၂. အင်္ဂုလိပတောဒကသိက္ခာပဒဝဏ္ဏနာ

ဟသာဓိပ္ပါယဿာတိ ခိဍ္ဍာဓိပ္ပါယဿ၊ ဣမိနာ ကာယသံသဂ္ဂါဓိပ္ပါယံ ပဋိက္ခိပတိ.

ဧတ္ထ စ ဘိက္ခုနိမ္ပိ ဟသာဓိပ္ပါယေန ဖုသတော ဘိက္ခုဿ ဒုက္ကဋံ. တထာ ဘိက္ခုမ္ပိ ဖုသန္တိယာ ဘိက္ခုနိယာတိ အာဟ ‘‘ဣဓ ပန ဘိက္ခုနီပိ ဘိက္ခုဿ၊ ဘိက္ခု စ ဘိက္ခုနိယာ အနုပသမ္ပန္နော ဧဝါ’’တိ. ကာယပ္ပဋိဗဒ္ဓါဒီသု သဗ္ဗတ္ထာတိ ‘‘ကာယေန ကာယပ္ပဋိဗဒ္ဓေ၊ ကာယပ္ပဋိဗဒ္ဓေန ကာယေ၊ ကာယပ္ပဋိဗဒ္ဓေန ကာယပ္ပဋိဗဒ္ဓေ၊ နိဿဂ္ဂိယေန ကာယေ၊ နိဿဂ္ဂိယေန ကာယပ္ပဋိဗဒ္ဓေ၊ နိဿဂ္ဂိယေန နိဿဂ္ဂိယေ’’တိ (ပါစိ. ၃၃၂) သဗ္ဗတ္ထ. သတိ ကရဏီယေ အာမသတောတိ သတိ ကရဏီယေ ပုရိသံ အာမသတော အနာပတ္တိ. ဣတ္ထီ ပန သတိ ကရဏီယေပိ အာမသိတုံ န ဝဋ္ဋတိ.

အင်္ဂုလိပတောဒကသိက္ခာပဒဝဏ္ဏနာ နိဋ္ဌိတာ.