၅. တလသတ္တိကသိက္ခာပဒဝဏ္ဏနာ

တလသတ္တိကန္တိ တလမေဝ တလသတ္တိကံ. ‘‘ပေါထနသမတ္ထဋ္ဌေန သတ္တိက’’န္တိ (ဝဇိရ. ဋီ. ပါစိတ္တိယ ၄၅၆) ဧကေ. ဥစ္စာရေယျာတိ ဥက္ခိပေယျ. နပဟရိတုကာမတာယ ဒိန္နတ္တာ ဒုက္ကဋန္တိ ဧတ္ထ ပဟရိတုကာမတာယ ပဟရိတေ ပုရိမသိက္ခာပဒေန ပါစိတ္တိယံ. ဥစ္စာရေတုကာမတာယ ကေဝလံ ဥဂ္ဂိရဏမတ္တေ ကတေ ဣမိနာ ပါစိတ္တိယံ. ဣမိနာ ပန ဝိရဇ္ဈိတွာ ပဟာရော ဒိန္နော၊ တသ္မာ ဒုက္ကဋံ. ဧတ္ထ ပန ‘‘တိရစ္ဆာနဂတာဒီနံ အသုစိကရဏာဒီနိ ဒိသွာ ကုဇ္ဈိတွာပိ ဥဂ္ဂိရန္တဿ မောက္ခာဓိပ္ပါယောယေဝါ’’တိ (သာရတ္ထ. ဋီ. ပါစိတ္တိယ ၃.၄၇၁) ဝဒန္တိ.

တလသတ္တိကသိက္ခာပဒဝဏ္ဏနာ နိဋ္ဌိတာ.