၁၀. ရဟောနိသဇ္ဇသိက္ခာပဒဝဏ္ဏနာ

ဥပရီတိ အစေလကဝဂ္ဂေ. ဥပနန္ဒဿ စတုတ္ထသိက္ခာပဒေနာတိ အပ္ပဋိစ္ဆန္နေ မာတုဂါမေန သဒ္ဓိံ ရဟောနိသဇ္ဇသိက္ခာပဒေန (ပါစိ. ၂၈၄ အာဒယော). တဉှိ ဥပနန္ဒတ္ထေရံ အာရဗ္ဘ ပညတ္တေသု စတုတ္ထဘာဝတော ‘‘ဥပနန္ဒဿ စတုတ္ထသိက္ခာပဒ’’န္တိ ဝုတ္တံ. ယဒိ ဧကပရိစ္ဆေဒံ၊ အထ ကသ္မာ ဝိသုံ ပညတ္တန္တိ အာဟ ‘‘အဋ္ဌုပ္ပတ္တိဝသေန ပန ဝိသုံ ပညတ္တ’’န္တိ. တတ္ထ အဋ္ဌုပ္ပတ္တိဝသေနာတိ အတ္ထဿ ဥပ္ပတ္တိဝသေန၊ ဘိက္ခုနိယာ ဧဝ ရဟောနိသဇ္ဇာယ ဥပ္ပတ္တိဝသေနာတိ အတ္ထော. အယံ ဟေတ္ထာဓိပ္ပါယော – စတုတ္ထသိက္ခာပဒဝတ္ထုတော ဣမဿ သိက္ခာပဒဿ ဝတ္ထုနော ပဌမံ ဥပ္ပန္နတ္တာ ဧကပရိစ္ဆေဒေပိ ဣဒံ ပဌမံ ဝိသုံ ပညတ္တန္တိ.

ရဟောနိသဇ္ဇသိက္ခာပဒဝဏ္ဏနာ နိဋ္ဌိတာ.

ဩဝါဒဝဂ္ဂေါ တတိယော.