၃၅. ပရိက္ခာရနိဒ္ဒေသဝဏ္ဏနာ

၂၅၉-၆၀. ဆတ္တေ အန္တော ဗဟိ စ ပဉ္စဝဏ္ဏေဟိ သုတ္တေဟိ သိဗ္ဗိတုဉ္စ ပဏ္ဏေ ဂိရိကူဋအဍ္ဎစန္ဒာဒိံ ဆိန္ဒိတုဉ္စ န ဝဋ္ဋတီတိ သမ္ဗန္ဓော. ဆတ္တေတိ တာလပဏ္ဏေ ဆတ္တေ. ဂိရိကူဋံ နာမ မကရဒန္တကံ၊ အာဒိ-သဒ္ဒေန တာဒိသံ အညံ ဝိကာရရူပံ သင်္ဂဟိတံ. ဃဋကန္တိ ဂေဟတ္ထမ္ဘေသု ဝိယ ကယိရမာနံ ဃဋကံ. ဒဏ္ဍေတိ ဆတ္တဒဏ္ဍေ. လေခါတိ တဟိံ တဟိံ ဒိန္နာ လေခါ. သာဒိသန္တိ ဒီဃေန နိဒ္ဒိဋ္ဌံ. ဗုန္ဒမှိ မူလေ.

၂၆၁. ထိရတ္ထံ ဆတ္တေ ဧကဝဏ္ဏေန သိဗ္ဗိတုံ ဝါ ပဉ္ဇရံ ဝိနန္ဓိတုံ ဝါ ဝဋ္ဋတီတိ သမ္ဗန္ဓော. သိဗ္ဗိတုန္တိ အန္တော ဗဟိ စ သိဗ္ဗိတုံ. ဧကဝဏ္ဏေနာတိ နီလာဒိနာ ဧကဝဏ္ဏေန. ပဉ္ဇရန္တိ ဆတ္တဒဏ္ဍဂါဟကသလာကပဉ္ဇရံ. ထိရတ္ထန္တိ ဣမိနာ န ဝဏ္ဏမဋ္ဌတ္ထာယာတိ ဒဿေတိ. ဗန္ဓိတုံ ဒဏ္ဍေ လေခါ ဝဋ္ဋတီတိ သမ္ဗန္ဓော. ဗန္ဓိတုန္တိ ဝါတပ္ပဟာရေန အစလနတ္ထံ ဆတ္တမဏ္ဍလိကံ ရဇ္ဇုကေဟိ ဂဟေတွာ ဗန္ဓနတ္ထာယ. လေခါဝါတိ ဝလယမိဝ ဥက္ကိရိတွာ ကတာ လေခါ ဧဝ. ဝဋ္ဋတီတိ ယဒိပိ န ဗန္ဓတိ၊ ရဇ္ဇုကေဟိ ဗန္ဓိတုံ ယုတ္တဋ္ဌာနတ္တာ ဝဋ္ဋတိ.

