၄၂. ဒေသနာနိဒ္ဒေသဝဏ္ဏနာ

၃၈၂. ဘိက္ခုဘာဝဿ (ပါရာ. အဋ္ဌ. ၂.၁၉၈) ယော စာဂေါ၊ သာ ပါရာဇိကဒေသနာတိ အတ္ထော. ဝုတ္တဉှေတံ ‘‘ဝိသုဒ္ဓါပေက္ခောတိ ဂိဟိ ဝါ ဟောတုကာမော ဥပါသကော ဝါ ဟောတုကာမော အာရာမိကော ဝါ ဟောတုကာမော သာမဏေရော ဝါ ဟောတုကာမော’’တိ (ပါရာ. ၁၉၈). တသ္မာ ဂိဟိဘာဝါဒိကံယေဝ ပါရာဇိကံ အာပန္နဿ ဝိသုဒ္ဓိ နာမ၊ အညတရဿ ဝိသုဒ္ဓိ ဧဝ နတ္ထိ. ‘‘ဆာဒေတိ ဇာနမာပန္နံ၊ ပရိဝသေယျ တာဝတာ’’တိအာဒိနာ နယေန ဟေဋ္ဌာ ဝုတ္တဝိဓိံ သန္ဓာယ ‘‘ယထာဝုတ္တေန ဝုဋ္ဌာန’’န္တိ ဝုတ္တံ.

၃၈၃. ဣဒါနိ ဝတ္တဗ္ဗတံ သန္ဓာယ ‘‘ဧဝ’’န္တိ ဝုတ္တံ.

၃၈၄. ပဋိဒေသေမီတိ အာရောစေမိ. ဧတာနိ အဟံ ဧတာနာဟံ.

၃၈၆. (က) ယံ သံဃော ဂိလာနဿ တိစီဝရေန ဝိပ္ပဝါသသမ္မုတိံ ဒေတိ၊ တံ အညတြာတိ အတ္ထော.

(ခ) အကာလစီဝရံ (ပါရာ. ၅၀၀) နာမ ‘‘အနတ္ထတေ ကထိနေ ဧကာဒသမာသေ ဥပ္ပန္နံ၊ အတ္ထတေ ကထိနေ သတ္တမာသေ ဥပ္ပန္နံ၊ ကာလေပိ အာဒိဿ ဒိန္နံ၊ ဧတံ အကာလစီဝရံ နာမာ’’တိ.

(ဂ) ပုရာဏစီဝရံ (ပါရာ. ၅၀၅) နာမ ‘‘သကိံ နိဝတ္ထမ္ပိ သကိံ ပါရုတမ္ပီ’’တိ ဝုတ္တံ. အညာတိကာ နာမ မာတိတော ဝါ ပိတိတော ဝါ ယာဝ သတ္တမာ ကုလပရိဝဋ္ဋာ အသမ္ဗန္ဓာ. နိသီဒနပစ္စတ္ထရဏဓောဝါပနေ ဒုက္ကဋံ.

(ဃ) အညတြ ပါရိဝတ္တကာတိ (ပါရာ. ၅၁၂) ဧတ္ထ ဟရီတကီခဏ္ဍမ္ပိ ဝဋ္ဋတိ. စီဝရံ နာမ ဣဓ ဝိကပ္ပနူပဂပစ္ဆိမတော ပဋ္ဌာယ အဓိပ္ပေတံ.

(င) အညတြ သမယာတိ (ပါရာ. ၅၁၉) ဧတ္ထ ‘‘အစ္ဆိန္နစီဝရော ဝါ ဟောတိ ဘိက္ခု နဋ္ဌစီဝရော ဝါ’’တိ ဧဝံ ဝုတ္တံ သမယန္တိ အတ္ထော.

