၅. ဦနဝီသတိဝဿသိက္ခာပဒဝဏ္ဏနာ

ဂဗ္ဘဝီသောပိ ဟိ ‘‘ပရိပုဏ္ဏဝီသော’’ တွေဝ သင်္ခံ ဂစ္ဆတီတိ အာဟ ‘‘ပဋိသန္ဓိဂ္ဂဟဏတော ပဋ္ဌာယာ’’တိအာဒိ. တတ္ထ ပဋိသန္ဓိဂ္ဂဟဏတော ပဋ္ဌာယာတိ ယံ မာတုကုစ္ဆိသ္မိံ ပဌမံ စိတ္တံ ဥပ္ပန္နံ ပဌမံ ဝိညာဏံ ပါတုဘူတံ၊ တံ အာဒိံ ကတွာ. သောတိ ယော ပုဂ္ဂလော ဦနဝီသတိဝဿော ဥပသမ္ပာဒိတော၊ သော ပုဂ္ဂလော. အညံ ဥပသမ္ပာဒေတီတိ ဥပဇ္ဈာယော ဝါ ကမ္မဝါစာစရိယော ဝါ ဟုတွာ အညံ ပုဂ္ဂလံ ဥပသမ္ပာဒေတိ. တန္တိ ဦနဝီသတိဝဿံ ပုဂ္ဂလံ. သီမံ ဝါ သမ္မန္နတီတိ နဝံ သီမံ ဗန္ဓတိ.

ဦနဝီသတိဝဿသိက္ခာပဒဝဏ္ဏနာ နိဋ္ဌိတာ.