၁၃. သမဏကပ္ပနိဒ္ဒေသဝဏ္ဏနာ

၁၂၅. သမဏကပ္ပါတိ သမဏဝေါဟာရာ. ဘဝန္တိ၊ အဟေသုန္တိ ဝါ ဘူတာ၊ ဝတ္တမာနေ၊ ဘူတေ ဝါ တပ္ပစ္စယော. ဝိရုဠှမူလာဒိဘာဝံ အာပဇ္ဇိတွာ ဝဍ္ဎမာနကာနံ၊ ဝဍ္ဎိတွာ မဟန္တဘာဝံ ပတ္တာနဉ္စ ရုက္ခလတာဒိသင်္ခါတာနံ ဘူတာနံ ဂါမော၊ ဘူတာ ဧဝ ဝါ ဂါမော သမူဟော ဘူတဂါမော. တဿ သမာရမ္ဘော ဆေဒနဖာလနာဒိ၊ တသ္မိံ. နိမိတ္တတ္ထေ စေတံ ဘုမ္မံ၊ တံဟေတု ပါစိတ္တိယံ ဟောတီတိ အတ္ထော. ကတကပ္ပိယံ သမဏကပ္ပိယံ ဘဝေတိ သမ္ဗန္ဓော. တတ္ထ ကတံ ကပ္ပိယံ ယဿာတိ ဗဟုဗ္ဗီဟိ. ကေနာတိ အာဟ ‘‘နခေနာ’’တိအာဒိ.

၁၂၆. ဣဒါနိ ယဿ သမာရမ္ဘော၊ တံ ဘူတဂါမံ ဝိဘဇိတွာ ဒဿေတုံ ‘‘သ မူလာ’’တိအာဒိ အာရဒ္ဓံ. သောတိ ဘူတဂါမော. ဘဝိတုံ ဥပ္ပဇ္ဇိတုံ ပယောဇေတီတိ ကာရိတန္တာ တပ္ပစ္စယော၊ ပဘာဝိတော ဥပ္ပါဒိတောတိ အတ္ထော. အထ ဝါ ပဘဝနံ ပဘဝေါ၊ ဥပ္ပတ္တိ၊ သောဝ ပဘဝေါ၊ ပဘာဝံ ကရောတီတိ နာမဓာတုတော ကတ္တရိ တပ္ပစ္စယော၊ ပဘာဝိတော ဥပ္ပန္နောတိ အတ္ထော. မူလဉ္စ ခန္ဓော စ ဗီဇဉ္စ အဂ္ဂဉ္စ ဖဠု စ မူလ။ပေ။ ဖဠူနိ. ဖဠု နာမ ပဗ္ဗံ. တာနိယေဝ ဗီဇာနိ၊ တေဟိ ပဘာဝိတော ဥပ္ပါဒိတော၊ အထ ဝါ တေဟိ အဝဓိဘူတေဟိ၊ ကာရဏဘူတေဟိ ဝါ ပဘာဝိတော ဥပ္ပန္နောတိ ကမေန ဝိကပ္ပဒွယေ သမာသဒွယံ ဝေဒိတဗ္ဗံ. တတ္ထ မူလဗီဇံ နာမ ဟလိဒ္ဒိသိင်္ဂိဝေရာဒိ.

ခန္ဓဗီဇံ နာမ အဿတ္ထနိဂြောဓာဒိ. ဗီဇဗီဇံ နာမ ပုဗ္ဗဏ္ဏာပရဏ္ဏာဒိ. အဂ္ဂဗီဇံ နာမ ဟိရိဝေရာဒိ. ဖဠုဗီဇံ နာမ ဥစ္ဆုနဠာဒိ. တတ္ထ မူလဗီဇာဒီနိ ပဉ္စ ဗီဇဂါမော. တန္နိဗ္ဗတ္တော ရုက္ခလတာဒိ ဘူတဂါမော.