(စ) ‘‘သန္တရုတ္တရပရမံ တေန ဘိက္ခုနာ တတော စီဝရံ သာဒိတဗ္ဗ’’န္တိ (ပါရာ. ၅၂၄) ဝုတ္တတ္တာ ‘‘တတုတ္တရီ’’တိ ဝုတ္တံ. ဧတ္ထ ပန ‘‘သစေ တီဏိ နဋ္ဌာနိ ဟောန္တိ၊ ဒွေ သာဒိတဗ္ဗာနိ. ဒွေ နဋ္ဌာနိ၊ ဧကံ သာဒိတဗ္ဗံ၊ ဧကံ နဋ္ဌံ၊ န ကိဉ္စိ သာဒိတဗ္ဗ’’န္တိ (ပါရာ. ၅၂၄) ဝုတ္တံ.

(ဆ-ဇ) ‘‘ကီဒိသေန တေ (ပါရာ. ၅၂၉)၊ ဘန္တေ၊ စီဝရေန အတ္ထော၊ ကီဒိသံ တေ စီဝရံ စေတာပေမီ’’တိ ဧဝံ အပ္ပဝါရိတောတိ အတ္ထော. ဝိကပ္ပန္တိ ဝိသိဋ္ဌကပ္ပံ အဓိကဝိဓာနံ အာပန္နံ. ဣဓ ပုရိမံ ဧကဿ၊ ဒုတိယံ ဗဟူနံ ဝသေန ဝုတ္တံ၊ ဧတ္တကံ နာနတ္တံ.

(ဈ) အတိရေကတိက္ခတ္တုန္တိ ဧတ္ထ ကေနစိ ယံ ကိဉ္စိ အကပ္ပိယဝတ္ထုံ အာနေတွာ ‘‘ဣဒံ ခေါ မေ၊ ဘန္တေ၊ အာယသ္မန္တံ ဥဒ္ဒိဿ စီဝရစေတာပန္နံ အာဘတံ၊ ပဋိဂ္ဂဏှတု အာယသ္မာ စီဝရစေတာပန္န’’န္တိ ဝုတ္တေ ‘‘န ခေါ မယံ၊ အာဝုသော၊ စီဝရစေတာပန္နံ ပဋိဂ္ဂဏှာမ၊ စီဝရဉ္စ ခေါ မယံ ပဋိဂ္ဂဏှာမ ကာလေန ကပ္ပိယ’’န္တိ ဝတ္တဗ္ဗံ. ဧဝံ ဝုတ္တေ သစေ သော ‘‘အတ္ထိ ကောစိ ကပ္ပိယကာရကော’’တိ ဝဒတိ၊ စီဝရတ္ထိကေန ဌပေတွာ ပဉ္စ သဟဓမ္မိကေ ယော ကောစိ ဥဒ္ဒိသိတဗ္ဗော ‘‘ဧသော ခေါ၊ အာဝုသော၊ ဘိက္ခူနံ ဝေယျာဝစ္စကရော’’တိ၊ ဧတ္တကမေဝ ဝတ္တဗ္ဗံ. ဧဝံ ဝုတ္တေ သစေ ဒါယကော တဿ ဟတ္ထေ အကပ္ပိယဝတ္ထုံ ဒတွာ ‘‘ဧသော အယျဿ စီဝရံ စေတာပေတွာ ဒဿတီ’’တိ ဝတွာ ဂစ္ဆတိ၊ တံ ဥပသင်္ကမိတွာ ဒွတ္တိက္ခတ္တုံ စောဒေတဗ္ဗော သာရေတဗ္ဗော ‘‘အတ္ထော မေ၊ အာဝုသော၊ စီဝရေနာ’’တိ၊ ဧတ္တကမေဝ ဝတ္တဗ္ဗံ၊ ‘‘ဒေဟိ မေ စီဝရ’’န္တိအာဒိနာ န ဝတ္တဗ္ဗံ. ဧဝံ တိက္ခတ္တုံ စောဒနာယ တံ စီဝရံ လဘတိ၊ ဣစ္စေတံ ကုသလံ. နော စေ လဘတိ၊ ဆက္ခတ္တုပရမံ တုဏှီဘူတေန ဌာတဗ္ဗံ၊ န အာသနေ နိသီဒိတဗ္ဗံ၊ န အာမိသံ ပဋိဂ္ဂဟေတဗ္ဗံ၊ န ဓမ္မော ဘာသိတဗ္ဗော. ‘‘ကိံ ကာရဏာ အာဂတောသီ’’တိ ဝုတ္တေ ‘‘ဇာနာဟိ၊ အာဝုသော’’တိ ဧတ္တကမေဝ ဝတ္တဗ္ဗံ. သစေ နိသဇ္ဇာဒီနိ ကရောတိ၊ ဌာနံ ဘဉ္ဇတိ. ဝတ္တဘေဒဒုက္ကဋဉ္စ အာပဇ္ဇတီတိ ဝဒန္တိ. ဧဝံ ပန အပ္ပဋိပဇ္ဇိတွာ အတိရေကတိက္ခတ္တုံ စောဒနာယ အတိရေကဆက္ခတ္တုံ ဌာနေန သစေ နိပ္ဖါဒေတိ၊ နိဿဂ္ဂိယန္တိ အတ္ထော.

