၇. သပ္ပါဏကဝဂ္ဂေါ

၁. သဉ္စိစ္စသိက္ခာပဒဝဏ္ဏနာ

ပါစိတ္တိယန္တိ အန္တမသော မဉ္စပီဌံ သောဓေန္တော မင်္ဂုလဗီဇကေပိ ပါဏသညီ နိက္ကာရုဏိကတာယ တံ ဘိန္ဒန္တော အပနေတိ (ပါစိ. အဋ္ဌ. ၃၈၂)၊ ပါစိတ္တိယံ. တေနာဟ ‘‘တံ ခုဒ္ဒကမ္ပီ’’တိအာဒိ. ဥပက္ကမမဟန္တတာယ အကုသလံ မဟန္တံ ဟောတီတိ ဗဟုက္ခတ္တုံ ပဝတ္တဇဝနေဟိ လဒ္ဓါသေဝနာယ သန္နိဋ္ဌာပကစေတနာယ ဝသေန ပယောဂဿ မဟန္တတ္တာ အကုသလံ မဟန္တံ ဟောတိ၊ မဟာသာဝဇ္ဇံ ဟောတီတိ အဓိပ္ပါယော.

သဉ္စိစ္စသိက္ခာပဒဝဏ္ဏနာ နိဋ္ဌိတာ.

၂. သပ္ပါဏကသိက္ခာပဒဝဏ္ဏနာ

ဧတ္ထ စ ပဋင်္ဂပါဏကာနံ ပတနံ ဉတွာပိ သုဒ္ဓစိတ္တတာယ ပဒီပုဇ္ဇလနေ ဝိယ သပ္ပါဏကဘာဝံ ဉတွာပိ ဥဒကသညာယ ပရိဘုဉ္ဇိတဗ္ဗတော ပဏ္ဏတ္တိဝဇ္ဇတာ ဝေဒိတဗ္ဗာ.

သပ္ပါဏကသိက္ခာပဒဝဏ္ဏနာ နိဋ္ဌိတာ.

၃. ဥက္ကောဋနသိက္ခာပဒဝဏ္ဏနာ

တဿ တဿ ဘိက္ခုနောတိ ယေန ယေန ဝူပသမိတံ၊ တဿ တဿ ဘိက္ခုနော. ‘‘အကတံ ကမ္မ’’န္တိအာဒီနိ ဝဒန္တောတိ ‘‘အကတံ ကမ္မံ၊ ဒုက္ကဋံ ကမ္မံ၊ ပုန ကာတဗ္ဗံ ကမ္မံ၊ အနိဟတံ ဒုန္နိဟတံ ပုန နိဟနိတဗ္ဗ’’န္တိ (ပါစိ. ၃၉၄) ဝဒန္တော. ယထာဌိတဘာဝေန ပတိဋ္ဌာတုံ န ဒဒေယျာတိ တေသံ ပဝတ္တိ အာကာရဒဿနတ္ထံ ဝုတ္တံ. တေနာဟ ‘‘ယံ ပန ဓမ္မေန အဓိကရဏံ နိဟတံ၊ တံ သုနိဟတမေဝါ’’တိ.

ဥက္ကောဋနသိက္ခာပဒဝဏ္ဏနာ နိဋ္ဌိတာ.

