၁၄. ဘူမိနိဒ္ဒေသဝဏ္ဏနာ

၁၃၆. ယာသု ဝုတ္ထံ ပက္ကဉ္စ ကပ္ပတိ၊ တာ ကပ္ပိယာ ဘူမိယော သမ္မုတိ စ သမ္မုတိကုဋိ စ။ပေ။ ဂဟပတိ စ ဂဟပတိကုဋိ စာတိ ဣမာ စတဿော ဟောန္တီတိ ယောဇေတွာ အတ္ထော ဝေဒိတဗ္ဗော. တတ္ထ ဘေသဇ္ဇက္ခန္ဓကေ (မဟာဝ. ၂၉၅) ဝုတ္တာယ ဥတ္တိဒုတိယကမ္မဝါစာယ၊ အပလောကနကမ္မဝသေန ဝါ သာဝေတွာ သမ္မာ ဥတ္တိသမ္ပန္နံ ကရီယတီတိ သမ္မုတိ၊ ထမ္ဘာနံ ဘိတ္တိပါဒါနံ ဝါ ဥဂ္ဂမနံ ဥဒ္ဓံ ကတွာ ဌပနံ၊ ‘‘ကပ္ပိယကုဋိံ ကရောမာ’’တိ ဝါစာယ သာဝနဉ္စ အန္တံ ယဿာ သာ ဥဿာဝနန္တာ. တထာ စ ဝုတ္တံ ‘‘ထမ္ဘပ္ပတိဋ္ဌာနဉ္စ ဝစနပရိယောသာနဉ္စ သမကာလံ ဝဋ္ဋတီ’’တိ (မဟာဝ. အဋ္ဌ. ၂၉၅). နိသာဒနံ ပဝိသနံ သန္နိဝေသနံ နိသာဒေါ၊ ဂုန္နံ ဝိယ နိသာဒေါ ဧတိဿာတိ ဂေါနိသာဒိ. ဘိက္ခုံ ဌပေတွာ သေသသဟဓမ္မိကာ သဗ္ဗေ စ ဒေဝမနုဿာ ဣဓ ဂဟပတီတိ သာမညေန အဓိပ္ပေတာ. ဧတ္ထ ပန ဂဟပတိသမ္ဗန္ဓိနီ ကုဋိ ဒီဃေန ဂဟပတီ.

‘‘ယံ ပန အကပ္ပိယဘူမိယံ သဟသေယျပ္ပဟောနကေ ဂေဟေ ဝုတ္ထ’’န္တိ (မဟာဝ. အဋ္ဌ. ၂၉၅) အဋ္ဌကထာဝစနတော ယံ သံဃော အာကင်္ခတိ ဝိဟာရံ ဝါ အဍ္ဎယောဂံ ဝါ ပါသာဒံ ဝါ ဟမ္မိယံ ဝါ ဂုဟံ ဝါ လေဏာဒိံ ဝါ၊ တေသမ္ပိ သာမညဝစနံ ဝိညာယတီတိ တံတံလက္ခဏပ္ပတ္တာ သဟသေယျပ္ပဟောနကာ လေဏာဒယော စတူသွေဝ ကုဋီသု အန္တောဂဓာတိ ဝေဒိတဗ္ဗံ. ဣမာသု စတူသု သဟသေယျပ္ပဟောနကေ ပဒေသေ ယံ သံဃိကံ ပုဂ္ဂလိကံ ဝါ ဘိက္ခုသန္တကံ ဧကရတ္တမ္ပိ အန္တောဝုတ္ထံ အနုပသမ္ပန္နေန ပက္ကဉ္စ ယာဝကာလိကံ ယာမကာလိကဉ္စ အန္တောဝုတ္ထအန္တောပက္ကသင်္ခံ န ဂစ္ဆတိ၊ ကော ပန ဝါဒေါ ဣတရဒွယေ. တံ ပန အကပ္ပိယဘူမိယမ္ပိ ဝုတ္ထံ ပက္ကဉ္စ ဝဋ္ဋတိ. တေန ဝုတ္တံ ‘‘ယာသု ဝုတ္ထံ ပက္ကဉ္စ ကပ္ပတီ’’တိ.

၁၃၇. ဝါသတ္ထာယ ကတေ သံဃိကေ ဝါ ဧကသန္တကေ ဝါ သဟသေယျပ္ပဟောနကေ ဂေဟေ ကပ္ပိယာကုဋိ လဒ္ဓဗ္ဗာတိ သမ္ဗန္ဓော. တတ္ထ ဝါသတ္ထာယာတိ ဣမိနာ အဝါသတ္ထာယ ကတံ နိဝတ္တေတိ. ဧကသန္တကေတိ ဧကဿ ဘိက္ခုနော သန္တကေ. ကပ္ပိယာကုဋီတိ ဘာဝပ္ပဓာနောယံ နိဒ္ဒေသော၊ န ဟိ ဂေဟေ ဂေဟံ လဒ္ဓုံ ယုဇ္ဇတီတိ ကပ္ပိယကုဋိတာတိ အတ္ထော. ဒီဃော ပန ဂါထာဝသေန၊ ကပ္ပိယာ ကုဋိတာတိ ဝါ ဝိသေသနဝသေန ဒဋ္ဌဗ္ဗံ. သဟသေယျပ္ပဟောနကေတိ ဧတ္ထ သဟသေယျပ္ပဟောနကံ ဝါသာဂါရလက္ခဏေ ဝုတ္တလက္ခဏံ သေနာသနံ.

