဓော. နာဝိကတွာတိ ဂရုကာပတ္တိံ အနာဝိကတွာ. န စာတိ နေဝ.

၄၃၂. အဋ္ဌိတောပေါသထာတိ အဋ္ဌိတော အဝိဿဋ္ဌော ဥပေါသထော ယသ္မိန္တိ ဗဟုဗ္ဗီဟိ. တဒဟူတိ တသ္မိံ ဥပေါသထဒိဝသေ. အန္တရာယံ ဝါ သံဃံ ဝါ ဝိနာ အဓိဋ္ဌာတုံ သီမမေဝ ဝါ န ဝဇေတိ ယောဇနာ. အဓိဋ္ဌာတုန္တိ ဣမိနာ ဂဏုပေါသထမ္ပိ ဥပလက္ခေတိ. သီမန္တိ ဣမိနာ နဒိမ္ပိ.

ဥပေါသထနိဒ္ဒေသဝဏ္ဏနာ နိဋ္ဌိတာ.