၄. ဒုဋ္ဌုလ္လသိက္ခာပဒဝဏ္ဏနာ

စတ္တာရိ ပါရာဇိကာနိ အတ္ထုဒ္ဓါရဝသေန ပဒဘာဇနိယံ ဒဿိတာနီတိ အာဟ ‘‘ဒုဋ္ဌုလ္လန္တိ သံဃာဒိသေသံ အဓိပ္ပေတ’’န္တိ. ယေန ကေနစိ ဥပါယေနာတိ ‘‘သာမံ ဝါ ဇာနာတိ၊ အညေ ဝါ တဿ အာရောစေန္တိ၊ သော ဝါ အာရောစေတီ’’တိ (ပါစိ. ၃၉၉) ဝုတ္တေသု ယေန ကေနစိ ဥပါယေန. ပါစိတ္တိယံ ဓုရံ နိက္ခိတ္တမတ္တေယေဝါတိ အဓိပ္ပါယော. သစေ ပစ္ဆာပိ အာရောစေတိ၊ ဓုရနိက္ခေပနေ အာပတ္တိတော န မုစ္စတိ. တေနာဟ ‘‘သစေပီ’’တိအာဒိ. သမဏသတမ္ပိ အာပဇ္ဇတိယေဝါတိ သမဏသတမ္ပိ သုတွာ ယဒိ ဆာဒေတိ၊ ပါစိတ္တိယံ အာပဇ္ဇတိယေဝါတိ အတ္ထော. ယေနဿ အာရောစိတန္တိ ယေန ဒုတိယေန အဿ တတိယဿ အာရောစိတံ. တဿေဝါတိ တဿ ဒုတိယဿေဝ. အာရောစေတီတိ ပဋိစ္ဆာဒနတ္ထမေဝ ‘‘မာ ကဿစိ အာရောစေသီ’’တိ ဝဒတိ. ကောဋိဆိန္နာ ဟောတီတိ (သာရတ္ထ. ဋီ. ပါစိတ္တိယ ၃.၃၉၉) ယသ္မာ ပဋိစ္ဆာဒနပစ္စယာ အာပတ္တိံ အာပဇ္ဇိတွာဝ ဒုတိယေန တတိယဿ အာရောစိတံ၊ တသ္မာ တပ္ပစ္စယာ ပုန တေန အာပဇ္ဇိတဗ္ဗာပတ္တိယာ အဘာဝတော အာပတ္တိယာ ကောဋိ ဆိန္နာ နာမ ဟောတိ.

အာဒိပဒေတိ ဒုဋ္ဌုလ္လာပတ္တိသညီ၊ ဝေမတိကော၊ အဒုဋ္ဌုလ္လာပတ္တိသညီတိ ဣမေသု တီသု ‘‘ဒုဋ္ဌုလ္လာပတ္တိသညီ ပဋိစ္ဆာဒေတီ’’တိ (ပါစိ. ၄၀၀) ဣမသ္မိံ ပဌမပဒေ. ဣတရေသု ဒွီသူတိ ‘‘ဝေမတိကော ပဋိစ္ဆာဒေတိ၊ အဒုဋ္ဌုလ္လာပတ္တိသညီ ပဋိစ္ဆာဒေတီ’’တိ ဣမေသု ပဒေသု. အဒုဋ္ဌုလ္လာယာတိ အဝသေသပဉ္စာပတ္တိက္ခန္ဓေ. အနုပသမ္ပန္နဿ ဒုဋ္ဌုလ္လေ ဝါ အဒုဋ္ဌုလ္လေ ဝါ အဇ္ဈာစာရေတိ အနုပသမ္ပန္နဿ ပုရိမပဉ္စသိက္ခာပဒဝီတိက္ကမသင်္ခါတေ ဒုဋ္ဌုလ္လေ ဝါ ဣတရသ္မိံ အဒုဋ္ဌုလ္လေ ဝါ အဇ္ဈာစာရေ. ယံ ပန သမန္တပါသာဒိကာယံ ‘‘အနုပသမ္ပန္နဿ သုက္ကဝိသဋ္ဌိ စ ကာယသံသဂ္ဂေါ စာတိ အယံ ဒုဋ္ဌုလ္လအဇ္ဈာစာရော နာမာ’’တိ (ပါစိ. အဋ္ဌ. ၄၀၀) ဝုတ္တံ၊ တံ ဒုဋ္ဌုလ္လာရောစနသိက္ခာပဒဋ္ဌကထာယ (ပါစိ. အဋ္ဌ. ၇၈ အာဒယော) န သမေတိ၊ န စာပိ ဧဝံ ဝတ္တုံ ယုဇ္ဇတိ ‘‘အာရောစနေ အနုပသမ္ပန္နဿ ဒုဋ္ဌုလ္လံ အညထာ အဓိပ္ပေတံ၊ ပဋိစ္ဆာဒနေ အညထာ’’တိ (သာရတ္ထ. ဋီ. ပါစိတ္တိယ ၄၀၀) ဝိသေသကာရဏဿာနုပလဗ္ဘနတော၊ တသ္မာ တံ ဥပပရိက္ခိတဗ္ဗံ.

ဒုဋ္ဌုလ္လသိက္ခာပဒဝဏ္ဏနာ နိဋ္ဌိတာ.