၁၃၈. ဣဒါနိ တာ ကုဋိယော ကမေန ဒဿေတွာ တတ္ထ ပဋိပဇ္ဇိတဗ္ဗဝိဓိံ၊ တာသံ သဗ္ဗထာပဂမဉ္စ ဒဿေတုံ ‘‘ဂေဟေ’’တိအာဒိမာဟ. တတ္ထ ‘‘ကပ္ပိယကုဋိံ ကရောမ၊ ကပ္ပိယကုဋိံ ကရောမာ’’တိ ဧဝမီရယန္တိ သမ္ဗန္ဓော. ဣဋ္ဌကာ စ ထမ္ဘာ စ ‘‘ဣဋ္ဌကာထမ္ဘာ’’တိ ဝတ္တဗ္ဗေ ရဿော. ဣဋ္ဌကထမ္ဘာ အာဒိ ယဿ ဘိတ္တိပါသာဒဿာတိ ဗဟုဗ္ဗီဟိ. ပစ္ဆာ ပဌမသဒ္ဒေန ကမ္မဓာရယော. ‘‘ဌပေယျ စေ၊ သာ ဥဿာဝနန္တိကာ’’တိ ဧဝံ စေ-သာ-သဒ္ဒေ ယောဇေတွာ အတ္ထော ဝေဒိတဗ္ဗော.

၁၃၉. သကလော အပရိက္ခိတ္တော အာရာမောပိ ဝါတိ သမ္ဗန္ဓော. သေနာသနံ ပရိက္ခိတ္တံ ဝါ ဟောတု၊ အပရိက္ခိတ္တံ ဝါ၊ န တံ ပမာဏံ.

၁၄၀. အညေဟိ ကပ္ပိယကုဋိယာ အတ္ထာယ ဒိန္နော ဝါ တေသံ သန္တကော ဝါတိ ယောဇနာ.

၁၄၁. အဝိရောဓဘာဝေန ကပ္ပနီယာ ကပ္ပါ၊ ကပ္ပ သာမတ္ထိယမိစ္စေတသ္မာ ဣတ္ထိယံ အာပစ္စယေ ရူပံ၊ န ကပ္ပါ အကပ္ပါ၊ အကပ္ပါ စ သာ ကုဋိ စေတိ အကပ္ပကုဋိ၊ တာယ. သပ္ပိအာဒီတိ ဣမိနာ သတ္တာဟကာလိကံ ယာဝဇီဝိကဉ္စ ဂဟိတံ.

၁၄၂. တေဟေဝါတိ အကပ္ပကုဋိယံ ဝုတ္ထသပ္ပိအာဒီဟိ ဧဝ သဒ္ဓိံ သတ္တာဟကာလိကသံသဋ္ဌတာယ ‘‘သတ္တာဟံ ကပ္ပတေ’’တိ ဝုတ္တံ. သာမိသေတိ အာမိသသင်္ခါတေန ပုရိမဒွယေန သဟိတေ. သာမပါကတာတိ သာမံ အတ္တနာ ပါကော ဧတဿာတိ သာမပါကံ၊ သတ္တာဟကာလိကေန သဟ ပက္ကံ သာမိသံ ယာဝဇီဝိကံ၊ တဿ ဘာဝေါ သာမပါကတာ. သယံ ပက္ကံ တံ အတ္တနာ သံသဋ္ဌတာယ တမ္ပိ အာမိသံ သာမပါကဂတိကံ ကရောတီတိ တဿ သာမပါကတာ ဟောတီတိ အဓိပ္ပါယော.

၁၄၃. အဓိဋ္ဌိတာတိ ပတိဋ္ဌိတာ. ဧဝ-သဒ္ဒေါ တိဋ္ဌတိသဒ္ဒဿ အန္တေ ဒဋ္ဌဗ္ဗော.

၁၄၄. သဗ္ဗေသူတိ ထမ္ဘာဒီသု သကလေသု. ဇဟိတံ ဝတ္ထု ကုဋိဘူမိ ယဿာ ဇဟိတဝတ္ထုကာ. ပရိက္ခိတ္တေ ဇဟိတဝတ္ထုကာတိ သမ္ဗန္ဓော. သေသာတိ ဣတရာ ဒွေ ကုဋိယော. ဆဒနဝိဗ္ဘမာတိ ဆဒနဿ ဝိနာသာ. ဧတ္ထာပိ ‘‘ဇဟိတဝတ္ထုကာ’’တိ အာနေတဗ္ဗန္တိ.

ဘူမိနိဒ္ဒေသဝဏ္ဏနာ နိဋ္ဌိတာ.