၂၆၂. စီဝရေ အန္တေ ဝါပိ ပဋ္ဋမုခေ ဝါပိ ဝေဏိပိ ဝါ သင်္ခလိကာပိ ဝါ အညံ သူစိဝိကာရံ ဝါ ပါဠိကဏ္ဏိကအာဒိကံ ကပ္ပဗိန္ဒုဝိကာရမ္ပိ ဝါ န စ ကပ္ပတီတိ သမ္ဗန္ဓော. အန္တေတိ စီဝရပရိယန္တေ၊ အနုဝါတေတိ ဝုတ္တံ ဟောတိ. ပဋ္ဋမုခေတိ ပဋ္ဋကောဋိယံ၊ ဒွိန္နံ ပဋ္ဋာနံ သင်္ဃဋိတဋ္ဌာနံ သန္ဓာယေတံ ဝုတ္တံ. ဝေဏီတိ ဝရကသီသာကာရေန သိဗ္ဗနံ. သင်္ခလိကာတိ ဗိဠာလဗန္ဓနာကာရေန သိဗ္ဗနံ. အညံ သူစိဝိကာရံ ဝါတိ စီဝရမဏ္ဍနတ္ထာယ ကယိရမာနံ အညံ ယံ ကိဉ္စိ သူစိကမ္မဝိကာရံ ဝါ. ဋီကာယံ ပန ‘‘သတပဒိသဒိသံ အညံ ဝါ သူစိဝိကာရံ န ကပ္ပတီ’’တိ သာမညေန ဝုတ္တံ. ‘‘စီဝရမဏ္ဍနတ္ထာယ နာနာသုတ္တကေဟိ သတပဒိသဒိသံ သိဗ္ဗန္တာ အာဂန္တုကပဋ္ဋံ ဌပေန္တိ၊ အညမ္ပိ ယံ ကိဉ္စိ သူစိကမ္မဝိကာရံ ကရောန္တိ၊ သဗ္ဗံ န ဝဋ္ဋတီ’’တိ အဋ္ဌကထာယံ ဝုတ္တတ္တာ ပန နာနာဝဏ္ဏေဟိ ဝါ ဟောတု၊ ဧကဝဏ္ဏေန ဝါ ဟောတု၊ စီဝရမဏ္ဍနတ္ထာယ သံသိဗ္ဗန္တာနံ သူစိကမ္မဝိကာရံ သန္ဓာယ ဝုတ္တန္တိ စီဝရေသု ဖာလိတဋ္ဌာနဿ ထိရဘာဝတ္ထံ သတပဒိသဒိသမ္ပိ သိဗ္ဗိတုံ ဝဋ္ဋတီတိ အမှာကံ ခန္တိ. ပါဠိ-သဒ္ဒေန၊ ကဏ္ဏိက-သဒ္ဒေန စ ကပ္ပ-သဒ္ဒလောပေန ဝါ ဥပစာရေန ဝါ ပါဠိကပ္ပါဒယောဝ ဂဟိတာ. ပါဠိ စ ကဏ္ဏိကာ စ ပါဠိကဏ္ဏိကာယော၊ တာ အာဒိ ယဿ အညဿ တာဒိသဿာတိ ဝိဂ္ဂဟော. တတ္ထ နီလာဝဠိအာဒိသဏ္ဌာနာယ ဗိန္ဒုပန္တိယာ ယထာ သောဘတိ၊ တထာ ကယိရမာနော ပါဠိကပ္ပေါ. တထေဝ ဗိန္ဒုသမူဟေ ကတ္ထစိ ဒဿေတွာ ကယိရမာနော ကဏ္ဏိကကပ္ပေါ.

၂၆၃. ဂဏ္ဌိပါသကပဋ္ဋာတိ ဂဏ္ဌိနော စ ပါသကဿ စ ပတိဋ္ဌာနဋ္ဌာနေ ဌပေတဗ္ဗာ ပဋ္ဋာ. ဝဋ္ဋတီတိ ဧတ္ထ ‘‘ဂဏ္ဌိပါသကာ’’တိ ကတွာ ‘‘စတုကောဏာဝ ဝဋ္ဋန္တီ’’တိ အတ္ထတော ဝစနံ ဝိပလ္လာသေတွာ ယောဇေတဗ္ဗံ. အဂ္ဃိယန္တိ စေတိယသဏ္ဌာနေန သိဗ္ဗနံ. မူလေ စ အဂ္ဂေ စ ဧကသဒိသံ ကတွာ မုဂ္ဂရာကာရေန သိဗ္ဗနံ မုဂ္ဂရော. ဝိကာရန္တိ ဝိကာရော၊ လိင်္ဂဝိပလ္လာသေန ဝုတ္တံ. ဧတ္ထာတိ ဂဏ္ဌိပါသကပဋ္ဋေသု.

၂၆၄. ကောဏသုတ္တာတိ နပုံသကနိဒ္ဒေသော၊ ဂဏ္ဌိပါသကပဋ္ဋာနံ ကောဏေဟိ နီဟဋသုတ္တကောဋိယော. ပီဠကာတိ တာနိယေဝ နိဝတ္တေတွာ ပီဠကာကာရေန ကတာနိ. ဒုဝိညေယျာဝါတိ တေသံ အန္တေသု ဧကဝါရံ ဂဏ္ဌိကရဏေန ဝါ ပုန နိဝတ္တေတွာ သိဗ္ဗနေန ဝါ ဒုဝိညေယျာ ဧဝ. ဂန္ဓံ တေလံ ဝါတိ ဂန္ဓံ ဝါ တေလံ ဝါ. ကဉ္စိကပိဋ္ဌခလိကအာဒီနိပိ ဝဋ္ဋန္တိ.

၂၆၅. မဏိနာတိ မသာရဂလ္လာဒိပါသာဏေန. န စ ဃဋ္ဋေယျာတိ နေဝ ဃဋ္ဋေယျ. အညေန ဝါတိ မုဂ္ဂရမုသလာဒိနာ. အံသဗဒ္ဓကကာယဗန္ဓနာနိ ပန တထာ ကာတုံ ဝဋ္ဋတိ. ဒေါဏိယံ ကတွာ န စ ဃံသေယျာတိ ပက္ကရဇနာကိရဏဒေါဏိယံ ဌပေတွာ ဘူမိယံ ဇဏ္ဏုကာနိ နိဟန္တွာ ဣတော စိတော စ အာဝိဇ္ဈိတွာ နေဝ ဃံသေယျာတိ အတ္ထော.

