၃. ဝိကာလဂါမပ္ပဝေသနသိက္ခာပဒဝဏ္ဏနာ

စာရိတ္တေတိ စာရိတ္တသိက္ခာပဒေ. ဥပစာရန္တိ ဒုတိယလေဍ္ဍုပါတံ. အညံ ဂါမံ ဂစ္ဆန္တာနံ ပုန အာပုစ္ဆနကိစ္စံ နတ္ထီတိ ဥဿာဟံ အပ္ပဋိပ္ပဿမ္ဘေတွာ အညံ ဂါမံ ဂစ္ဆန္တာနံ ဂါမသတမ္ပိ ဟောတု၊ ပုန အာပုစ္ဆနကိစ္စံ နတ္ထီတိ အတ္ထော. တေနာဟ ‘‘သစေ ပနာ’’တိအာဒိ. ဥဿာဟန္တိ ဂါမပ္ပဝိသနုဿာဟံ. အန္တရာရာမာဒီသု (ပါစိ. အဋ္ဌ. ၅၁၅) န ကေဝလံ အနာပုစ္ဆာ ဂစ္ဆန္တဿေဝ၊ ကာယဗန္ဓနံ အဗန္ဓိတွာ သင်္ဃာဋိံ အပါရုပိတွာ ဂစ္ဆန္တဿာပိ အနာပတ္တိ. အာပဒါသူတိ သီဟော ဝါ ဗျဂ္ဃေါ ဝါ အာဂစ္ဆတိ၊ မေဃော ဝါ ဥဋ္ဌေတိ၊ အညော ဝါ ကောစိ ဥပဒ္ဒဝေါ ဥပ္ပဇ္ဇတိ၊ အနာပတ္တိ. ဧဝရူပါသု အာပဒါသု ဗဟိဂါမတော အန္တောဂါမံ ပဝိသိတုံ ဝဋ္ဋတိ.

ဝိကာလဂါမပ္ပဝေသနသိက္ခာပဒဝဏ္ဏနာ နိဋ္ဌိတာ.