ဣဒါနိ တေသု ဗီဇဂါမသမာရမ္ဘေ ဒုက္ကဋံ ဒဿေတိ အပရဒ္ဓေန. ဘူတဂါမဝိယောဇိတံ ဗီဇံ အာရမ္ဘေ ဒုက္ကဋန္တိ သမ္ဗန္ဓော. ဘူတဂါမတော ဝိယောဇိတန္တိ တပ္ပုရိသော. ဗီဇန္တိ ဘူမိယံ ရောပိတမရောပိတမ္ပိ နိဂ္ဂတဝိဒတ္ထိမတ္တပတ္တဝဋ္ဋိပိ မူလဗီဇာနိ. ‘‘အာရမ္ဘေ’’တိ ကိတကပစ္စယဿ ယောဂေ အဝုတ္တေ ကမ္မနိ ဆဋ္ဌုပ္ပတ္တိယံ ဝိကပ္ပေန ဥဘယတ္ထ ဒုတိယာ. အာရမ္ဘေတိ သမာရမ္ဘေ. တသ္မာ ‘‘ဣမံ ပုပ္ဖံ ဖလံ ဝါ ဇာန၊ ဣမံ ကပ္ပိယံ ကရောဟီ’’တိအာဒိနာ ကပ္ပိယဝစနေန ဘူတဂါမတော ဝိယောဇိတံ ဗီဇဇာတံ ဗီဇဂါမပရိမောစနတ္ထံ ပုန ကပ္ပိယံ ကာရာပေတွာ ပရိဘုဉ္ဇိဘဗ္ဗံ. ‘‘အနုဇာနာမိ၊ ဘိက္ခဝေ၊ ပဉ္စဟိ သမဏကပ္ပေဟိ ဖလံ ပရိဘုဉ္ဇိတုံ အဂ္ဂိပရိဇိတံ သတ္ထပရိဇိတံ နခပရိဇိတံ အဗီဇံ နိဗ္ဗတ္တဗီဇညေဝ ပဉ္စမ’’န္တိ (စူဠဝ. ၂၅၀) ဝုတ္တေသု ပဉ္စသု နခပရိဇိတာဒီနိ တီဏိ ဒဿိတာနိ.

၁၂၇. ဣဒါနိ အဝသိဋ္ဌာနိ ဒွေ ဒဿေတုံ ‘‘နိဗ္ဗတ္တဗီဇ’’န္တိအာဒိကံ ပဌမဒ္ဓံ အာဟ. တတ္ထ နိဗ္ဗတ္တဗီဇန္တိ နိဗ္ဗတ္တနိယန္တိ နိဗ္ဗတ္တံ၊ နိပုဗ္ဗ ဝတု ဝတ္တနေတိမသ္မာ တပ္ပစ္စယော၊ နိဗ္ဗတ္တံ ဗီဇံ ယဿ တံ နိဗ္ဗတ္တဗီဇံ၊ ဗီဇံ နိဗ္ဗတ္တေတွာ ဝိသုံ ကတွာ ပရိဘုဉ္ဇိတဗ္ဗံ အမ္ဗပနသာဒိ. နောဗီဇံ နာမ တရုဏမ္ဗဖလာဒိ. ဣဒါနိ ဗီဇဂါမဘူတဂါမေသု ကပ္ပိယကရဏပ္ပကာရာဒိဝိသေသံ ဒဿေန္တော ‘‘ကဋာဟာ’’တိအာဒိမာဟ. တတ္ထ ကဋာဟေန ဗဒ္ဓံ ဗီဇံ ယေသန္တိ ဗာဟိရတ္ထော.

၁၂၈. ဘာဇနေ ဘူမိယမ္ပိ ဝါ ဧကာဗဒ္ဓေသု ဗီဇေသု ဧကသ္မိဉ္စ ကပ္ပိယေ ကတေတိ ယောဇနာ. ဗီဇေသူတိ ဗီဇဂါမဘူတဂါမေသု. ဘူတဂါမောပိ ဟိ ဣဓ ‘‘ဗီဇ’’န္တိ ရုဠှီဝသေန ဝုစ္စတိ.

၁၂၉. နိက္ခိတ္တေတိ ဌပိတေ. ကပ္ပိယံ ပုန ကရေယျာတိ ဇာတမူလပဏ္ဏဘာဝတော ဘူတဂါမတ္တာ ဘူတဂါမတော ပရိမောစိတံ ဗီဇဂါမပရိမောစနတ္ထံ ပုန ကပ္ပိယံ ကာရေယျာတိ အတ္ထော. တေနာဟ ‘‘ဘူတဂါမော ဟိ သော တဒါ’’တိ. ဟိ-သဒ္ဒေါ ဟေတုမှိ. တဒါတိ မူလေ စ ပဏ္ဏေ စ ဇာတကာလေ သစေ မူလမတ္တံ သဉ္ဇာယတိ၊ ဥပရိဘာဂေ သစေ အင်္ကုရော ဇာယတိ၊ ဟေဋ္ဌာဘာဂေ ဆိန္ဒိတုံ ဝဋ္ဋတိ. မူလမတ္တေသု ဝါ ပန ပဏ္ဏမတ္တေသု ဝါ နိဂ္ဂတေသု သစေပိ ရတနပ္ပမာဏာပိ သာခါ နိက္ခမန္တိ၊ ဗီဇဂါမသင်္ဂဟိတာ ဟောန္တိ.