(ဉ) သန္ထတံ (ပါရာ. ၅၄၄) နာမ သန္ထရိတွာ ကတံ ဟောတိ အဝါယိမံ. ဧကကောသိယံသုနာပိ စေ မိဿေတွာ ကရောတိ၊ နိဿဂ္ဂိယံ.

(ဋ) သုဒ္ဓကာဠကာနန္တိ (ပါရာ. ၅၄၇-၅၄၉) အညေဟိ အမိဿိတာနန္တိ အတ္ထော. ‘‘ကာဠကံ နာမ ဒွေ ကာဠကာနိ ဇာတိကာဠကံ ဝါ ရဇနကာဠကံ ဝါ’’တိ ဝုတ္တံ.

(ဌ) အနာဒိယိတွာ။ပေ။ တုလန္တိ (ပါရာ. ၅၅၄) ဧတ္ထ ပန ယတ္တကေဟိ ဧဠကလောမေဟိ ကတ္တုကာမော ဟောတိ၊ တေသု ဒွေ ကောဋ္ဌာသာ ကာဠကာနံ၊ ဧကော ဩဒါတာနံ၊ ဧကော ဂေါစရိယာနံ အာဒါတဗ္ဗောတိ ဝိနိစ္ဆယော. ဧကဿာပိ ကာဠကလောမဿ အတိရေကဘာဂေ သတိ နိဿဂ္ဂိယမေဝ.

(ဍ) ဦနကဆဗ္ဗဿာနီတိ (ပါရာ. ၅၆၂) ဆဗ္ဗဿတော ဩရဘာဂေ.

(ဎ) နိသီဒနသန္ထတံ (ပါရာ. ၅၆၇) ပန ကာရာပေန္တေန ပုရာဏသန္ထတဿ ဧကပဿတော ဝဋ္ဋံ ဝါ စတုရဿံ ဝါ ဆိန္ဒိတွာ ဂဟိတဋ္ဌာနံ ယထာ ဝိဒတ္ထိမတ္တံ ဟောတိ၊ ဧဝံ ဂဟေတွာ ဧကဒေသံ ဝါ သန္ထရိတဗ္ဗံ၊ ဝိဇဋေတွာ ဝါ သန္ထရိတဗ္ဗံ.

(တ) န ကေဝလံ ဓောဝါပနေ (ပါရာ. ၅၇၈) ဧဝ နိဿဂ္ဂိယံ၊ ရဇနေပိ နိဿဂ္ဂိယမေဝ.

