၂. သံဃာဒိသေသနိဒ္ဒေသဝဏ္ဏနာ

၁၉. ဣဒါနိ သံဃာဒိသေသံ ပကာသေတုံ ‘‘ဂရုကာ နဝါ’’တိအာဒိ အာရဒ္ဓံ. ဂရုကာတိ သံဃာဒိသေသာ ဣဓ အဓိပ္ပေတာ၊ အညတ္ထ ပန ပါရာဇိကာပိ သင်္ဂယှန္တိ. ကသ္မာ ‘‘တေရသာ’’တိ အဝတွာ ‘‘နဝါ’’တိ ဝုတ္တန္တိ စေ? ဝီတိက္ကမက္ခဏေယေဝ အာပဇ္ဇိတဗ္ဗတ္တာ ပဌမာပတ္တိကာ ဝုတ္တာ၊ ယာဝတတိယကာ ပန စတ္တာရော သံဃာဒိသေသာ သံဃာယတ္တတ္တာ စိရေန အာပဇ္ဇန္တီတိ န ဝုတ္တာ. တတ္ထ မောစေတုကာမတာတိ မောစေတုကာမတာယာတိ အတ္ထော ‘‘အလဇ္ဇိတာ’’တိအာဒီသု ဝိယ. ဣမိနာ ပန နယေန မောစနဿာဒေါ မုစ္စနဿာဒေါ မုတ္တဿာဒေါ မေထုနဿာဒေါ ဖဿဿာဒေါ ကဏ္ဍူဝနဿာဒေါ ဒဿနဿာဒေါ နိသဇ္ဇနဿာဒေါ ဝါစဿာဒေါ ဂေဟသိတပေမံ ဝနဘင်္ဂိယန္တိ ဧကာဒသ အဿာဒါ ဝုတ္တာ၊ တေသု ဧကံယေဝ မောစနဿာဒံ ဂဟေတွာ သေသာ ပဋိက္ခိတ္တာ ဟောန္တိ.

တေသံ အဿာဒါနံ ဝသေန ဧဝံ ဝိနိစ္ဆယော ဝေဒိတဗ္ဗော – မောစေတုံ အဿာဒေါ မောစနဿာဒေါ. မောစနဿာဒစေတနာယ နိမိတ္တေ ဥပက္ကမတိ၊ မုစ္စတိ၊ သံဃာဒိသေသော. န မုစ္စတိ စေ၊ ထုလ္လစ္စယံ. မုစ္စနဿာဒေ သစေ အတ္တနော ဓမ္မတာယ မုစ္စမာနံ အဿာဒေတိ၊ န ဥပက္ကမတိ၊ အနာပတ္တိ. သစေ မုစ္စမာနံ အဿာဒေန္တော ဥပက္ကမိတွာ မောစေတိ၊ သံဃာဒိသေသောဝ. အတ္တနော ဓမ္မတာယ မုတ္တေ အဿာဒေါ မုတ္တဿာဒေါ. ဧတ္ထာပိ ဥပက္ကမဿ နတ္ထိတာယ အနာပတ္တိ. ဧဝံ သဗ္ဗတ္ထ. မေထုနဿာဒေန ဣတ္ထိံ ဂဏှန္တဿ မုတ္တေပိ အနာပတ္တိ၊ အယံ မေထုနဿာဒေါ. ဖဿဿာဒေါ ဒုဝိဓော အဇ္ဈတ္တိကော ဗာဟိရော စာတိ. တတ္ထ အဇ္ဈတ္တိကေ တာဝ အတ္တနော နိမိတ္တံ ‘‘ထဒ္ဓံ မုဒုကန္တိ ဇာနိဿာမီ’’တိ ဝါ လောလဘာဝေန ဝါ ကီဠာပယတော သစေ မုစ္စတိ၊ အနာပတ္တိ. ဗာဟိရဖဿဿာဒေ ကာယသံသဂ္ဂရာဂေန မာတုဂါမံ ဖုသတော အာလိင်္ဂတော စ မုတ္တေ အနာပတ္တိ. ကဏ္ဍူဝနဿာဒေ ဒဒ္ဒုကစ္ဆာဒီနံ ဝသေန ခဇ္ဇမာနံ နိမိတ္တံ ကဏ္ဍူဝနဿာဒေန ကဏ္ဍူဝတော မုတ္တေပိ အနာပတ္တိ. ဒဿနဿာဒေ မာတုဂါမဿ အနောကာသံ ဥပနိဇ္ဈာယတော မုတ္တေပိ အနာပတ္တိ. နိသဇ္ဇနဿာဒေ မာတုဂါမေန သဒ္ဓိံ ရဟော နိသိန္နဿ မုတ္တေပိ အနာပတ္တိ. ဝါစာယ အဿာဒေါ ဝါစဿာဒေါ. တေန အဿာဒေန မာတုဂါမံ မေထုနပ္ပဋိသံယုတ္တာဟိ ဝါစာဟိ ဩဘာသန္တဿ မုတ္တေပိ အနာပတ္တိ. ဂေဟသိတပေမေ မာတာဒီနံ မာတာဒိပေမေန အာလိင်္ဂနာဒိံ ကရောန္တဿ မုတ္တေပိ အနာပတ္တိ. ဝနဘင်္ဂေ စ သန္ထဝကရဏတ္ထာယ ဣတ္ထိယာ ပေသိတံ ပုပ္ဖါဒိဝနဘင်္ဂသညိတံ ပဏ္ဏာကာရံ ‘‘ဣတ္ထန္နာမာယ နာမ ဣဒံ မေ ပေသိတ’’န္တိ အဿာဒေန အာမသန္တဿ မုတ္တေပိ အနာပတ္တိ. ဧတေသု ပန မောစနဿာဒဝသေနေဝ ဥပက္ကမန္တဿ အာပတ္တိ၊ သေသာနံ ဝသေန အနာပတ္တီတိ ဝေဒိတဗ္ဗံ.

