၂၂. ဥပါဟနနိဒ္ဒေသဝဏ္ဏနာ

၁၇၅. ဂုဏင်္ဂုဏူပါဟနာတိ (မဟာဝ. အဋ္ဌ. ၂၄၅) စတုပဋလတော ပဋ္ဌာယ ဝုစ္စတိ၊ န ဧကဒွိတိပဋလတော ပဋ္ဌာယ ‘‘အနုဇာနာမိ၊ ဘိက္ခဝေ၊ ဧကပလာသိကံ ဥပါဟနံ၊ န ဘိက္ခဝေ ဒိဂုဏာ ဥပါဟနာ ဓာရေတဗ္ဗာ၊ န တိဂုဏာ ဥပါဟနာ ဓာရေတဗ္ဗာ၊ န ဂုဏင်္ဂုဏူပါဟနာ ဓာရေတဗ္ဗာ၊ ယော ဓာရေယျ၊ အာပတ္တိ ဒုက္ကဋဿာ’’တိ (မဟာဝ. ၂၄၅) ဝုတ္တတ္တာ. ‘‘အနုဇာနာမိ၊ ဘိက္ခဝေ၊ ဩမုက္ကံ ဂုဏင်္ဂုဏူပါဟနံ၊ န ဘိက္ခဝေ နဝါ ဂုဏင်္ဂုဏူပါဟနာ ဓာရေတဗ္ဗာ၊ ယော ဓာရေယျ၊ အာပတ္တိ ဒုက္ကဋဿာ’’တိ (မဟာဝ. ၂၄၇) ဝုတ္တတ္တာ ‘‘နဝါ’’တိ ဝုတ္တံ. သဗ္ဗတ္ထာပိ မဇ္ဈိမဒေသေ ဂိလာနောပိ နဝံ ဂုဏင်္ဂုဏူပါဟနံ န လဘတိ၊ ဧကဝါရမ္ပိ အညေဟိ ပရိဘုတ္တံ ဩမုက္ကဥပါဟနသင်္ခါတံ လဘတိ၊ ပစ္စန္တိမေသု ဇနပဒေသု ဂိလာနော နဝမ္ပိ လဘတီတိ ဝေဒိတဗ္ဗံ ‘‘အနုဇာနာမိ၊ ဘိက္ခဝေ၊ သဗ္ဗပစ္စန္တိမေသု ဇနပဒေသု ဂုဏင်္ဂုဏူပါဟန’’န္တိ (မဟာဝ. ၂၅၉) အဝိသေသေန ဝုတ္တတ္တာ.

သဗ္ဗဿာတိ ဂိလာနဿာပိ အဂိလာနဿာပီတိ အတ္ထော. မဇ္ဈိမဒေသေပိ ပစ္စန္တိမဒေသေပိ အာရာမေ အာရာမူပစာရေ ဂိလာနဿာပိ အဂိလာနဿာပိ ‘‘အနုဇာနာမိ၊ ဘိက္ခဝေ၊ အဇ္ဈာရာမေ ဥပါဟနံ ဓာရေတု’’န္တိ (မဟာဝ. ၂၄၉) ဝုတ္တတ္တာ ကပ္ပိယန္တိ အတ္ထော. သဗ္ဗတ္ထာတိ အာရာမေပိ ဂါမေပိ. အကလ္လကဿာတိ ဂိလာနဿ. ဧတ္ထ ပန မဇ္ဈိမဒေသေ ဂိလာနဿ ဂုဏင်္ဂုဏူပါဟနာ ပရိဘုတ္တာဝ အာရာမေပိ ဂါမေပိ ဝဋ္ဋတိ၊ ပစ္စန္တိမဒေသေ အပရိဘုတ္တာပိ. မဇ္ဈိမဒေသေပိ ပစ္စန္တိမဒေသေပိ ဘဂဝတာ ဂိလာနဿေဝ ဥပါဟနာ အနုညာတာ ‘‘အနုဇာနာမိ၊ ဘိက္ခဝေ၊ ယဿ ပါဒါ ဝါ ဒုက္ခာ၊ ပါဒါ ဝါ ဖလိတာ၊ ပါဒခိလော ဝါ အာဗာဓော၊ ဥပါဟနံ ဓာရေတု’’န္တိ (မဟာဝ. ၂၄၉) စ ‘‘အနုဇာနာမိ၊ ဘိက္ခဝေ၊ ဂိလာနေန ဘိက္ခုနာ သဥပါဟနေန ဂါမံ ပဝိသိတု’’န္တိ (မဟာဝ. ၂၅၆) ဝုတ္တတ္တာ စ. မဇ္ဈိမဒေသေ စ ဂိလာနော နဝံ ဂုဏင်္ဂုဏူပါဟနံ ဓာရေတုံ ယဒိ လဘတိ၊ ကထံ ပဒေသပညတ္တိ ဟောတီတိ? သဗ္ဗတ္ထ ပန ဘဂဝတာ ဂိလာနဿေဝ ဥပါဟနာ အနုညာတာ၊ တသ္မာ မဇ္ဈိမဒေသေ ဂိလာနော နဝံ ဂုဏင်္ဂုဏူပါဟနံ လဘတီတိ ဂဟေတဗ္ဗန္တိ ဝဒန္တိ.

၁၇၆-၉. သဗ္ဗာဝ နီလကာ (မဟာဝ. ၂၄၆၊ မဟာဝ. အဋ္ဌ. ၂၄၆) သဗ္ဗနီလကာ. ဧသ နယော သဗ္ဗတ္ထ ဩဒါတကာဒီသုပိ. ဩဒါတံ ပန နေဝ ပါဠိယံ၊ န အဋ္ဌကထာယံ ပဋိက္ခိတ္တံ၊ အနုလောမဝသေန ပန ဣဓ ပဋိက္ခိတ္တန္တိ ဝေဒိတဗ္ဗံ. မဟာရင်္ဂရတ္တာ သတပဒိပိဋ္ဌိဝဏ္ဏာ. မဟာနာမရင်္ဂရတ္တာ မန္ဒရတ္တာ. မဉ္ဇေဋ္ဌိကာ ကဏဝေရပုပ္ဖဝဏ္ဏာ. ပုပ္ဖလတာဒီဟိ ဝိစိတ္တာ စိတြာ. နီလပီတာဒိဝဒ္ဓိကာတိ ဧတ္ထ အာဒိ-သဒ္ဒေန ဩဒါတလောဟိတမဉ္ဇေဋ္ဌိကမဟာရင်္ဂမဟာနာမရင်္ဂရတ္တာဒိဝသေန ဝဒ္ဓိကာ ဂဟိတာ. သီဟဗျဂ္ဃုဒ္ဒါဇိနဒီပီနံ စမ္မေဟိ စာတိ သမ္ဗန္ဓော. ကောစီတိ ဂိလာနောပိ အဂိလာနောပိ.

၁၈၀. သကလံ ဝါ ဧကဒေသကံ ဝါ ရဇနံ စောဠေန (မဟာဝ. အဋ္ဌ. ၂၄၆) ပုဉ္ဆိတွာ ဝဠဉ္ဇေယျာတိ အတ္ထော. ခလ္လကာဒိကံ ပန သဗ္ဗံ ဟာရိတွာ ဝဠဉ္ဇေတဗ္ဗံ. ဥပါဟနဝိနိစ္ဆယော.

ဥပါဟနနိဒ္ဒေသဝဏ္ဏနာ နိဋ္ဌိတာ.