(ဒ) ရူပိယပဋိဂ္ဂဟဏဿေဝ (ပါရာ. ၅၈၉) ပဋိက္ခိတ္တတ္တာ ပဋိဂ္ဂဟိတပရိဝတ္တနေ ဒေါသံ အပဿန္တာ ကတာကတာဒိဝသေန အနေကဝိဓံ ဇာတရူပပရိဝတ္တနံ ကရောန္တိ၊ တံ သန္ဓာယ ‘‘နာနပ္ပကာရက’’န္တိ ဝုတ္တံ.

၃၈၇-၉. အာပတ္တိံ ဒေသေတွာ ပစ္ဆာ ကတ္တဗ္ဗံ ဒဿေတုံ ‘‘အထာ’’တိ ဝုတ္တံ. ဂိဟိံ ဝဒေတိ သစေ တတ္ထ အာဂစ္ဆတိ အာရာမိကော ဝါ ဥပါသကော ဝါ၊ တံ ဝဒေယျာတိ အတ္ထော. ဧဝံ ဝုတ္တော သော ‘‘ဣမိနာ ကိံ အာဟရာမီ’’တိ စေ ဝဒေယျာတိ အတ္ထော. အဝတွာမန္တိ ‘‘ဣမံ ဝါ ဣမံ ဝါ အာဟရာ’’တိ အဝတွာတိ အတ္ထော. ဝဒေတိ ‘‘ကပ္ပိယံ အာစိက္ခိတဗ္ဗ’’န္တိ (ပါရာ. ၅၈၄၊ ၅၈၉) ဝစနတော ‘‘ပဗ္ဗဇိတာနံ သပ္ပိ ဝါ တေလံ ဝါ မဓု ဝါ ဖာဏိတံ ဝါ ဝဋ္ဋတီ’’တိ ဧဝံ အာစိက္ခိတဗ္ဗံ၊ ‘‘ဣမံ နာမ အာဟရာ’’တိ န ဝတ္တဗ္ဗမေဝ. ဒွေပေတေတိ ဒွေပိ ဧတေ ရူပိယပဋိဂ္ဂါဟကဉ္စ ရူပိယသဗျောဟာရိကဉ္စာတိ အတ္ထော. အညေနာတိ အန္တမသော အာရာမိကေနာပိ လဒ္ဓဘာဂေါ န ကပ္ပတိ ဧဝ.

၃၉၀. အန္တမသော (ပါရာ. အဋ္ဌ. ၂.၅၈၃-၄) တန္နိဗ္ဗတ္တာ ရုက္ခစ္ဆာယာပိ န ကပ္ပတီတိ. နိဿဋ္ဌံ ပဋိလဒ္ဓမ္ပီတိ ဧတ္ထ ယထာ ရူပိယသံဝေါဟာရံ ကတွာ လဒ္ဓဝတ္ထုတော အာဘတံ န ကပ္ပတိ၊ တထာ ကောသိယမိဿကသန္ထတာဒိတ္တယမ္ပိ န ကပ္ပတိ. န ကေဝလံ တဿေဝ၊ အညေသမ္ပိ န ကပ္ပတေဝ ‘‘အညေန ကတံ ပဋိလဘိတွာ ပရိဘုဉ္ဇတိ၊ အာပတ္တိ ဒုက္ကဋဿာ’’တိ (ပါရာ. ၅၄၅၊ ၅၅၀၊ ၅၅၅) ဝုတ္တတ္တာ.

၃၉၁. ဧဝံ နော စေ လဘေထ၊ သော အာရာမိကာဒိကော ‘‘ဣမံ ဆဍ္ဍေဟီ’’တိ သံသိယော ဝတ္တဗ္ဗောတိ အတ္ထော. ဧဝမ္ပိ နော စေ လဘေယျ၊ သမ္မတော ဘိက္ခု ဆဍ္ဍေယျာတိ အတ္ထော.