သုက္ကဿာတိ ‘‘နီလံ ပီတကံ လောဟိတကံ ဩဒါတံ တက္ကဝဏ္ဏံ ဒကဝဏ္ဏံ တေလဝဏ္ဏံ ခီရဝဏ္ဏံ ဒဓိဝဏ္ဏံ သပ္ပိဝဏ္ဏ’’န္တိ (ပါရာ. ၂၃၇) ဧဝံ အာဂတေသု ဒသသု ဝဏ္ဏေသု ယဿ ကဿစိ သုက္ကဿာတိ အဓိပ္ပါယော. ဥပက္ကမ္မာတိ ‘‘အဇ္ဈတ္တရူပေ မောစေတိ၊ ဗဟိဒ္ဓါရူပေ မောစေတိ၊ အဇ္ဈတ္တဗဟိဒ္ဓါရူပေ မောစေတိ၊ အာကာသေ ကဋိံ ကမ္ပေန္တော မောစေတီ’’တိ (ပါရာ. ၂၃၇) ဧဝံ ဝုတ္တေသု စတူသု ဥပါယေသု အညတရေန ဥပါယေန ‘‘ရာဂူပတ္ထမ္ဘေ မောစေတိ၊ ဝစ္စူပတ္ထမ္ဘေ မောစေတိ၊ ပဿာဝူပတ္ထမ္ဘေ မောစေတိ၊ ဝါတူပတ္ထမ္ဘေ မောစေတိ၊ ဥစ္စာလိင်္ဂပါဏကဒဋ္ဌူပတ္ထမ္ဘေ မောစေတီ’’တိ ဧဝံ ဝုတ္တေသု ပဉ္စသု ကာလေသု ကိသ္မိဉ္စိ ကာလေ အင်္ဂဇာတေ ကမ္မနိယံ ပတ္တေ ‘‘အာရောဂျတ္ထာယ မောစေတိ၊ သုခတ္ထာယ မောစေတိ၊ ဘေသဇ္ဇတ္ထာယ၊ ဒါနတ္ထာယ၊ ပုညတ္ထာယ၊ ယညတ္ထာယ၊ သဂ္ဂတ္ထာယ၊ ဗီဇတ္ထာယ၊ ဝီမံသတ္ထာယ၊ ဒဝတ္ထာယ မောစေတီ’’တိ (ပါရာ. ၂၃၇) ဧဝံ ဝုတ္တေသု ဒသသု အဓိပ္ပါယေသု ယေန ကေနစိ အဓိပ္ပါယေန ဟတ္ထာဒီသု ယေန ကေနစိ ဥပက္ကမိတွာတိ အတ္ထော. ဝိမောစယန္တိ အန္တမသော ယံ ဧကာ ခုဒ္ဒကမက္ခိကာ ပိဝေယျ၊ တတ္တကမ္ပိ မောစေန္တောတိ အတ္ထော. အညတြ သုပိနန္တေနာတိ ယာ သုပိနန္တေ သုက္ကဝိဿဋ္ဌိ ဟောတိ၊ တံ ဌပေတွာတိ အတ္ထော. သမဏောတိ ယော ကောစိ ဥပသမ္ပန္နော. ဂရုကန္တိ သံဃာဒိသေသံ. ဖုသေတိ အာပဇ္ဇေယျာတိ အတ္ထော.

သုက္ကဝိဿဋ္ဌိသိက္ခာပဒံ ပဌမံ.

၂၀. ဣဒါနိ ကာယသံသဂ္ဂံ ဒီပေတုံ ‘‘ဣတ္ထိသညီ’’တိအာဒိ အာရဒ္ဓံ. တတ္ထ ဣတ္ထိသညီတိ တဒဟုဇာတာယပိ မနုဿိတ္ထိယာ ဣတ္ထိသညီယေဝ ဟုတွာတိ အတ္ထော. သစေ တတ္ထ ဝေမတိကော ဝါ ပဏ္ဍကပုရိသတိရစ္ဆာနဂတသညီ ဝါ ဟောတိ၊ ထုလ္လစ္စယံ၊ တထာ ဣတ္ထိယာ ကာယေန ကာယပ္ပဋိဗဒ္ဓါမသနေ စ ကာယပ္ပဋိဗဒ္ဓေန ကာယာမသနေ စ ယက္ခီပေတီပဏ္ဍကာနံ ကာယေန ကာယာမသနေ စ. ပုရိသတိရစ္ဆာနဂတိတ္ထီနံ ပန ကာယေန ကာယာမသနေပိ ဒုက္ကဋံ၊ တထာ ယက္ခီအာဒီနံ ကာယေန ကာယပ္ပဋိဗဒ္ဓါဒီသု စ. မတိတ္ထိယာ ပန ထုလ္လစ္စယံ. ကာယသံသဂ္ဂရာဂဝါတိ ဣမိနာ မာတုပေမာဒိံ မောက္ခာဓိပ္ပါယဉ္စ ပဋိက္ခိပတိ. သမ္ဖုသန္တောတိ ကာယသံသဂ္ဂရာဂေန ဥပက္ကမ္မ အန္တမသော လောမေနပိ မနုဿိတ္ထိံ သမ္ဖုသန္တောတိ အတ္ထသမ္ဗန္ဓော. ဣမိနာ ယော ဣတ္ထိယာ အာလိင်္ဂတောပိ ကာယေန န ဝါယမတိ၊ ကေဝလံ ဖဿံယေဝ အနုဘဝတိ၊ တဿ အနာပတ္တီတိ ဒီပိတံ ဟောတိ.

ကာယသံသဂ္ဂသိက္ခာပဒံ ဒုတိယံ.

၂၁. ဣဒါနိ ဒုဋ္ဌုလ္လဝါစံ ပကာသေတုံ ‘‘တထာ သုဏန္တိ’’န္တိအာဒိ အာရဒ္ဓံ. တတ္ထ တထာတိ ဣတ္ထိသညီ. မနုဿိတ္ထိံ သုဏန္တိန္တိ သမ္ဗန္ဓော. သုဏန္တိန္တိ ဣမိနာ ပဋိဗလာယပိ ဣတ္ထိယာ အဝိညတ္တိပထေ ဌိတာယ ဒူတေန ဝါ ပဏ္ဏေန ဝါ အာရောစေန္တဿ ဒုဋ္ဌုလ္လဝါစာပတ္တိန ဟောတီတိ ဒီပိတံ ဟောတိ. ဝိညုဉ္စာတိ ဣမိနာ ယာ မဟလ္လိကာပိ ဗာလာပိ ဧဠမူဂါပိ အသဒ္ဓမ္မပ္ပဋိသံယုတ္တံ ကထံ န ဇာနာတိ၊ သာ ဣဓ နာဓိပ္ပေတာတိ ဒဿေတိ. ဝစ္စမဂ္ဂပဿာဝမဂ္ဂါနံ ဝသေန မဂ္ဂံ ဝါ မေထုနံ ဝါ အာရဗ္ဘာတိ သမ္ဗန္ဓော. ဒုဋ္ဌုလ္လဝါစာယ ရာဂေါ ဒုဋ္ဌုလ္လဝါစာရာဂေါ၊ တေန ဒုဋ္ဌုလ္လဝါစာရာဂေန. တံ အဿာဒေန္တော ဩဘာသေတွာ ဒုရုတ္တဝစနံ ဝတွာ ဂရုကံ ဖုသေတိ အတ္ထော.