၅. ဦနဝီသတိဝဿသိက္ခာပဒဝဏ္ဏနာ

ဂဗ္ဘဝီသောပိ ဟိ ‘‘ပရိပုဏ္ဏဝီသော’’ တွေဝ သင်္ခံ ဂစ္ဆတီတိ အာဟ ‘‘ပဋိသန္ဓိဂ္ဂဟဏတော ပဋ္ဌာယာ’’တိအာဒိ. တတ္ထ ပဋိသန္ဓိဂ္ဂဟဏတော ပဋ္ဌာယာတိ ယံ မာတုကုစ္ဆိသ္မိံ ပဌမံ စိတ္တံ ဥပ္ပန္နံ ပဌမံ ဝိညာဏံ ပါတုဘူတံ၊ တံ အာဒိံ ကတွာ. သောတိ ယော ပုဂ္ဂလော ဦနဝီသတိဝဿော ဥပသမ္ပာဒိတော၊ သော ပုဂ္ဂလော. အညံ ဥပသမ္ပာဒေတီတိ ဥပဇ္ဈာယော ဝါ ကမ္မဝါစာစရိယော ဝါ ဟုတွာ အညံ ပုဂ္ဂလံ ဥပသမ္ပာဒေတိ. တန္တိ ဦနဝီသတိဝဿံ ပုဂ္ဂလံ. သီမံ ဝါ သမ္မန္နတီတိ နဝံ သီမံ ဗန္ဓတိ.

ဦနဝီသတိဝဿသိက္ခာပဒဝဏ္ဏနာ နိဋ္ဌိတာ.

၆. ထေယျသတ္ထသိက္ခာပဒဝဏ္ဏနာ

ရာဇာနံ ဝါ ဝဉ္စေတွာတိ ရာဇာနံ ထေနေတွာ ရညော သန္တကံ ကိဉ္စိ ဂဟေတွာ၊ ‘‘ဣဒါနိ တဿ န ဒဿာမာ’’တိ မဂ္ဂပ္ပဋိပန္နာ အကတကမ္မာ စေဝ ကတကမ္မာ စ စောရာတိ ဝုတ္တံ ဟောတိ. ဧသ နယော သုင်္ကံ ပရိဟရိတုကာမာတိ ဧတ္ထာပိ.

ကာလဝိသင်္ကေတေနာတိ ကာလဿ ဝိသင်္ကေတေန၊ ဒိဝသဝိသင်္ကေတေနာတိ ဝုတ္တံ ဟောတိ. မဂ္ဂဝိသင်္ကေတေန၊ ပန အဋဝိဝိသင်္ကေတေန ဝါ ဂစ္ဆတော အာပတ္တိယေဝ.

ထေယျသတ္ထသိက္ခာပဒဝဏ္ဏနာ နိဋ္ဌိတာ.

၇. သံဝိဓာနသိက္ခာပဒဝဏ္ဏနာ

မာတုဂါမေနာတိ ဣတ္ထိယာ. ဧကတောဥပသမ္ပန္နာ၊ ပန သိက္ခမာနာ၊ သာမဏေရီ စာတိ ဣမာ တိဿောပိ ဣဓ သင်္ဂဟံ ဂစ္ဆန္တိ. ဣမာသံ ပန တိဿန္နံ သမယော ရက္ခတိ. အယမေတာသံ၊ မာတုဂါမဿ စ ဝိသေသောတိ ဝေဒိတဗ္ဗံ.

သံဝိဓာနသိက္ခာပဒဝဏ္ဏနာ နိဋ္ဌိတာ.