၃၉၂. ပဋိဂ္ဂဟိတရူပိယဉ္စ ပရိဝတ္တိတရူပိယဉ္စ သန္ဓာယ ‘‘ဧတာနီ’’တိ ဝုတ္တံ. ဒုတိယပတ္တော နာမ ‘‘ဦနပဉ္စဗန္ဓနေန ပတ္တေန အညံ နဝံ ပတ္တံ စေတာပေယျ၊ နိဿဂ္ဂိယ’’န္တိ (ပါရာ. ၆၁၂) ဝုတ္တပတ္တော. သော စ ဧတာနိ စ သံဃေ နိဿဋ္ဌုံ လဗ္ဘရေတိ သမ္ဗန္ဓော. ‘‘သံဃမဇ္ဈေ နိဿဇ္ဇိတဗ္ဗံ၊ ဘိက္ခုပရိသာယ နိဿဇ္ဇိတဗ္ဗ’’န္တိ (ပါရာ. ၅၈၄၊ ၅၈၉) စ ဝုတ္တတ္တာ န ဂဏပုဂ္ဂလာနံ နိဿဇ္ဇိတုံ ဝဋ္ဋတိ. သေသာနိ ပန တီဏိ စီဝရာဒိဝတ္ထူနိ ‘‘နိဿဇ္ဇိတဗ္ဗံ သံဃဿ ဝါ ဂဏဿ ဝါ ပုဂ္ဂလဿ ဝါ’’တိ ဝုတ္တတ္တာ (ပါရာ. ၄၆၃) သံဃာဒီနံ နိဿဇ္ဇိတုံ ဝဋ္ဋတိ. ဘာသန္တရေနပီတိ ပါဠိယာ ဝတ္တုံ အသက္ကောန္တေန ဒမိဠဘာသာဒီသု အညတရာယပိ နိဿဇ္ဇိတုံ ဝဋ္ဋတီတိ အတ္ထော.

၃၉၃. (က-ဂ) နာနပ္ပကာရကံ နာမ ‘‘စီဝရပိဏ္ဍပါတသေနာသနဂိလာနပစ္စယဘေသဇ္ဇပရိက္ခာရာ၊ ‘‘အန္တမသော စုဏ္ဏပိဏ္ဍောပိ ဒန္တကဋ္ဌမ္ပိ ဒသိကသုတ္တမ္ပီ’’တိ (ပါရာ. ၅၉၅) ပါဠိယံ ဝုတ္တံ. စေတာပိတောတိ (ပါရာ. ၆၁၃) ယာစိတွာ ဂဟိတော.

၃၉၄. သမ္မန္နိတွာန ပတ္တဂါဟကံ သံဃဿ ပတ္တန္တန္တိ (ပါရာ. ၆၁၄၊ ကင်္ခါ. အဋ္ဌ. ဦနပဉ္စဗဒ္ဓနသိက္ခာပဒဝဏ္ဏနာ) ယ အန္တိမံ ပတ္တံ၊ တံ တဿ ဒါပယေတိ အတ္ထော.

၃၉၅. (ခ) ပရိဒဟိတံ နိဿဂ္ဂိယန္တိ ဧတ္ထ (ပါရာ. ၆၂၆-၆၂၈၊ ပါရာ. အဋ္ဌ. ၂.၆၂၈) ပန ဌတွာ ဝဿိကသာဋိကာယ ပရိယေသနက္ခေတ္တံ ကရဏက္ခေတ္တံ နိဝါသနက္ခေတ္တံ အဓိဋ္ဌာနက္ခေတ္တန္တိ စတုဗ္ဗိဓံ ခေတ္တဉ္စ ကုစ္ဆိသမယော ပိဋ္ဌိသမယောတိ ဒုဝိဓော သမယော စ ဝေဒိတဗ္ဗော. ကထံ? ဂိမှာနမာသေသု ပစ္ဆိမမာသဿ ပုရိမော အဍ္ဎမာသော ပရိယေသနက္ခေတ္တံ၊ ပစ္ဆိမော ကရဏက္ခေတ္တဉ္စ နိဝါသနက္ခေတ္တဉ္စ၊ ပရိယေသိတုမ္ပိ ဝဋ္ဋတိ၊ အဓိဋ္ဌာတုံ ပန န ဝဋ္ဋတိ. ဝဿိကာ ပန စတ္တာရော မာသာ ပရိယေသနာဒီနံ စတုန္နမ္ပိ ခေတ္တံ. ဧတေ ဧဝ ပဉ္စ မာသာ ကုစ္ဆိသမယော နာမ. ဣတရေ သတ္တ မာသာ ပိဋ္ဌိသမယော၊ တတ္ထ သတုပ္ပါဒကရဏံ န ဝဋ္ဋတိ.