ကထံ ဒွေ မဂ္ဂေ အာရဗ္ဘ ပသံသတိ ဂရဟတိ? တတ္ထ ပသံသာယပိ တာဝ ‘‘ဣတ္ထိလက္ခဏေန သုဘလက္ခဏေန သမန္နာဂတာသီ’’တိ ဝဒတိ၊ န တာဝသီသံ ဧတိ. ‘‘တဝ ဝစ္စမဂ္ဂေါ စ ပဿာဝမဂ္ဂေါ စ သုဘော သုသဏ္ဌာနော ဒဿနီယော၊ ဤဒိသေန နာမ ဣတ္ထိလက္ခဏေန သုဘလက္ခဏေန သမန္နာဂတာသီ’’တိ ဝဒတိ၊ သီသံ ဧတိ၊ သံဃာဒိသေသော ဟောတီတိ အတ္ထော. ဂရဟဏေ ပန ‘‘သိခရဏီသိ၊ သမ္ဘိန္နာသိ၊ ဥဘတောဗျဉ္ဇနာသီ’’တိ ဣမာနိ တီဏိ သုဒ္ဓါနိယေဝ သီသံ ဧန္တိ ဝစ္စမဂ္ဂပဿာဝမဂ္ဂါနံ နိယတဝစနတ္တာ အစ္စောဠာရိကတ္တာ စ. အညာနိ ပန ‘‘အနိမိတ္တာသိ၊ နိမိတ္တမတ္တာသီ’’တိအာဒီနိ မဂ္ဂါနံ အနိယတဝစနတ္တာ မေထုနေန ဃဋေတွာ ဝုတ္တာနိ ဧဝ သီသံ ဧန္တိ. မေထုနပ္ပဋိသံယုတ္တေ ‘‘ဒေဟိ မေ၊ အရဟသိ မေ ဒါတု’’န္တိအာဒီဟိ ပန သီသံ န ဧတိ၊ ‘‘မေထုနဓမ္မံ ဒေဟီ’’တိအာဒိနာ မေထုနဓမ္မေ ဃဋိတေယေဝ သံဃာဒိသေသော. ဣတ္ထိယာ ဝစ္စမဂ္ဂပဿာဝမဂ္ဂေ ဌပေတွာ အဓက္ခကံ ဥဗ္ဘဇာဏုမဏ္ဍလံ အာဒိဿ ဝဏ္ဏာဒိဘဏနေ ထုလ္လစ္စယံ၊ တထာ ယက္ခီပေတီပဏ္ဍကေသု ဝစ္စမဂ္ဂပဿာဝမဂ္ဂေ မေထုနေပိ. ဣမေသံ ပန ယက္ခီအာဒီနံ အဓက္ခကာဒိကေ ဝုတ္တပ္ပကာရေ ပဒေသေ ဒုံက္ကဋံ၊ တထာ ဣတ္ထိယာဒီနံ ဥဗ္ဘက္ခကေ အဓောဇာဏုမဏ္ဍလေ ကာယပ္ပဋိဗဒ္ဓေ စာတိ.

ဒုဋ္ဌုလ္လဝါစာသိက္ခာပဒံ တတိယံ.

၂၂. ဣဒါနိ အတ္တကာမပါရိစရိယံ ဒဿေတုံ ‘‘ဝတွာ’’တိအာဒိ ဝုတ္တံ. တတ္ထ ဝတွာတိ ဒုဋ္ဌုလ္လောဘာသနေ ဝုတ္တပ္ပကာရံ ဣတ္ထိံ ဣတ္ထိသညီယေဝ ဟုတွာ ဝတွာတိ အတ္ထော. အတ္တကာမုပဋ္ဌာနဝဏ္ဏန္တိ ဧတ္ထ မေထုနဓမ္မသင်္ခါတေန ကာမေန ဥပဋ္ဌာနံ ကာမုပဋ္ဌာနံ၊ အတ္တနော အတ္ထာယ ကာမုပဋ္ဌာနံ အတ္တကာမုပဋ္ဌာနံ၊ အတ္တနာ ဝါ ကာမိတံ ဣစ္ဆိတန္တိ အတ္တကာမံ၊ သယံ မေထုနရာဂဝသေန ပတ္ထိတန္တိ အတ္ထော၊ အတ္တကာမဉ္စ တံ ဥပဋ္ဌာနဉ္စာတိ အတ္တကာမုပဋ္ဌာနံ၊ တဿ ဝဏ္ဏော အတ္တကာမုပဋ္ဌာနဝဏ္ဏော၊ တံ အတ္တကာမုပဋ္ဌာနဝဏ္ဏံ. ‘‘ဧတဒဂ္ဂံ၊ ဘဂိနိ၊ ပါရိစရိယာနံ ယာ မာဒိသံ သီလဝန္တံ ကလျာဏဓမ္မံ ဗြဟ္မစာရိံ ဧတေန ဓမ္မေန ပရိစရေယျာ’’တိ ဧဝံ ဝတွာတိ သမ္ဗန္ဓော. မေထုနရာဂိနောတိ ဣမိနာ ဂိလာနပစ္စယာဒီဟိ ဥပဋ္ဌာနဿ ဝဏ္ဏံ ဘဏတော အနာပတ္တီတိ ဒီပိတံ ဟောတိ. ဝါစာ မေထုနယုတ္တေနာတိ ဧတ္ထ မေထုနယုတ္တေနေဝ ဝါစာယ မေထုနယာစနေ ဂရုကံ ဟောတိ၊ န အညထာတိ အဓိပ္ပါယော.

အတ္တကာမပါရိစရိယသိက္ခာပဒံ စတုတ္ထံ.