၂၆၆-၇. ကဏ္ဏကောဏကသုတ္တာနီတိ စီဝရရဇနကာလေ လဂ္ဂနတ္ထာယ အနုဝါတေ စတူသု ကောဏေသု စ ပါသကံ ကတွာ ဗန္ဓိတာနိ သုတ္တာနိ၊ ယာနိ ‘‘အနုဇာနာမိ၊ ဘိက္ခဝေ၊ ကဏ္ဏသုတ္တက’’န္တိ (မဟာဝ. ၃၄၄) ဧဝံ အနုညာတာနိ. ကဏ္ဏသင်္ခါတာ ကောဏာ ကဏ္ဏကောဏကာ၊ တေသု သုတ္တာနိ. ဂဏ္ဌိကပါသကပဋ္ဋေသု ပန ကဏ္ဏကောဏကသုတ္တာနံ ဒုဝိညေယျာနမေဝ ကပ္ပိယတာ ဟေဋ္ဌာ ဝုတ္တာတိ စီဝရေ ရတ္တေယေဝ တေသံ ဆိန္ဒိတဗ္ဗတာ နတ္ထိ၊ ကဏ္ဏကောဏကသုတ္တာနံ ဆိန္ဒိတဗ္ဗတာယ ဝုတ္တတ္တာ အနုဝါတေဟိ နိက္ခမိတသုတ္တာနိပိ ဆိန္ဒိတဗ္ဗာနီတိ ဝေဒိတဗ္ဗံ. ဓမ္မကရဏေ ဆတ္တဝဋ္ဋိယံ လေခံ ဌပေတွာ လေခါ န ဝဋ္ဋတီတိ ယောဇနာ. ဆတ္တဝဋ္ဋိယန္တိ ဆတ္တဿ မုခဝဋ္ဋိယံ. လေခါတိ ဥပရိ ဝါ ဟေဋ္ဌာ ဝါ ကုစ္ဆိယံ ဝါ အညာ လေခါ. ကုဉ္စိကာယ စ ပိပ္ဖလေ စ မဏိကာ စ ပီဠကာ စ န ဝဋ္ဋန္တီတိ သမ္ဗန္ဓော. မဏိကာတိ ဧကာ ဝဋ္ဋမဏိ. ပီဠကာတိ သာသပမတ္တိကာ မုတ္တရာဇိသဒိသာ ဗဟုဝဋ္ဋလေခါ. ဒဏ္ဍမှီတိ ပိပ္ဖလဒဏ္ဍကေ.

၂၆၈-၉. အရဏိယံ မာလာဒိ စ ပတ္တမဏ္ဍလေ ဘိတ္တိကမ္မဉ္စ န ဝဋ္ဋတီတိ သမ္ဗန္ဓိတဗ္ဗံ. အရဏိယန္တိ ဥတ္တရာရဏိ အဓရာရဏိ အရဏိဓနုကဉ္စ သာမညေန ဂဟိတံ. ပတ္တမဏ္ဍလေတိ တိပုသီသာဒိမယေ ပတ္တမဏ္ဍလေ. ဧတ္ထ ပန မကရဒဏ္ဍကံ ဝဋ္ဋတိ. ဟေဋ္ဌာတိ ကတ္တရယဋ္ဌိယာ ဟေဋ္ဌာ. ဥဒ္ဓန္တိ တဿာယေဝ ဥပရိ.

၂၇၀-၃. သမ္မုဉ္ဇနိမှီတိ သမ္မုဉ္ဇနိယာ လိင်္ဂဝိပလ္လာသော. အဝါရိတန္တိ ဣတ္ထိရူပံ ပန ဝါရိတံ. သောဝဏ္ဏမယမ္ပီတိ သုဝဏ္ဏမယမ္ပိ. ဝိသာဏနာဠိ နာမ ဝိသာဏမယာ နာဠိ. ဧတ္ထ ပန အဝုတ္တာနိပိ ယာနိ ကာနိစိ အာရကဏ္ဍကဒန္တကဋ္ဌဆေဒနပါနီယဃဋပါနီယဥဠုင်္ကစုဏ္ဏဘာဇနာဒီနိ ဝုတ္တာနံ အနုလောမာနီတိ ဝေဒိတဗ္ဗာနိ. ယော ပနေတ္ထ ဝိနယညူ တာဒိသံ ပရိက္ခာရံ ဒိသွာ ဆိန္ဒေယျ ဝါ ဆိန္ဒာပေယျ ဝါ၊ အနုပဝဇ္ဇော သောတိ ဝေဒိတဗ္ဗန္တိ.

ပရိက္ခာရနိဒ္ဒေသဝဏ္ဏနာ နိဋ္ဌိတာ.