၄. ရဇနနိဒ္ဒေသဝဏ္ဏနာ

၅၈. ဣဒါနိ တေသံ စီဝရာနံ ရဇနဝိဓာနံ ဒဿေတုံ ‘‘ရဇနာနိ စာ’’တိ ဝုတ္တံ. တတ္ထ ‘‘အနုဇာနာမိ၊ ဘိက္ခဝေ၊ ဆ ရဇနာနိ မူလရဇနံ ခန္ဓရဇနံ တစရဇနံ ပတ္တရဇနံ ပုပ္ဖရဇနံ ဖလရဇန’’န္တိ (မဟာဝ. ၃၄၄) ဧဝံ ဘဂဝတာ အနုညာတတ္တာ ‘‘ဆပ္ပကာရာနိ အနုညာတာနိ သတ္ထုနာ’’တိ ဝုတ္တံ.

၅၉. တတ္ထ မူလေတိ မူလရဇနေတိ အတ္ထော. ဟလိဒ္ဒိံ ဝိဝဇ္ဇိယ သဗ္ဗံ လဗ္ဘန္တိ သမ္ဗန္ဓော. ဧဝံ သေသေသုပိ. တုင်္ဂဟာရကော နာမ ဧကော သကဏ္ဋကရုက္ခော၊ တဿ ဟရိတာလဝဏ္ဏံ ခန္ဓရဇနံ ဟောတိ. ဂိဟိပရိဘုတ္တံ ပန အလ္လိပတ္တေန ဧကဝါရံ ရဇိတုံ ဝဋ္ဋတိ. ဖလရဇနေ အကပ္ပိယံ နာမ နတ္ထိ၊ သဗ္ဗံ ဝဋ္ဋတီတိ. ရဇနဝိနိစ္ဆယော.

ရဇနနိဒ္ဒေသဝဏ္ဏနာ နိဋ္ဌိတာ.