၂၃. ဣဒါနိ သဉ္စရိတ္တံ ဒဿေတုံ ‘‘ပဋိဂ္ဂဟေတွာ’’တိအာဒိ အာရဒ္ဓံ. တတ္ထ ပဋိဂ္ဂဟေတွာတိ ဣတ္ထိယာ ဝါ ပုရိသေန ဝါ ဥဘိန္နံ မာတာဒီဟိ ဝါ ‘‘ဘန္တေ၊ ဣတ္ထန္နာမံ ဣတ္ထိံ ဝါ ပုရိသံ ဝါ ဧဝံ ဘဏာဟီ’’တိ ဝုတ္တော တေသံ ဝစနံ ‘‘သာဓူ’’တိ ဝါ ‘‘ဟောတူ’’တိ ဝါ ‘‘ဘဏာမီ’’တိ ဝါ ယေန ကေနစိ အာကာရေန ဝစီဘေဒံ ကတွာ၊ သီသကမ္ပနာဒီဟိ ဝါ သမ္ပဋိစ္ဆိတွာတိ အတ္ထော. သန္ဒေသန္တိ ဧတ္ထ ပန ဣတ္ထီ ဒသဝိဓာ မာတုရက္ခိတာ ပိတုရက္ခိတာ မာတာပိတုရက္ခိတာ ဘာတုရက္ခိတာ ဘဂိနိရက္ခိတာ ဉာတိရက္ခိတာ ဂေါတ္တရက္ခိတာ ဓမ္မရက္ခိတာ သာရက္ခာ သပရိဒဏ္ဍာတိ. ဒသ ဘရိယာယော ဓနက္ကီတာ ဆန္ဒဝါသိနီ ဘောဂဝါသိနီ ပဋဝါသိနီ ဩဒပတ္တကိနီ ဩဘဋစုမ္ဗဋကာ ဒါသီ စ ဘရိယာ စ ကမ္မကာရီ စ ဘရိယာ စ ဓဇာဟဋာ မုဟုတ္တိကာ စာတိ.

တာသု မာတုရက္ခိတာ ဘိက္ခုံ ပဟိဏတိ ‘‘ဂစ္ဆ၊ ဘန္တေ၊ ဣတ္ထန္နာမံ ဗြူဟိ ‘ဟောမိ ဣတ္ထန္နာမဿ ဘရိယာ ဓနက္ကီတာ။ပေ။ မုဟုတ္တိကာ စာ’’တိ၊ အယံ ဣတ္ထိယာ သန္ဒေသော နာမ. သစေ မာတုရက္ခိတာယ မာတာပိတာဘာတာဘဂိနိအာဒယော ဘိက္ခုံ ပဟိဏန္တိ ‘‘ဂစ္ဆ၊ ဘန္တေ၊ ဣတ္ထန္နာမံ ဗြူဟိ ‘ဟောတု ဣတ္ထန္နာမဿ ဘရိယာ ဓနက္ကီတာ။ပေ။ မုဟုတ္တိကာ စာ’’တိ၊ အယမ္ပိ ဣတ္ထိယာ သန္ဒေသောယေဝ နာမ. ဧဝံ ပိတုရက္ခိတာဒီသုပိ နယော နေတဗ္ဗော. ပုရိသော ဘိက္ခုံ ပဟိဏတိ ‘‘ဂစ္ဆ၊ ဘန္တေ၊ ဣတ္ထန္နာမံ မာတုရက္ခိတံ ဗြူဟိ။ပေ။ သပရိဒဏ္ဍံ ဗြူဟိ ‘ဟောတု ကိရ ဣတ္ထန္နာမဿ ဘရိယာ ဓနက္ကီတာ။ပေ။ မုဟုတ္တိကာ စာ’’တိ၊ အယံ ပုရိသဿ သန္ဒေသော နာမ. သစေ ပုရိသဿ မာတာပိတာဘာတာဘဂိနိအာဒယော ဘိက္ခုံ ပဟိဏန္တိ ‘‘ဂစ္ဆ၊ ဘန္တေ၊ ဣတ္ထန္နာမံ မာတုရက္ခိတံ ဗြူဟိ။ပေ။ သပရိဒဏ္ဍံ ဗြူဟိ ‘ဟောတု ဣတ္ထန္နာမဿ ဘရိယာ ဓနက္ကီတာ။ပေ။ မုဟုတ္တိကာ စာ’’တိ၊ အယမ္ပိ ပုရိသဿ သန္ဒေသောယေဝ နာမ၊ အာဏာပနန္တိ အတ္ထော.

ဝီမံသိတွာတိ ဧတ္ထ ဝုတ္တပ္ပကာရေန သာသနံ ဂဟေတွာ တဿာ ဣတ္ထိယာ ဝါ ပုရိသဿ ဝါ တေသံ အဝဿာရောစနကာနံ မာတာပိတာဘာတာဘဂိနိအာဒီနံ ဝါ အာရောစေတွာတိ အတ္ထော. ဟရန္တိ ယတ္ထ ပဟိတော၊ တတ္ထ ဂန္တွာ တဿာ ဣတ္ထိယာ ဝါ ပုရိသဿ ဝါ အာရောစေတိ၊ သာ ဣတ္ထီ ဝါ ပုရိသော ဝါ ‘‘သာဓူ’’တိ သမ္ပဋိစ္ဆတု ဝါ၊ မာ ဝါ၊ လဇ္ဇာယ ဝါ တုဏှီ ဟောတု၊ ပုန အာဂန္တွာ တဿာ ဣတ္ထိယာ ဝါ ပုရိသဿ ဝါ ဟရန္တော ဂရုကံ ဖုသေတိ သမ္ဗန္ဓော. ဧတ္တာဝတာ ‘‘ပဋိဂ္ဂဏှတိ ဝီမံသတိ ပစ္စာဟရတီ’’တိ ဝုတ္တံ အင်္ဂတ္တယံ သမ္ပာဒိတံ ဟောတိ. ဣမာယ တိဝင်္ဂသမ္ပတ္တိယာ သံဃာဒိသေသော၊ ဣတော ယေဟိ ကေဟိစိ ဒွီဟိ အင်္ဂေဟိ ထုလ္လစ္စယံ၊ ဧကေန ဒုက္ကဋံ. ယက္ခီပေတီပဏ္ဍကေသု အင်္ဂတ္တယေနပိ ထုလ္လစ္စယမေဝ၊ ဧကေန ဝါ ဒွီဟိ ဝါ ဒုက္ကဋန္တိ.

သဉ္စရိတ္တသိက္ခာပဒံ ပဉ္စမံ.

