၄. ကာဏမာတာသိက္ခာပဒဝဏ္ဏနာ

ဒွတ္တိပတ္တပူရာ ပဋိဂ္ဂဟေတဗ္ဗာတိ တထာနီတပူဝေဟိ အတ္ထိကေန ဥက္ကဋ္ဌပတ္တပ္ပမာဏဝသေန ဂဟေတဗ္ဗာ. ‘‘မာ ခေါ တွံ ဧတ္ထ ပဋိဂ္ဂဏှီ’’တိ အပါထေယျာဒိအတ္ထာယ သဇ္ဇိတသညာယ အတိရေကပ္ပဋိဂ္ဂဟဏေန အာရောစနေ၊ အသံဝိဘာဂေ စ န မုစ္စတိ အစိတ္တကတ္တာ သိက္ခာပဒဿ. အထ ဥဂ္ဂဟိတကံ ဂဏှာတိ၊ န မုစ္စတိ ဧဝ. အသံဝိဘာဂေ ပန အနာပတ္တိ အကပ္ပိယတ္တာ. အစိတ္တကတာ ပဏ္ဏတ္တိဇာနနာဘာဝေနေဝ၊ န ဝတ္ထုဇာနနာဘာဝေနာတိ ဧကေ. ‘‘န ပါထေယျာဒိအတ္ထာယ သဇ္ဇိတဘာဝဇာနန’’န္တိ အင်္ဂေသု အဝုတ္တတ္တာ သစေ သဉ္စိစ္စ န ဝဒတိ၊ ပါစိတ္တိယန္တိ ပေါရာဏာ ဝဒန္တိ. အတိရေကပ္ပဋိဂ္ဂဟဏန္တိ တတ္ထ ပဉ္စမံဝ အင်္ဂံ ဝုတ္တံ၊ တသ္မာ အပ္ပဋိဂ္ဂဟိတတ္တာ န ပါစိတ္တိယံ၊ ကတ္တဗ္ဗာကရဏတော ပန ဒုက္ကဋံ. အညထာ ကိရိယာကိရိယံ ဣဒံ အာပဇ္ဇတိ. အနိဝါရဏံ၊ အနာရောစနံ ဝါ ဆဋ္ဌမင်္ဂံ ဝတ္တဗ္ဗံ သိယာ.

ကာဏမာတာသိက္ခာပဒဝဏ္ဏနာ နိဋ္ဌိတာ.