(ဂ) အစ္ဆိန္နန္တိ ဧတ္ထ ‘‘ယော ပန မမ ပတ္တစီဝရာဒီနိ ဝဟန္တော မယာ သဒ္ဓိံ စရိဿတီ’’တိ သညာယ စီဝရံ ဒတွာ ပုန သကသညာယ ဧဝ အတ္တနော ဝေယျာဝစ္စံ အကရောန္တံ ဒိသွာ အစ္ဆိန္ဒတိ၊ သော ဣမံ အာပတ္တိံ အာပဇ္ဇတိ. ကေဝလံ ပရိစ္စဇိတွာ ဒိန္နံ ဂဟေတုမေဝ န လဘတိ.

(ဃ) သုတ္တံ ဝိညာပေတွာတိ ဧတ္ထ စီဝရကာရသမယာဒီသု စီဝရသိဗ္ဗနာဒီနမတ္ထာယ သုတ္တံ ဝိညာပေတွာတိ အတ္ထော. အညထာ သုတ္တံ ဝိညာပေတုမေဝ န ဝဋ္ဋတိ. ဝိညတ္တိယာ ဧဝ လဒ္ဓတန္တဝါယေဟီတိ အတ္ထော. သုတ္တတန္တဝါယာနံ အကပ္ပိယဘာဝေ သတိ ဒီဃတော ဝိဒတ္ထိမတ္တေ၊ တိရိယန္တတော ဟတ္ထမတ္တေ ဝီတေ နိဿဂ္ဂိယံ၊ ဧကတော အကပ္ပိယပက္ခေ ဒုက္ကဋံ.

(င) ဝိကပ္ပံ အာပန္နန္တိ (ပါရာ. ၆၄၃) ‘‘ဣဒံ ခေါ၊ အာဝုသော၊ စီဝရံ မံ ဥဒ္ဒိဿ ဝိယျတိ၊ အာယတဉ္စ ကရောထ ဝိတ္ထတဉ္စာ’’တိအာဒိနာ အဓိကံ ဝိဓာနံ အာပန္နန္တိ အတ္ထော.

(စ) အစ္စေကစီဝရံ (ပါရာ. ၆၄၉-၆၅၀) နာမ သေနာယ ဂန္တုကာမာဒီဟိ ဒိန္နံ.

(ဆ) အတိရေကဆာရတ္တန္တိ (ပါရာ. ၆၅၄-၆၅၅) ဆဒိဝသတော အတိရေကံ. ‘‘အတ္ထတကထိနာနံ ဝေါ၊ ဘိက္ခဝေ၊ ပဉ္စ ကပ္ပိဿန္တိ၊ အနာမန္တစာရော အသမာဒါနစာရော ဂဏဘောဇနံ ယာဝဒတ္ထစီဝရံ ယော စ တတ္ထ စီဝရုပ္ပါဒေါ၊ သော နေသံ ဘဝိဿတီ’’တိ (မဟာဝ. ၃၀၆) ဝုတ္တအာနိသံသေသု စီဝရမာသေ အသမာဒါနစာရံ ဌပေတွာ သေသာနိသံသာ လဗ္ဘန္တိ. ယဒိ အသမာဒါနစာရော လဗ္ဘေယျ၊ ပါဝေယျကာ ဘိက္ခူ ဝဿံဝုတ္ထာ ဩကပုဏ္ဏေဟိ စီဝရေဟိ န ဘဂဝန္တံ ဥပသင်္ကမေယျုံ၊ ယသ္မာ တံ န လဘန္တိ၊ တသ္မာ စီဝရမာသေပိ တိစီဝရံ အာဒါယ ဧဝ ဘဂဝန္တံ ဥပသင်္ကမိံသု. တသ္မာ ဝေဒိတဗ္ဗံ အသမာဒါနစာရပရိဟာရံ အတ္ထတကထိနာ ဧဝ လဘန္တိ၊ န ဣတရေတိ ဝဒန္တိ.