၈. အရိဋ္ဌသိက္ခာပဒဝဏ္ဏနာ

တံတံသမ္ပတ္တိယာ (သာရတ္ထ. ဋီ. ပါစိတ္တိယ ၃.၄၁၇) ဝိဗန္ဓနဝသေန သတ္တသန္တာနဿ အန္တရေ ဝေမဇ္ဈေ ဧတိ အာဂစ္ဆတီတိ အန္တရာယော၊ ဒိဋ္ဌဓမ္မိကာဒိအနတ္ထော၊ အနတိက္ကမနတ္ထေန တသ္မိံ အန္တရာယေ နိယုတ္တာ၊ အန္တရာယံ ဝါ ဖလံ အရဟန္တိ၊ အန္တရာယဿ ဝါ ကရဏသီလာတိ အန္တရာယိကာ. တေနာဟ ‘‘သဂ္ဂမောက္ခာနံ အန္တရာယံ ကရောန္တီတိ အန္တရာယိကာ’’တိ (မ. နိ. အဋ္ဌ. ၁.၂၃၄). တေ ကမ္မကိလေသဝိပါကဥပဝါဒပညတ္တိဝီတိက္ကမဝသေန ပဉ္စဝိဓာတိ ဧတ္ထ စ ပဉ္စာနန္တရိယကမ္မံ ကမ္မန္တရာယိကံ နာမ၊ တထာ ဘိက္ခုနိဒူသကကမ္မံ. တံ ပန မောက္ခဿေဝ အန္တရာယံ ကရောတိ၊ န သဂ္ဂဿ. နိယတမိစ္ဆာဒိဋ္ဌိဓမ္မာ ကိလေသန္တရာယိကာ နာမ. ပဏ္ဍကတိရစ္ဆာနဂတဥဘတောဗျဉ္ဇနကာနံ ပဋိသန္ဓိဓမ္မာ ဝိပါကန္တရာယိကာ နာမ. အရိယူပဝါဒါ ဥပဝါဒန္တရာယိကာ နာမ. တေ ပန ယာဝ အရိယေ န ခမာပေန္တိ၊ တာဝဒေဝ၊ န တတော ပရံ. သဉ္စိစ္စ အာပန္နာ အာပတ္တိယော ပညတ္တိဝီတိက္ကမန္တရာယိကာ နာမ. တာပိ ယာဝ ဘိက္ခုဘာဝံ ဝါ ပဋိဇာနာတိ၊ န ဝုဋ္ဌာတိ ဝါ န ဒေသေတိ ဝါ၊ တာဝဒေဝ၊ န တတော ပရံ.

တတြာယံ (မ. နိ. အဋ္ဌ. ၁.၂၃၄၊ ပါစိ. အဋ္ဌ. ၄၁၇) အရိဋ္ဌော ဘိက္ခု ဗဟုဿုတော ဓမ္မကထိကော သေသန္တရာယိကေ ဇာနာတိ၊ ဝိနယေ ပန အကောဝိဒတ္တာ ပဏ္ဏတ္တိဝီတိက္ကမန္တရာယိကေ န ဇာနာတိ၊ တသ္မာ ရဟောဂတော ဧဝံ စိန္တေသိ ‘‘ဣမေ အာဂါရိကာ ပဉ္စ ကာမဂုဏေ ပရိဘုဉ္ဇန္တာ သောတာပန္နာပိ သကဒါဂါမိနောပိ အနာဂါမိနောပိ ဟောန္တိ၊ ဘိက္ခူပိ မနာပိကာနိ စက္ခုဝိညေယျာနိ ရူပါနိ ပဿန္တိ။ပေ။ ကာယဝိညေယျေ ဖောဋ္ဌဗ္ဗေ ဖုသန္တိ၊ မုဒုကာနိ အတ္ထရဏပါဝုရဏာဒီနိ ပရိဘုဉ္ဇန္တိ၊ ဧတံ သဗ္ဗံ ဝဋ္ဋတိ. ကသ္မာ? ဣတ္ထိရူပါ။ပေ။ ဣတ္ထိဖောဋ္ဌဗ္ဗာ ဧဝ န ဝဋ္ဋန္တိ၊ ဧတေပိ ဝဋ္ဋန္တီ’’တိ ဧဝံ ရသေန ရသံ သံသန္ဒိတွာ သစ္ဆန္ဒရာဂပရိဘောဂဉ္စ နိစ္ဆန္ဒရာဂပရိဘောဂဉ္စ ဧကံ ကတွာ ထူလဝါကေဟိ သဒ္ဓိံ အတိသုခုမသုတ္တံ ဃဋေန္တော ဝိယ၊ သာသပေန သဒ္ဓိံ သိနေရုံ ဥပသံဟရန္တော ဝိယ စ ပါပကံ ဒိဋ္ဌိဂတံ ဥပ္ပါဒေတွာ ‘‘ကိံ ဘဂဝတာ မဟာသမုဒ္ဒံ ဗန္ဓန္တေန ဝိယ မဟတာ ဥဿာဟေန ပဌမပါရာဇိကံ ပညတ္တံ၊ နတ္ထိ ဧတ္ထ ဒေါသော’’တိ သဗ္ဗညုတညာဏေန သဒ္ဓိံ ပဋိဝိရုဇ္ဈန္တော ဘဗ္ဗပုဂ္ဂလာနံ အာသံ ဆိန္ဒန္တော ဇိနဿ အာဏာစက္ကေ ပဟာရမဒါသိ. တေနာဟ ‘‘တေသူ’’တိအာဒိ.