၁၃၀. ဥဒကသမ္ဘဝေါ သေဝါလော စ စေတိယာဒီသု သေဝါလော စ ဘူတဂါမောဝါတိ သမ္ဗန္ဓော. အာဒိ-သဒ္ဒေန ပါကာရာဒိဂ္ဂဟဏံ. ယဒိ ဒွေ တီဏိ ပဏ္ဏာနိ န ဇာယန္တိ၊ အဂ္ဂဗီဇသင်္ဂဟံ ဂစ္ဆတိ. သုက္ခော ပန သမ္မဇ္ဇိတဗ္ဗော. မူလပဏ္ဏေ ဝိနိဂ္ဂတေ ဗီဇောပိ ဘူတဂါမောဝါတိ သမ္ဗန္ဓော. ပဏ္ဏေတိ ဣမိနာ အင်္ကုရမတ္တံ ပဋိက္ခိပတိ.

၁၃၁. ဃဋာဒိပိဋ္ဌေ သေဝါလော စ အဟိဆတ္တကမကုဠဉ္စ ဒုက္ကဋဿေဝ ဝတ္ထူနီတိ သမ္ဗန္ဓော. ပိဋ္ဌေတိ ဣမိနာ အန္တော အဗ္ဗောဟာရိကောတိ ဒဿေတိ. ဖုလ္လန္တိ ဖုလ္လိတံ အဟိဆတ္တကံ. အဗျဝဟာရိကန္တိ အာပတ္တိဝေါဟာရယောဂ္ဂံ န ဟောတီတိ အတ္ထော.

၁၃၂. အလ္လရုက္ခေ လာခါနိယျာသဆတ္တာနိ ဝိကောပိယ ဂဏှတော တတ္ထ အက္ခရံ ဆိန္ဒတော ဝါပိ ပါစိတ္တီတိ သမ္ဗန္ဓော. တတ္ထာတိ အလ္လရုက္ခေ. ‘‘ဝိကောပယ’’န္တိ ပေါတ္ထကေသု ပါဌော ဒိဿတိ၊ သော အပါဌော ပဌမန္တတာယ ကာရဏာဘာဝတော. ‘‘ဝိကောပိယာ’’တိ ပန ပါဌော ဂဟေတဗ္ဗော. ဝိကောပိယာတိ ဣမိနာ အဝိကောပေတွာ ဂဟဏေ အနာပတ္တီတိ ဒီပေတိ.

၁၃၃. ဒါရုမက္ကဋကာဒိနာတိ အာဏိံ ကောဋ္ဋေတွာ ဒါရုယန္တံ ကတွာ တတ္ထ ကဏ္ဋကံ ဩလမ္ဗေန္တိ၊ ဧတံ ဒါရုမက္ကဋကံ နာမ. အာဒိ-သဒ္ဒေန ကဏ္ဋကဗန္ဓနာဒီနံ ဂဟဏံ. တိဏာဒိံ ဆိန္ဒိတုံ၊ ဂဏ္ဌိကံ ကာတုဉ္စ န ကပ္ပတီတိ ယောဇနာ. ဆိန္ဒိတုန္တိ ဆိန္ဒနံ.

၁၃၄. ဘူတဂါမံ ဝါတိ ဘူတဂါမံ ဝါ. ဗီဇံ ဝါတိ ဗီဇဂါမံ ဝါ. ‘‘ဆိန္ဒ ဝါ’’တိအာဒိနာ သဗ္ဗတ္ထ ဝါ-သဒ္ဒေါ ယောဇေတဗ္ဗော. ပစ ဝါတိ ပစနံ ကရောဟီတိ ဝါ. ‘‘ပဋ’’ ဣတိ ဝါ ပါဌော၊ တဿ ဥပ္ပါဒေဟီတိ အတ္ထော. ‘‘ဣမံ ရုက္ခံ ဆိန္ဒာဟီ’’တိအာဒိနာ ပန အဝတွာ ‘‘ရုက္ခံ ဆိန္ဒာ’’တိအာဒိနာ အနိယမေတွာ ဝတ္တုံ ဝဋ္ဋတိ.

၁၃၅. ဣမန္တိ ဧတံ ရုက္ခာဒိံ. ဣမံ သောဓေဟီတိ ဧတ္ထ ဣတိ-သဒ္ဒံ ကတွာ အတ္ထော ဝတ္တဗ္ဗောတိ.

သမဏကပ္ပနိဒ္ဒေသဝဏ္ဏနာ နိဋ္ဌိတာ.