၅. မဉ္စပီဌသိက္ခာပဒဝဏ္ဏနာ
အဋ္ဌင်္ဂုလပါဒကန္တိ ဘာဝနပုံသကနိဒ္ဒေသော. ‘‘ဆေဒနကံ ဘေဒနကသဒိသမေဝါ’’တိ ဣမိနာ ‘‘ဆေဒနမေဝ ဆေဒနကံ၊ တံ အဿ အတ္ထီတိ ဆေဒနက’’န္တိ ဣမမတ္ထံ အတိဒိသတိ.
ယထာ ပမာဏမေဝ ဥပရိ ဒိဿတိ၊ ဧဝံ နိခဏိတွာ ဝါတိ သစေ ပန န ဆိန္ဒိတုကာမော ဟောတိ၊ ယထာ ပမာဏမေဝ ဥပရိ ဒိဿတိ၊ ဧဝံ ဘူမိယံ နိခဏိတွာ ဝါ. အဋ္ဋကံ ဝါ ဗန္ဓိတွာတိ ဥက္ခိပိတွာ တုလာသင်္ဃာတေ ဌပေတွာ အဋ္ဋံ ကတွာ.
မဉ္စပီဌသိက္ခာပဒဝဏ္ဏနာ နိဋ္ဌိတာ.