၂၄. ဣဒါနိ ကုဋိကာရသိက္ခာပဒံ အာဝိ ကာတုံ ‘‘သံယာစိတပရိက္ခာရ’’န္တိအာဒိ အာရဒ္ဓံ. တတြာယံ သင်္ခေပတ္ထော – ‘‘ဝါသိံ ဒေထ၊ ဖရသုံ ဒေထာ’’တိအာဒိနာ သယံ ပဝတ္တိတယာစနာယ ဂဟိတပရိက္ခာရံ သံယာစိတပရိက္ခာရံ ပဒဘာဇနေ ဝုတ္တနယေန သံဃံ တိက္ခတ္တုံ ယာစိတွာ လဒ္ဓဘိက္ခူဟိ ဝါ သံဃေနေဝ ဝါ တတ္ထ ဂန္တွာ သာရမ္ဘာနာရမ္ဘသပရိက္ကမနာပရိက္ကမနဘာဝံ ဉတွာ အဒေသိတဝတ္ထုကံ ‘‘ကုဋိ နာမ ဥလ္လိတ္တာ ဝါ ဟောတိ အဝလိတ္တာ ဝါ ဥလ္လိတ္တာဝလိတ္တာ ဝါ’’တိ (ပါရာ. ၃၄၉) ဧဝံ ဝုတ္တလက္ခဏံ ကုဋိံ. ‘‘တတြိဒံ ပမာဏံ၊ ဒီဃသော ဒွါဒသ ဝိဒတ္ထိယော သုဂတဝိဒတ္ထိယာ၊ တိရိယံ သတ္တန္တရာ’’တိ (ပါရာ. ၃၄၈) ဧဝံ ဝုတ္တပမာဏာတိက္ကန္တံ၊ ‘‘မယှံ ဝါသာဂါရံ ဧသာ’’တိ ဧဝံ အတ္တာ ဥဒ္ဒေသော ဧတိဿာတိ အတ္တုဒ္ဒေသာ၊ တံ အတ္တုဒ္ဒေသံ ကတွာ ဂရုံ သံဃာဒိသေသံ ဖုသေတိ သမ္ဗန္ဓော. အယံ ပနေတ္ထ ဝိနိစ္ဆယော – အဒေသိတဝတ္ထုကံ ပမာဏာတိက္ကန္တံ ကုန္ထကိပိလ္လိကာဒီနံ အာသယေ ကတတ္တာ သာရမ္ဘံ ဒွီဟိ ဗလီဗဒ္ဒေဟိ ယုတ္တေန သကဋေန ဂန္တုံ အသက္ကုဏေယျတာယ အပရိက္ကမနံ ဥလ္လိတ္တာဒိဘေဒံ ကုဋိံ အတ္တနော ဝသနတ္ထာယ ကရောန္တော ဝါ ကာရာပေန္တော ဝါ ‘‘ဣဒါနိ နိဋ္ဌာနံ ဂမိဿတီ’’တိ ပဌမပိဏ္ဍဒါနေ ထုလ္လစ္စယံ၊ ဒုတိယပိဏ္ဍဒါနေန လေပေ ဃဋိတေ ဒွေ စ သံဃာဒိသေသေ ဒွေ စ ဒုက္ကဋာနိ၊ သစေ ဒေသိတဝတ္ထုကာယေဝ ဝါ ပမာဏာတိက္ကန္တာယေဝ ဝါ ဟောတိ၊ ဧကံ သံဃာဒိသေသံ ဒွေ စ ဒုက္ကဋာနိ အာပဇ္ဇတီတိ.

ကုဋိကာရသိက္ခာပဒံ ဆဋ္ဌံ.

၂၅. ဣဒါနိ ဝိဟာရကာရသိက္ခာပဒံ ဒဿေတုံ ‘‘မဟလ္လက’’န္တိအာဒိ အာရဒ္ဓံ. တတ္ထ မဟလ္လကန္တိ သဿာမိကဘာဝေန သံယာစိတကုဋိတော မဟန္တဘာဝေါ ဧတဿ အတ္ထိ၊ ယသ္မာ ဝါ ဝတ္ထုံ ဒေသာပေတွာ ပမာဏာတိက္ကမေနာပိ ကာတုံ ဝဋ္ဋတိ၊ တသ္မာ ပမာဏမဟန္တတာယပိ မဟလ္လကော၊ တံ မဟလ္လကံ ဝိဟာရံ ဝါ ကတွာတိ အတ္ထော. ဧတ္ထ ပန အဒေသိတဝတ္ထုကဘာဝေန ဧကော သံဃာဒိသေသော၊ သေသံ အနန္တရသဒိသမေဝ. ဣဓ စ တတ္ထ စ ဝါသာဂါရံ ဌပေတွာ ဥပေါသထာဂါရံ ဝါ ဇန္တာဃရံ ဝါ အဂ္ဂိသာလံ ဝါ ဘဝိဿတီတိ ဧဝမာဒိနာ နယေန ကရောန္တဿ အနာပတ္တိ.

ဝိဟာရကာရသိက္ခာပဒံ သတ္တမံ.