၃၉၇. (ခ) ‘‘အဟံ၊ ဘန္တေ၊ ဧကံ ပါဋိဒေသနီယာပတ္တိံ၊ ဒွေ၊ သမ္ဗဟုလာ ပါဋိဒေသနီယာပတ္တိယော အာပဇ္ဇိ’’န္တိ ဣမံ ပန ယေသု ပေါတ္ထကေသု လိခိတံ၊ တံ အဘယဂိရိဝါသီနံ ခုဒ္ဒသိက္ခာဝသေန ဒဿိတံ ကိရ. တတ္ထ ‘‘အဟံ၊ အာယသ္မာ၊ သမ္ဗဟုလာ ပါဋိဒေသနီယာ အာပတ္တိယော အာပန္နော၊ တာယော ပဋိဒေသေမိ. အဟံ၊ အာယသ္မာ၊ ဧကံ ပါဋိဒေသနီယံ အာပတ္တိံ အာပန္နော၊ တံ ပဋိဒေသေမီ’’တိ ဟိ ဝုတ္တံ. အမှာကံ ပန ဧဝံ ဒေသနာဝိဓာနံ နတ္ထိ. ‘‘ဂါရယှံ၊ အာဝုသော၊ ဓမ္မံ အာပဇ္ဇိံ အသပ္ပါယံ ပါဋိဒေသနီယံ၊ တံ ပဋိဒေသေမီ’’တိ (ပါစိ. ၅၅၃) ဝုတ္တံ. သမန္တပါသာဒိကာယံ (ပါစိ. ၅၅၃) ‘‘ဂါရယှံ အာဝုသော’တိအာဒိ ပဋိဒေသေတဗ္ဗာကာရဒဿန’’န္တိ ဝုတ္တံ. ကင်္ခါဝိတရဏိယမ္ပိ (ကင်္ခါ. အဋ္ဌ. ပဌမပါဋိဒေသနီယသိက္ခာပဒဝဏ္ဏနာ) ‘‘တဿာ ဒေသေတဗ္ဗာကာရော ဂါရယှံ အာဝုသော’တိအာဒိနာ နယေန သိက္ခာပဒေ ဒဿိတောယေဝါ’’တိ ဝုတ္တတ္တာ ပါဌေ အာဂတနယေနေဝ ဒေသနာဝိဓာနံ ဝေဒိတဗ္ဗံ. သစေ ဒွေ ဟောန္တိ၊ ‘‘ဂါရယှေ၊ အာဝုသော၊ ဒွေ ဓမ္မေ အာပဇ္ဇိံ အသပ္ပါယေ ပါဋိဒေသနီယေ၊ တေ ပဋိဒေသေမီ’’တိ၊ ‘‘ပဿထ၊ ဘန္တေ၊ တေ ဓမ္မေ’’တိ စ ‘‘ဂါရယှေ၊ အာဝုသော၊ သမ္ဗဟုလေ ဓမ္မေ အာပဇ္ဇိံ အသပ္ပါယေ ပါဋိဒေသနီယေ၊ တေ ပဋိဒေသေမီ’’တိ၊ ‘‘ပဿထ၊ ဘန္တေ၊ တေ ဓမ္မေ’’တိ စ ဧဝံ ယထာနုရူပံ ဒေသနာဝိဓာနံ ဝေဒိတဗ္ဗံ. သေသံ ဝုတ္တပ္ပကာရမေဝါတိ.