တတ္ထ တေသူတိ ယထာဝုတ္တေသု အန္တရာယေသု. အဋ္ဌိကင်္ကလူပမာ ကာမာတိ ဧတ္ထ အဋ္ဌိကင်္ကလံ (သာရတ္ထ. ဋီ. ပါစိတ္တိယ ၃.၄၁၇) နာမ ဥရဋ္ဌိ ဝါ ပိဋ္ဌိကဏ္ဋကံ ဝါ သီသဋ္ဌိ ဝါ. တဉှိ နိမ္မံသတ္တာ ‘‘ကင်္ကလ’’န္တိ ဝုစ္စတိ. ဝိဂတမံသာယ ဟိ အဋ္ဌိသင်္ခလိကာယ ဧကဋ္ဌိမှိ ဝါ ကင်္ကလသဒ္ဒေါ နိရုဠှော၊ တံသဒိသာ ကာမာ အပ္ပဿာဒဋ္ဌေနာတိ အတ္ထော. အာဒိသဒ္ဒေန ‘‘မံသပေသူပမာ ကာမာ၊ တိဏုက္ကူပမာ ကာမာ၊ အင်္ဂါရကာသူပမာ ကာမာ၊ သုပိနကူပမာ ကာမာ၊ ယာစိတကူပမာ ကာမာ၊ ရုက္ခဖလူပမာ ကာမာ၊ အသိသူနူပမာ ကာမာ၊ သတ္တိသူလူပမာ ကာမာ၊ သပ္ပသိရူပမာ ကာမာ’’တိ (မ. နိ. ၁.၂၃၄၊ ၂၃၆၊ ၂.၄၃-၄၈၊ ပါစိ. ၄၁၇၊ စူဠဝ. ၆၅) ဧတေသံ ဂဟဏံ.

တတ္ထ မံသပေသူပမာ ကာမာ (ပါစိ. အဋ္ဌ. ၄၁၇) ဗဟုသာဓာရဏဋ္ဌေန. တိဏုက္ကူပမာ ကာမာ အနုဒဟနဋ္ဌေန. အင်္ဂါရကာသူပမာ ကာမာ မဟာဘိတာပနဋ္ဌေန. သုပိနကူပမာ ကာမာ ဣတ္တရပစ္စုပဋ္ဌာနဋ္ဌေန. ယာစိတကူပမာ ကာမာ တာဝကာလိကဋ္ဌေန. ရုက္ခဖလူပမာ ကာမာ သဗ္ဗင်္ဂပစ္စင်္ဂပလိဘဉ္ဇနဋ္ဌေန. အသိသူနူပမာ အဓိကုဋ္ဋနဋ္ဌေန. သတ္တိသူလူပမာ ဝိနိဝိဇ္ဈနဋ္ဌေန. သပ္ပသိရူပမာ သာသင်္ကသပ္ပဋိဘယဋ္ဌေန.

တထေဝါတိ ‘‘မာ အာယသ္မာ’’တိအာဒီဟိ. ဣတရေသန္တိ သော သံဃမဇ္ဈံ အာကဍ္ဎိတွာ ယေဟိ ‘‘မာ အာယသ္မာ’’တိအာဒိနာ ဝုတ္တော၊ တတ္ထ တေဟိ အညေသံ သုတာနံ ဘိက္ခူနံ. ဉတ္တိစတုတ္ထေန ကမ္မေနာတိ ‘‘သုဏာတု မေ၊ ဘန္တေ၊ သံဃော၊ ဣတ္ထန္နာမဿ ဘိက္ခုနော ဧဝရူပံ ပါပကံ ဒိဋ္ဌိဂတံ ဥပ္ပန္န’’န္တိအာဒိနာ (ပါစိ. ၄၂၀) ပဒဘာဇနိယံ ဝုတ္တေန ဉတ္တိစတုတ္ထေန ကမ္မေန.