၂၆. ဣဒါနိ အမူလကသိက္ခာပဒံ ပကာသေတုံ ‘‘အမူလကေနာ’’တိအာဒိ အာရဒ္ဓံ. တတ္ထ အမူလကေနာတိ ယံ စောဒကေန စုဒိတကမှိ ပုဂ္ဂလေ အဒိဋ္ဌံ အသုတံ အပရိသင်္ကိတံ၊ ဣဒံ ဧတေသံ ဒဿနသဝနပရိသင်္ကာသင်္ခါတာနံ မူလာနံ အဘာဝတော အမူလကံ၊ တေန အမူလကေန ဝတ္ထုနာတိ သမ္ဗန္ဓော. တတ္ထ အဒိဋ္ဌံ နာမ အတ္တနော ပသာဒစက္ခုနာ ဝါ ဒိဗ္ဗစက္ခုနာ ဝါ အဒိဋ္ဌံ. အသုတံ နာမ တထေဝ ကေနစိ ဝုစ္စမာနံ န သုတံ. အပရိသင်္ကိတံ နာမ စိတ္တေန အပရိသင်္ကိတံ၊ တံ ပန ဒိဋ္ဌသုတမုတဝသေန တိဝိဓံ. တတ္ထ ဘိက္ခုဉ္စ မာတုဂါမဉ္စ တထာရူပေ ဌာနေ ဒိသွာ ‘‘အဒ္ဓါ ဣမေဟိ ကတ’’န္တိ ဝါ ‘‘ကရိဿန္တီ’’တိ ဝါ ပရိသင်္ကတိ၊ ဣဒံ ဒိဋ္ဌပရိသင်္ကိတံ နာမ. အန္ဓကာရေ ပဋိစ္ဆန္နောကာသေ ဝါ ဘိက္ခုဿ စ မာတုဂါမဿ စ ဝစနံ သုတွာ ဒုတိယဿ အတ္ထိဘာဝံ အဇာနန္တော ပုဗ္ဗေ ဝုတ္တနယေန ပရိသင်္ကတိ၊ ဣဒံ သုတပရိသင်္ကိတံ နာမ. ဓုတ္တေဟိ ဣတ္ထီဟိ သဒ္ဓိံ ပစ္စန္တဝိဟာရေသု ပုပ္ဖဂန္ဓသုရာဒီဟိ အနုဘဝိတွာ ဂတဋ္ဌာနံ ဒိသွာ ‘‘ကေန နု ခေါ ဣဒံ ကတ’’န္တိ ဝီမံသန္တော တတြ ကေနစိ ဘိက္ခုနာ ဂန္ဓာဒီဟိ ပူဇာ ကတာ ဟောတိ၊ ဘေသဇ္ဇတ္ထာယ အရိဋ္ဌံ ဝါ ပီတံ၊ သော တဿ ဂန္ဓံ ဃာယိတွာ ‘‘အယံ သော ဘဝိဿတီ’’တိ ပရိသင်္ကတိ၊ ဣဒံ မုတပရိသင်္ကိတံ နာမ. ဧဝံ တိဝိဓာယ ပရိသင်္ကာယ အဘာဝေန အပရိသင်္ကိတန္တိ အတ္ထော.

စောဒေန္တောတိ ‘‘ပါရာဇိကံ ဓမ္မံ အာပန္နောသိ၊ အဿမဏောသိ၊ အသကျပုတ္တိယောသီ’’တိအာဒီဟိ ဝစနေဟိ သယံ စောဒေန္တောတိ အတ္ထော. ဧဝံ စောဒေန္တဿ ဝါစာယ ဝါစာယ သံဃာဒိသေသော. စောဒါပေန္တော ဝါတိ အတ္တနာ တဿ သမီပေ ဌတွာ အညံ ဘိက္ခုံ အာဏာပေတွာ စောဒါပေန္တော တဿ အာဏတ္တဿ ဝါစာယ ဝါစာယ ဂရုံ ဖုသေတိ အတ္ထော. အထ သောပိ စာဝနာဓိပ္ပါယေန ‘‘မယာပိ ဒိဋ္ဌံ အတ္ထီ’’တိအာဒိနာ နယေန စောဒေတိ၊ ဒွိန္နမ္ပိ ဝါစာယ အာပတ္တိ. ဝတ္ထုနာ အန္တိမေန စာတိ ဘိက္ခုနော အနုရူပေသု ဧကူနဝီသတိယာ ပါရာဇိကေသု အညတရေနာတိ အတ္ထော. စာဝေတုန္တိ ဗြဟ္မစရိယာ စာဝေတုံ၊ ယော သုဒ္ဓံ ဝါ အသုဒ္ဓံ ဝါ ကတူပသမ္ပဒံ ပုဂ္ဂလံ သုဒ္ဓဒိဋ္ဌိကော သမာနော စာဝနာဓိပ္ပါယေန စောဒေတိ ဝါ စောဒါပေတိ ဝါ၊ တဿ သံဃာဒိသေသောတိ အဓိပ္ပါယော. သုဏမာနန္တိ ဣမိနာ ပရမ္မုခါ ဒူတေန ဝါ ပဏ္ဏေန ဝါ စောဒေတိ. စောဒေန္တဿ န ရုဟတီတိ ဒီပိတံ ဟောတိ. ပရမ္မုခါ ပန သတ္တဟိ အာပတ္တိက္ခန္ဓေဟိ ဝဒန္တဿ ဒုက္ကဋံ.

အမူလကသိက္ခာပဒံ အဋ္ဌမံ.

၂၇. ဣဒါနိ အညဘာဂိယသိက္ခာပဒံ ဒဿေတုံ ‘‘အညဿ ကိရိယ’’န္တိအာဒိမာဟ. တတ္ထ အညဿ ကိရိယန္တိ အညဿ ခတ္တိယာဒိဇာတိကဿ ပါရာဇိကဿ ဝီတိက္ကမသင်္ခါတံ ကိရိယံ ဒိသွာတိ သမ္ဗန္ဓော. တေန လေသေနာတိ ‘‘ဒသ လေသာ ဇာတိလေသော နာမလေသော ဂေါတ္တလေသော လိင်္ဂလေသော အာပတ္တိလေသော ပတ္တလေသော စီဝရလေသော ဥပဇ္ဈာယလေသော အာစရိယလေသော သေနာသနလေသော’’တိ (ပါရာ. ၃၉၄) ဧဝံ ဝုတ္တေသု ဒသသု လေသေသု ယော တသ္မိံ ပုဂ္ဂလေ ဒိဿတိ၊ တေန လေသေန တဒညံ ပုဂ္ဂလံ ဗြဟ္မစရိယာ စာဝေတုံ အန္တိမဝတ္ထုနာ စောဒေန္တော ဂရုကံ ဖုသေတိ အတ္ထော. တတ္ထ အညမ္ပိ ဝတ္ထုံ လိဿတိ သိလိဿတိ ဝေါဟာရမတ္တေနေဝ ဤသကံ အလ္လီယတီတိ လေသော၊ ဇာတိယေဝ လေသော ဇာတိလေသော. ဧသ နယော သေသပဒေသုပိ. လေသေန စောဒေန္တော ကထံ စောဒေတိ? အညော ခတ္တိယဇာတိကော ဣမိနာ စောဒကေန ပါရာဇိကံ ဓမ္မံ အဇ္ဈာပဇ္ဇန္တော ဒိဋ္ဌော ဟောတိ၊ သော အညံ အတ္တနော ဝေရိံ ခတ္တိယဇာတိကံ ဘိက္ခုံ ပဿိတွာ တံ ခတ္တိယဇာတိလေသံ ဂဟေတွာ ဧဝံ စောဒေတိ ‘‘ခတ္တိယော မယာ ဒိဋ္ဌော ပါရာဇိကံ ဓမ္မံ အဇ္ဈာပဇ္ဇန္တော၊ တွမ္ပိ ခတ္တိယော ပါရာဇိကံ ဓမ္မံ အာပန္နောသီ’’တိ ဝါ ‘‘သော တွံ ခတ္တိယော၊ နာညော၊ ပါရာဇိကံ ဓမ္မံ အဇ္ဈာပန္နောသီ’’တိ ဝါ စောဒေတိ. ဧဝံ နာမလေသာဒယောပိ ဝေဒိတဗ္ဗာ.

