၂၁. စမ္မနိဒ္ဒေသဝဏ္ဏနာ

၁၇၃. ဣဒါနိ ‘‘အနုဇာနာမိ၊ ဘိက္ခဝေ၊ သဗ္ဗပစ္စန္တိမေသု ဇနပဒေသု စမ္မာနိ အတ္ထရဏာနိ ဧဠကစမ္မံ အဇစမ္မံ မိဂစမ္မ’’န္တိ (မဟာဝ. ၂၅၉) ဧဝံ ဝုတ္တစမ္မာနိ ဒဿေတုံ ‘‘မိဂါဇေဠကစမ္မာနီ’’တိအာဒိမာဟ. ပရိဘုဉ္ဇိတုန္တိ (မဟာဝ. အဋ္ဌ. ၂၆၂) မဉ္စာဒီသု ယတ္ထ ကတ္ထစိ အတ္ထရိတွာ နိပဇ္ဇိတုံ ဝါ နိသီဒိတုံ ဝါ ဝဋ္ဋန္တီတိ အတ္ထော. ရောဟိတေဏီပသဒါ စ ကုရုင်္ဂါ စ စ-သဒ္ဒေန အညေပိ ဝါဠမိဂါ မိဂမာတုကာဒယောပိ မိဂဇာတိကာ ဧဝါတိ အဓိပ္ပါယော.

၁၇၄. အနုညာတတ္တယာ အညန္တိ –

‘‘မက္ကဋော ကာဠသီဟော စ၊ သရဘော ကဒလီမိဂေါ၊

ယေ စ ဝါဠမိဂါ ကေစိ၊ တေသံ စမ္မံ န ဝဋ္ဋတီ’’တိ. –

ဧတ္ထ ဝါဠမိဂဂ္ဂဟဏေန ဝုတ္တာဝသေသာ အန္တမသော ဂေါမဟိံသာဒယော ဂဟိတာတိ ဝေဒိတဗ္ဗာ. ထဝိကာတိ ဥပါဟနကောသကသတ္ထကောသကကုဉ္စိကကောသကာတိ ဝေဒိတဗ္ဗာ၊ န ပတ္တတ္ထဝိကာဒယော. စမ္မဝိနိစ္ဆယော.

စမ္မနိဒ္ဒေသဝဏ္ဏနာ နိဋ္ဌိတာ.