အရိဋ္ဌသိက္ခာပဒဝဏ္ဏနာ နိဋ္ဌိတာ.

၉. ဥက္ခိတ္တသမ္ဘောဂသိက္ခာပဒဝဏ္ဏနာ

အကတာနုဓမ္မေနာတိ ဥက္ခိပိတွာ အနောသာရိတေန. တေနာဟ ‘‘အနုဓမ္မော ဝုစ္စတီ’’တိအာဒိ. ဧတ္ထ အနုဓမ္မောတိ ဩသာရဏာ ဝုစ္စတီတိ သမ္ဗန္ဓော. ဥက္ခေပနီယကမ္မဿာနုရူပေါ၊ ပစ္ဆာ ကတ္တဗ္ဗော ဝါ ဓမ္မောတိ အနုဓမ္မော. အနုလောမဝတ္တံ ဒိသွာတိ ‘‘န ဥပသမ္ပာဒေတဗ္ဗံ၊ န နိဿယော ဒါတဗ္ဗော’’တိအာဒိကံ (စူဠဝ. ၇၀) အဋ္ဌာရသဝိဓံ ဝတ္တံ ဒိသွာ၊ ဧတေသု အဋ္ဌာရသသု အနုလောမဝတ္တေသု ဝတ္တန္တံ ဒိသွာတိ အဓိပ္ပါယော. အာမိသသမ္ဘောဂံ ဝါ ဓမ္မသမ္ဘောဂံ ဝါတိ ဧတ္ထ ယံ ကိဉ္စိ အာမိသဿ ဒါနံ၊ ပဋိဂ္ဂဟဏဉ္စ အာမိသသမ္ဘောဂေါ. ဓမ္မဿ ဥဒ္ဒိသနံ၊ ဥဒ္ဒိသာပနဉ္စ ဓမ္မသမ္ဘောဂေါ. သံဝသေယျာတိ ‘‘ဥပေါသထံ ဝါ ပဝါရဏံ ဝါ သံဃကမ္မံ ဝါ’’တိ (ပါစိ. ၄၂၅) ဧဝံ ပဒဘာဇနိယံ ဝုတ္တံ တိဝိဓံ သံဝါသံ ကရေယျ. ယသ္မာ ပနေတ္ထ ဥပေါသထပဝါရဏာပိ သံဃေဟိယေဝ ကာတဗ္ဗတ္တာ သံဃကမ္မာနိယေဝ ဟောန္တိ၊ တသ္မာ ‘‘ဥပေါသထာဒိကံ သံဃကမ္မံ ကရေယျာ’’တိ ဝုတ္တံ. ပယောဂေ ပယောဂေတိ ဒါနေ ဒါနေ၊ ဂဟဏေ ဂဟဏေ စာတိ အတ္ထော.

ပဏ္ဏတ္တိံ အဇာနန္တေန အရဟတာပိ ကိရိယာဗျာကတစိတ္တေန အာပဇ္ဇိတဗ္ဗတ္တာ ‘‘တိစိတ္တ’’န္တိ ဝုတ္တံ.

ဥက္ခိတ္တသမ္ဘောဂသိက္ခာပဒဝဏ္ဏနာ နိဋ္ဌိတာ.

၁၀. ကဏ္ဋကသိက္ခာပဒဝဏ္ဏနာ

ပိရေတိ (သာရတ္ထ. ဋီ. ပါစိတ္တိယ ၃.၄၂၈) နိပါတပဒံ သမ္ဗောဓနေ ဝတ္တမာနံ ပရသဒ္ဒေန သမာနတ္ထံ ဝဒန္တီတိ အာဟ ‘‘ပရ အမာမကာ’’တိ၊ အမှာကံ အနဇ္ဈတ္တိကဘူတာတိ အတ္ထော. ပိရေတိ ဝါ ‘‘ပရတော’’တိ ဣမိနာ သမာနတ္ထံ နိပါတပဒံ၊ တသ္မာ စရ ပိရေတိ ပရတော ဂစ္ဆ၊ မာ ဣဓ တိဋ္ဌာတိ ဧဝမေတ္ထ အတ္ထော ဒဋ္ဌဗ္ဗော.

ကဏ္ဋကသိက္ခာပဒဝဏ္ဏနာ နိဋ္ဌိတာ.

သပ္ပါဏကဝဂ္ဂေါ သတ္တမော.