၃၉၈. အဒေသနာဂါမိနိယန္တိ (ပရိ. ၄၂၄ အာဒယော၊ ပရိ. အဋ္ဌ. ၄၂၅) ပါရာဇိကဉ္စ သံဃာဒိသေသဉ္စ န ဒေသယေတိ အတ္ထော. အနာပတ္တိဉ္စာတိ အနာပတ္တိံ ဧဝ ‘‘အာပတ္တိ’’န္တိ န ဒေသယေ. လဟုကာပတ္တိမ္ပိ ပုဗ္ဗေ ဒေသိတံ ပုန န ဒေသယေတိ သမ္ဗန္ဓော၊ နာနာသံဝါသနိဿီမဋ္ဌိတာနံ သန္တိကေ န ဒေသယေတိ အတ္ထော. စတုပဉ္စဟီတိ ဧတ္ထ သမာနဝဿိကပဝါရဏာယံ ဝိယ စတူဟိ ဝါ ပဉ္စဟိ ဝါ ဧကတော ဟုတွာ ဧကဿ သန္တိကေ န ဒေသယေတိ အတ္ထော. ဒွိန္နံ ဝါ တိဏ္ဏံ ဝါ ဝဋ္ဋတိ. ကထံ ဒေသေတဗ္ဗန္တိ စေ? ဧကဿ သန္တိကေ တီဟိပိ ဧကတော နိသီဒိတွာ ‘‘အဟံ၊ ဘန္တေ၊ ဧကံ ပါစိတ္တိယာပတ္တိံ အာပဇ္ဇိံ၊ တံ တုမှမူလေ ပဋိဒေသေမီ’’တိ ဧဝံ အတ္တနာ အာပန္နအာပတ္တိဝသေန ဝုတ္တေ တေန ‘‘ပဿသိ၊ အာဝုသော၊ တံ အာပတ္တိ’’န္တိ ဧဝံ တိက္ခတ္တုံ ဝုတ္တေ ‘‘အာမ၊ ဘန္တေ၊ ပဿာမီ’’တိ ဝါ ‘‘အာမာဝုသော ပဿာမီ’’တိ ဝါ ဝုတ္တေ ပုန တေန ‘‘အာယတိံ သံဝရေယျာထာ’’တိ ဝါ ‘‘သံဝရေယျာသီ’’တိ ဝါ ဝုတ္တေ ‘‘သာဓု သုဋ္ဌု သံဝရိဿာမီ’’တိ ဝတ္တဗ္ဗံ၊ ဧဝံ ဒေသေတဗ္ဗံ. မနသာတိ ဝစီဘေဒံ အကတွာ ကေဝလံ စိတ္တေနေဝ န ဒေသယေတိ အတ္ထော. အပကတတ္တာနန္တိ အန္တိမဝတ္ထုံ အဇ္ဈာပန္နဿ ဝါ ဥက္ခိတ္တကဿ ဝါ ဥပေါသထော ပဝါရဏာ ဝါ ဌပိတာ ဟောန္တိ၊ တဿ သန္တိကေ န ဒေသယေတိ အတ္ထော. နာနေကာတိ နာနာပတ္တိယော ‘‘ဧကာ’’တိ ဝတွာ န ဒေသယေတိ အတ္ထော. ဧကာ ပန ‘‘သမ္ဗဟုလာ’’တိ ဒေသိတာ ဟောတီတိ. ဒေသနာဝိနိစ္ဆယော.

ဒေသနာနိဒ္ဒေသဝဏ္ဏနာ နိဋ္ဌိတာ.