အညဘာဂိယသိက္ခာပဒံ နဝမံ.

၂၈. ဧတ္တာဝတာ ‘‘ဂရုကာ နဝါ’’တိ ဥဒ္ဒိဋ္ဌေ ဝိတ္ထာရတော ဒဿေတွာ ဣဒါနိ တေသု အာပန္နေသု ပဋိပဇ္ဇနာကာရံ ဒဿေတုံ ‘‘ဆာဒေတိ ဇာနမာပန္န’’န္တိအာဒိ ဝုတ္တံ. တဿာယံ ပိဏ္ဍတ္ထော – ယော ဘိက္ခု ‘‘အယံ ဣတ္ထန္နာမာ အာပတ္တီ’’တိ အာပတ္တိဝသေန ဝါ ‘‘ဣဒံ ဘိက္ခူနံ န ဝဋ္ဋတီ’’တိ ဧဝံ ဝတ္ထုဝသေန ဝါ ဇာနမာပန္နံ အာပတ္တိံ ယာဝ ဆာဒေတိ၊ တာဝ တေန ဘိက္ခုနာ အကာမာ ပရိဝါသော ဝသိတဗ္ဗောတိ. စရေယျာတိ မာနတ္တံ သမာဒါယ ဝသေယျ. ကိတ္တကံ ဒိဝသန္တိ စေ? ဆ ရတ္တိယော. မာနတ္တဝါသော ပန သံဃေယေဝ၊ န ဂဏေ၊ န ပုဂ္ဂလေ၊ တေန ဝုတ္တံ ‘‘သံဃေ’’တိ. ပရိဝုတ္ထောတိ ‘‘တယော ခေါ ဥပါလိ ပါရိဝါသိကဿ ဘိက္ခုနော ရတ္တိစ္ဆေဒါ သဟဝါသော ဝိပ္ပဝါသော အနာရောစနာ’’တိ (စူဠဝ. ၈၃) ဧဝံ ဝုတ္တံ ရတ္တိစ္ဆေဒံ အကတွာ ပရိဝုတ္ထောတိ အတ္ထော. တတ္ထ သဟဝါသောတိ ပကတတ္တေန ဘိက္ခုနာ သဒ္ဓိံ ဧကစ္ဆန္နေ ဥဒကပါတဋ္ဌာနဗ္ဘန္တရေ ဝါသော. ဝိပ္ပဝါသော နာမ အညံ ပကတတ္တံ ဘိက္ခုံ ဝိနာ ဝါသော. အနာရောစနာတိ အာဂန္တုကာဒီနံ အနာရောစနာ. ဧတေသု တီသု ဧကေနာပိ ရတ္တိစ္ဆေဒေါ ဟောတိ ဧဝ. ဧတ္ထ ပန ဥပစာရသီမဂတာနံ အာရောစေတဗ္ဗံ၊ န ဗဟိ ဌိတာနံ၊ ဗဟိ ဌိတာနမ္ပိ သစေ သဒ္ဒံ သုဏာတိ၊ ပဿတိ၊ ဒူရံ ဝါ ဂန္တွာ အာရောစေတဗ္ဗမေဝ၊ အနာရောစေန္တဿ ရတ္တိစ္ဆေဒေါ စေဝ ဝတ္တဘေဒေ ဒုက္ကဋဉ္စ ဟောတိ. အဇာနန္တဿေဝ ဥပစာရသီမံ ပဝိသိတွာ ဂစ္ဆန္တိ စေ၊ ရတ္တိစ္ဆေဒေါဝ ဟောတိ၊ န ဝတ္တဘေဒေါ.

စိဏ္ဏမာနတ္တန္တိ ‘‘စတ္တာရော ခေါ၊ ဥပါလိ၊ မာနတ္တစာရိကဿ ဘိက္ခုနော ရတ္တိစ္ဆေဒါ သဟဝါသော ဝိပ္ပဝါသော အနာရောစနာ ဦနေ ဂဏေ စရဏ’’န္တိ (စူဠဝ. ၉၂) ဧဝံ ဝုတ္တံ ရတ္တိစ္ဆေဒံ အကတွာ စိဏ္ဏမာနတ္တံ ပရိနိဋ္ဌိတမာနတ္တန္တိ အတ္ထော. ဧတ္ထ ပန သဟဝါသာဒယော ပရိဝါသေ ဝုတ္တပ္ပကာရာ ဧဝ. ‘‘ဦနေ ဂဏေ စရဏ’’န္တိ ဧတ္ထ ဂဏော စတ္တာရော ဝါ အတိရေကာ ဝါ ဘိက္ခူ၊ တသ္မာ သစေပိ တီဟိ ဘိက္ခူဟိ သဒ္ဓိံ ဝသတိ၊ ရတ္တိစ္ဆေဒေါ ဟောတိယေဝ၊ ‘‘သစေ ပန တေန တေသံ အတ္ထိဘာဝံ ဒိသွာ အာရောစိတေ ပက္ကမန္တိ၊ ဦနေ ဂဏေ စရဏဒေါသော န ဟောတီ’’တိ (စူဠဝ. အဋ္ဌ. ၉၇) အဋ္ဌကထာသု ဝုတ္တံ ကိရ. အဗ္ဘေယျာတိ တံ ဘိက္ခုံ ဝီသတိဂဏော သံဃော အဗ္ဘေယျ သမ္ပဋိစ္ဆေယျ၊ အဗ္ဘာနကမ္မဝသေန ဩသာရေယျာတိ အတ္ထော. သစေ ဧကေနပိ ဦနော ဝီသတိဂဏော ဘိက္ခုသံဃော တံ ဘိက္ခုံ အဗ္ဘေယျ၊ သော စ ဘိက္ခု န အဗ္ဘိတော၊ တေ စ ဘိက္ခူ ဂါရယှာ၊ ဒုက္ကဋံ အာပဇ္ဇန္တီတိ အတ္ထော.

၂၉. ဣဒါနိ ယထာ ဆာဒိတာ အာပတ္တိ ဆန္နာ ဟောတိ၊ တံ ပကာရံ ဒဿေတုံ ‘‘အာပတ္တီ’’တိအာဒိ ဝုတ္တံ. တတ္ထာယံ ပဒယောဇနာ – အာပတ္တိတာ စ အနုက္ခိတ္တတာ စ အနန္တရာယတာ စ ပဟုတ္တတာ စ အာပတ္တိနုက္ခိတ္တအနန္တရာယပဟုတ္တတာယော၊ ဧတာသု စတူသု တထာသညိတာ စ ဆာဒေတုကာမော ဟုတွာ ဆာဒနာ စာတိ ဧဝံ ဒသဟင်္ဂေဟိ အရုဏုဂ္ဂမမှိ ဆန္နာ ဟောတီတိ. ဧတ္ထ ပန အာပတ္တိအာဒီသု စတူသု အာပတ္တိသညိတာ စ အနုက္ခိတ္တသညိတာ စ အနန္တရာယသညိတာ စ ပဟုတ္တသညိတာ စာတိ ဧဝံ သညာဝသေန ယောဇေတွာ အဋ္ဌင်္ဂါနိ ဂဟေတဗ္ဗာနိ၊ ဆာဒေတုကာမောတိ ဣဒမေကံ၊ ဆာဒနာတိ ဣဒမေကန္တိ ဧဝံ ဒသ.

ဧတေသု ပန အာဒိတော ပဋ္ဌာယ အယံ ဝိနိစ္ဆယော – ‘‘အာပတ္တိ စ ဟောတိ အာပတ္တိသညီ စာ’’တိ ဧတ္ထ ယံ အာပန္နော၊ သာ တေရသန္နံ အညတရာ ဟောတိ၊ သောပိ စ တတ္ထ ဂရုကာပတ္တိသညီယေဝ ဟုတွာ ဇာနန္တော ဆာဒေတိ၊ ဆန္နာ ဟောတိ. သစေ တတ္ထ အနာပတ္တိသညီ ဝါ အညာပတ္တိသညီ ဝါ ဝေမတိကော ဝါ ဟောတိ၊ အစ္ဆန္နာဝ ဟောတိ. တိဝိဓံ ပန ဥက္ခေပနီယကမ္မံ၊ တေန အကတော အနုက္ခိတ္တော. သော စေ ပကတတ္တသညီ ဟုတွာ ဆာဒေတိ၊ ဆန္နာ ဟောတိ. သစေ အပကတတ္တသညီ ဆာဒေတိ၊ အစ္ဆန္နာ ဟောတိ. အပကတတ္တေန ပန ပကတတ္တသညိနာပိ အပကတတ္တသညိနာပိ ဆာဒိတံ အစ္ဆာဒိတမေဝ ဟောတီတိ. အနန္တရာယိကောတိ ယဿ ဒသသု ရာဇစောရအဂ္ဂိဥဒကမနုဿာမနုဿဝါဠသရီသပဇီဝိတဗြဟ္မစရိယန္တရာယေသုပိ ဧကောပိ နတ္ထိ၊ သော စေ အနန္တရာယိကသညီ ဟုတွာ ဆာဒေတိ၊ ဆန္နာ ဟောတိ. သစေ သော အန္ဓကာရဘီရုကော အနန္တရာယေ ဧဝ ဝါဠာဒိအန္တရာယသညီ ဟုတွာ ဆာဒေတိ၊ အစ္ဆန္နာဝ ဟောတိ. ပဟူတိ ယော သက္ကောတိ သဘာဂဘိက္ခုနော သမီပံ ဂန္တုဉ္စေဝ အာရောစိတုဉ္စ၊ သော စေ ပဟုသညီ ဟုတွာ ဆာဒေတိ၊ ဆန္နာ ဟောတိ. ယော ပန အပဟု ဟုတွာ ပဟုသညီ၊ ပဟု ဝါ အပဟုသညီ ဟုတွာ ဆာဒေတိ၊ အစ္ဆန္နာဝ ဟောတီတိ.

အရုဏုဂ္ဂမမှီတိ ဧတ္ထ ပုရေဘတ္တံ ဝါ အာပတ္တိံ အာပန္နော ဟောတိ ပစ္ဆာဘတ္တံ ဝါ၊ ယာဝ အရုဏံ န ဥဂ္ဂစ္ဆတိ၊ တာဝ အာရောစေတဗ္ဗာ. သစေ ပန အရုဏဗ္ဘန္တရေ သတက္ခတ္တုမ္ပိ ဆာဒေတုကာမတာ ဥပ္ပဇ္ဇတိ၊ အစ္ဆန္နာဝ ဟောတိ. အာရောစေန္တော ပန သဘာဂသံဃာဒိသေသံ အာပန္နဿ အာရောစေတုံ န ဝဋ္ဋတိ. သစေ အာရောစေတိ၊ အာပတ္တိ ပန အာဝိကတာ ဟောတိ၊ အာရောစနပစ္စယာ ပန အညံ ဒုက္ကဋံ အာပတ္တိံ အာပဇ္ဇတိ. ဣမိနာ အညမ္ပိ ဝတ္ထုသဘာဂါပတ္တိံ အာရောစေတုံ န ဝဋ္ဋတီတိ ဒီပိတော ဟောတိ. အာရောစေန္တေန ပန ‘‘အဟံ တဝ သန္တိကေ ဧကံ အာပတ္တိံ အာဝိ ကရောမီ’’တိ ဝါ ‘‘အာစိက္ခာမီ’’တိ ဝါ ‘‘အာရောစေမီ’’တိ ဝါ ‘‘ဧကံ အာပတ္တိံ အာပန္နဘာဝံ ဇာနာဟီ’’တိ ဝါ ‘‘ဧကံ ဂရုကာပတ္တိံ အာဝိ ကရောမီ’’တိ ဝါ အာဒိနာ နယေန ဝတ္တဗ္ဗံ၊ ဧတ္တာဝတာ အစ္ဆန္နာဝ ဟောတိ. သစေ ‘‘လဟုကာပတ္တိံ အာရောစေမီ’’တိ ဝဒတိ၊ ဆန္နာဝ ဟောတီတိ. သံဃာဒိသေသဝိနိစ္ဆယော.

သံဃာဒိသေသနိဒ္ဒေသဝဏ္ဏနာ နိဋ္ဌိတာ.